๓-๔. อนุรุทฺธตฺเถรอปทานํ

๔๒๑. ‘‘สุเมธํ ภควนฺตาหํ, โลกเชฏฺฐํ นราสภํ;

วูปกฏฺฐํ วิหรนฺตํ, อทฺทสํ โลกนายกํ.

๔๒๒. ‘‘อุปคนฺตฺวาน สมฺพุทฺธํ, สุเมธํ โลกนายกํ;

อญฺชลึ ปคฺคเหตฺวาน, พุทฺธเสฏฺฐมยาจหํ.

๔๒๓. ‘‘อนุกมฺป มหาวีร, โลกเชฏฺฐ นราสภ;

ปทีปํ เต ปทสฺสามิ, รุกฺขมูลมฺหิ ฌายโต.

๔๒๔. ‘‘อธิวาเสสิ โส ธีโร, สยมฺภู วทตํ วโร;

ทุเมสุ วินิวิชฺฌิตฺวา, ยนฺตํ โยชิยหํ ตทา.

๔๒๕. ‘‘สหสฺสวฏฺฏึ ปาทาสึ, พุทฺธสฺส โลกพนฺธุโน;

สตฺตาหํ ปชฺชลิตฺวาน, ทีปา วูปสมึสุ เม.

๔๒๖. ‘‘เตน จิตฺตปฺปสาเทน, เจตนาปณิธีหิ จ;

ชหิตฺวา มานุสํ เทหํ, วิมานมุปปชฺชหํ.

๔๒๗. ‘‘อุปปนฺนสฺส เทวตฺตํ, พฺยมฺหํ อาสิ สุนิมฺมิตํ;

สมนฺตโต ปชฺชลติ, ทีปทานสฺสิทํ ผลํ.

๔๒๘. ‘‘สมนฺตา โยชนสตํ, วิโรเจสิมหํ ตทา;

สพฺเพ เทเว อภิโภมิ, ทีปทานสฺสิทํ ผลํ.

๔๒๙. ‘‘ตึสกปฺปานิ เทวินฺโท, เทวรชฺชมการยึ;

น มํ เกจีติมญฺญนฺติ, ทีปทานสฺสิทํ ผลํ.

๔๓๐. ‘‘อฏฺฐวีสติกฺขตฺตุญฺจ, จกฺกวตฺตี อโหสหํ;

ทิวา รตฺติญฺจ ปสฺสามิ, สมนฺตา โยชนํ ตทา.

๔๓๑. ‘‘สหสฺสโลกํ ญาเณน, ปสฺสามิ สตฺถุ สาสเน;

ทิพฺพจกฺขุมนุปฺปตฺโต, ทีปทานสฺสิทํ ผลํ.

๔๓๒. ‘‘สุเมโธ นาม สมฺพุทฺโธ, ตึสกปฺปสหสฺสิโต;

ตสฺส ทีโป มยา ทินฺโน, วิปฺปสนฺเนน เจตสา.

๔๓๓. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา อนุรุทฺโธ เถโร อิมา คาถาโย อภาสิตฺถาติ.

อนุรุทฺธตฺเถรสฺสาปทานํ จตุตฺถํ.