๓-๑๐. อานนฺทตฺเถรอปทานํ

๖๔๔. ‘‘อารามทฺวารา นิกฺขมฺม, ปทุมุตฺตโร มหามุนิ;

วสฺเสนฺโต อมตํ วุฏฺฐึ, นิพฺพาเปสิ มหาชนํ.

๖๔๕. ‘‘สตสหสฺสํ เต ธีรา, ฉฬภิญฺญา มหิทฺธิกา;

ปริวาเรนฺติ สมฺพุทฺธํ, ฉายาว อนปายินี [อนุปายินี (สฺยา. ก.)].

๖๔๖. ‘‘หตฺถิกฺขนฺธคโต อาสึ, เสตจฺฉตฺตํ วรุตฺตมํ;

สุจารุรูปํ ทิสฺวาน, วิตฺติ เม อุทปชฺชถ.

๖๔๗. ‘‘โอรุยฺห หตฺถิขนฺธมฺหา, อุปคจฺฉึ นราสภํ;

รตนามยฉตฺตํ เม, พุทฺธเสฏฺฐสฺส ธารยึ.

๖๔๘. ‘‘มม สงฺกปฺปมญฺญาย, ปทุมุตฺตโร มหาอิสิ;

ตํ กถํ ฐปยิตฺวาน, อิมา คาถา อภาสถ.

๖๔๙. ‘‘‘โย โส ฉตฺตมธาเรสิ, โสณฺณาลงฺการภูสิตํ;

ตมหํ กิตฺตยิสฺสามิ, สุโณถ มม ภาสโต.

๖๕๐. ‘‘‘อิโต คนฺตฺวา อยํ โปโส, ตุสิตํ อาวสิสฺสติ;

อนุโภสฺสติ สมฺปตฺตึ, อจฺฉราหิ ปุรกฺขโต.

๖๕๑. ‘‘‘จตุตฺตึสติกฺขตฺตุญฺจ, เทวรชฺชํ กริสฺสติ;

พลาธิโป อฏฺฐสตํ, วสุธํ อาวสิสฺสติ.

๖๕๒. ‘‘‘อฏฺฐปญฺญาสกฺขตฺตุญฺจ, จกฺกวตฺตี ภวิสฺสติ;

ปเทสรชฺชํ วิปุลํ, มหิยา การยิสฺสติ.

๖๕๓. ‘‘‘กปฺปสตสหสฺสมฺหิ, โอกฺกากกุลสมฺภโว;

โคตโม นาม โคตฺเตน, สตฺถา โลเก ภวิสฺสติ.

๖๕๔. ‘‘‘สกฺยานํ กุลเกตุสฺส, ญาติพนฺธุ ภวิสฺสติ;

อานนฺโท นาม นาเมน, อุปฏฺฐาโก มเหสิโน.

๖๕๕. ‘‘‘อาตาปี นิปโก จาปิ, พาหุสจฺเจ สุโกวิโท;

นิวาตวุตฺติ อตฺถทฺโธ, สพฺพปาฐี ภวิสฺสติ.

๖๕๖. ‘‘‘ปธานปหิตตฺโต โส, อุปสนฺโต นิรูปธิ;

สพฺพาสเว ปริญฺญาย, นิพฺพายิสฺสตินาสโว.

๖๕๗. ‘‘‘สนฺติ อารญฺญกา นาคา, กุญฺชรา สฏฺฐิหายนา;

ติธาปภินฺนา มาตงฺคา, อีสาทนฺตา อุรูฬฺหวา.

๖๕๘. ‘‘‘อเนกสตสหสฺสา, ปณฺฑิตาปิ มหิทฺธิกา;

สพฺเพ เต พุทฺธนาคสฺส, น โหนฺตุ ปณิธิมฺหิ เต’ [น โหนฺติ ปริวิมฺภิตา (สฺยา.), น โหนฺติ ปณิธิมฺหิ เต (ก.)].

๖๕๙. ‘‘อาทิยาเม นมสฺสามิ, มชฺฌิเม อถ ปจฺฉิเม;

ปสนฺนจิตฺโต สุมโน, พุทฺธเสฏฺฐํ อุปฏฺฐหึ.

๖๖๐. ‘‘อาตาปี นิปโก จาปิ, สมฺปชาโน ปติสฺสโต;

โสตาปตฺติผลํ ปตฺโต, เสขภูมีสุ โกวิโท.

๖๖๑. ‘‘สตสหสฺสิโต กปฺเป, ยํ กมฺมมภินีหรึ;

ตาหํ ภูมิมนุปฺปตฺโต, ฐิตา สทฺธมฺมมาจลา [ฐิโต สทฺธมฺมมาจโล (สี.), ฐิตา สทฺธา มหปฺผลา (สฺยา.)].

๖๖๒. ‘‘สฺวาคตํ วต เม อาสิ, พุทฺธเสฏฺฐสฺส สนฺติเก;

ติสฺโส วิชฺชา อนุปฺปตฺตา, กตํ พุทฺธสฺส สาสนํ.

๖๖๓. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา อานนฺโท เถโร อิมา คาถาโย อภาสิตฺถาติ.

อานนฺทตฺเถรสฺสาปทานํ ทสมํ.

ตสฺสุทฺทานํ –

พุทฺโธ ปจฺเจกพุทฺโธ จ, สาริปุตฺโต จ โกลิโต;

กสฺสโป อนุรุทฺโธ จ, ปุณฺณตฺเถโร อุปาลิ จ.

อญฺญาสิโกณฺฑญฺโญ ปิณฺโฑโล, เรวตานนฺทปณฺฑิโต;

ฉสตานิ จ ปญฺญาส, คาถาโย สพฺพปิณฺฑิตา.

อปทาเน พุทฺธวคฺโค ปฐโม.