๓-๙. ขทิรวนิยเรวตตฺเถรอปทานํ

๖๒๘. ‘‘คงฺคา ภาคีรถี นาม, หิมวนฺตา ปภาวิตา;

กุติตฺเถ นาวิโก อาสึ, โอริเม จ ตรึ [โอริมํ จ ตเร (สฺยา.)] อหํ.

๖๒๙. ‘‘ปทุมุตฺตโร นายโก, สมฺพุทฺโธ ทฺวิปทุตฺตโม;

วสี สตสหสฺเสหิ, คงฺคาตีรมุปาคโต [ปุพฺเพ มยฺหํ สุตํ อาสิ,§‘‘ปทุมุตฺตรนายโก; วสีสตสหสฺเสหิ, คงฺคาโสตํ ตริสฺสติ‘‘; (สี.)].

๖๓๐. ‘‘พหู นาวา สมาเนตฺวา, วฑฺฒกีหิ [จมฺมเกหิ (ก.)] สุสงฺขตํ;

นาวาย [นาวานํ (ก.)] ฉทนํ กตฺวา, ปฏิมานึ นราสภํ.

๖๓๑. ‘‘อาคนฺตฺวาน จ สมฺพุทฺโธ, อารูหิ ตญฺจ นาวกํ;

วาริมชฺเฌ ฐิโต สตฺถา, อิมา คาถา อภาสถ.

๖๓๒. ‘‘‘โย โส ตาเรสิ สมฺพุทฺธํ, สงฺฆญฺจาปิ อนาสวํ;

เตน จิตฺตปฺปสาเทน, เทวโลเก รมิสฺสติ.

๖๓๓. ‘‘‘นิพฺพตฺติสฺสติ เต พฺยมฺหํ, สุกตํ นาวสณฺฐิตํ;

อากาเส ปุปฺผฉทนํ, ธารยิสฺสติ สพฺพทา.

๖๓๔. ‘‘‘อฏฺฐปญฺญาสกปฺปมฺหิ, ตารโก [ตารโณ (สฺยา.)] นาม ขตฺติโย;

จาตุรนฺโต วิชิตาวี, จกฺกวตฺตี ภวิสฺสติ.

๖๓๕. ‘‘‘สตฺตปญฺญาสกปฺปมฺหิ, จมฺมโก [จมฺปโก (สี.), จมฺพโก (สฺยา.)] นาม ขตฺติโย;

อุคฺคจฺฉนฺโตว สูริโย, โชติสฺสติ มหพฺพโล.

๖๓๖. ‘‘‘กปฺปสตสหสฺสมฺหิ, โอกฺกากกุลสมฺภโว;

โคตโม นาม โคตฺเตน, สตฺถา โลเก ภวิสฺสติ.

๖๓๗. ‘‘‘ติทสา โส จวิตฺวาน, มนุสฺสตฺตํ คมิสฺสติ;

เรวโต นาม นาเมน, พฺรหฺมพนฺธุ ภวิสฺสติ.

๖๓๘. ‘‘‘อคารา นิกฺขมิตฺวาน, สุกฺกมูเลน โจทิโต;

โคตมสฺส ภควโต, สาสเน ปพฺพชิสฺสติ.

๖๓๙. ‘‘‘โส ปจฺฉา ปพฺพชิตฺวาน, ยุตฺตโยโค วิปสฺสโก;

สพฺพาสเว ปริญฺญาย, นิพฺพายิสฺสตินาสโว’.

๖๔๐. ‘‘วีริยํ [วิริยํ (สี. สฺยา.)] เม ธุรโธรยฺหํ, โยคกฺเขมาธิวาหนํ;

ธาเรมิ อนฺติมํ เทหํ, สมฺมาสมฺพุทฺธสาสเน.

๖๔๑. ‘‘สตสหสฺเส กตํ กมฺมํ, ผลํ ทสฺเสสิ เม อิธ;

สุมุตฺโต สรเวโคว, กิเลเส ฌาปยี มม.

๖๔๒. ‘‘ตโต มํ วนนิรตํ, ทิสฺวา โลกนฺตคู มุนิ;

วนวาสิภิกฺขูนคฺคํ, ปญฺญเปสิ มหามติ.

๖๔๓. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา ขทิรวนิโย เรวโต เถโร อิมา คาถาโย อภาสิตฺถาติ.

ขทิรวนิยเรวตตฺเถรสฺสาปทานํ นวมํ.