๓-๘. ปิณฺโฑลภารทฺวาชตฺเถรอปทานํ

๖๑๓. ‘‘ปทุมุตฺตโร นาม ชิโน, สยมฺภู อคฺคปุคฺคโล;

ปุรโต หิมวนฺตสฺส, จิตฺตกูเฏ วสี ตทา.

๖๑๔. ‘‘อภีตรูโป ตตฺถาสึ, มิคราชา จตุกฺกโม;

ตสฺส สทฺทํ สุณิตฺวาน, วิกฺขมฺภนฺติ พหุชฺชนา.

๖๑๕. ‘‘สุผุลฺลํ ปทุมํ คยฺห, อุปคจฺฉึ นราสภํ;

วุฏฺฐิตสฺส สมาธิมฺหา, พุทฺธสฺส อภิโรปยึ.

๖๑๖. ‘‘จาตุทฺทิสํ นมสฺสิตฺวา, พุทฺธเสฏฺฐํ นรุตฺตมํ;

สกํ จิตฺตํ ปสาเทตฺวา, สีหนาทํ นทึ อหํ [ตทา (สฺยา.)].

๖๑๗. ‘‘ปทุมุตฺตโร โลกวิทู, อาหุตีนํ ปฏิคฺคโห;

สกาสเน นิสีทิตฺวา, อิมา คาถา อภาสถ.

๖๑๘. ‘‘‘พุทฺธสฺส คิรมญฺญาย, สพฺเพ เทวา สมาคตา;

อาคโต วทตํ เสฏฺโฐ, ธมฺมํ โสสฺสาม ตํ มยํ.

๖๑๙. ‘‘‘เตสํ หาสปเรตานํ, ปุรโต โลกนายโก;

มม สทฺทํ [กมฺมํ (?)] ปกิตฺเตสิ, ทีฆทสฺสี มหามุนิ’.

๖๒๐. ‘‘เยนิทํ ปทุมํ ทินฺนํ, สีหนาโท จ นาทิโต;

ตมหํ กิตฺตยิสฺสามิ, สุณาถ มม ภาสโต.

๖๒๑. ‘‘‘อิโต อฏฺฐมเก กปฺเป, จกฺกวตฺตี ภวิสฺสติ;

สตฺตรตนสมฺปนฺโน จตุทีปมฺหิ อิสฺสโร.

๖๒๒. ‘‘‘การยิสฺสติ อิสฺสริยํ [อิสฺสรํ (สฺยา. ก.)], มหิยา จตุสฏฺฐิยา;

ปทุโม นาม นาเมน, จกฺกวตฺตี มหพฺพโล.

๖๒๓. ‘‘กปฺปสตสหสฺสมฺหิ, โอกฺกากกุลสมฺภโว;

โคตโม นาม โคตฺเตน, สตฺถา โลเก ภวิสฺสติ.

๖๒๔. ‘ปกาสิเต ปาวจเน, พฺรหฺมพนฺธุ ภวิสฺสติ;

พฺรหฺมญฺญา อภินิกฺขมฺม, ปพฺพชิสฺสติ ตาวเท’.

๖๒๕. ‘‘ปธานปหิตตฺโต โส, อุปสนฺโต นิรูปธิ;

สพฺพาสเว ปริญฺญาย, นิพฺพายิสฺสตินาสโว.

๖๒๖. ‘‘วิชเน ปนฺตเสยฺยมฺหิ, วาฬมิคสมากุเล;

สพฺพาสเว ปริญฺญาย, นิพฺพายิสฺสตินาสโว.

๖๒๗. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา ปิณฺโฑลภารทฺวาโช เถโร อิมา คาถาโย อภาสิตฺถาติ.

ปิณฺโฑลภารทฺวาชตฺเถรสฺสาปทานํ อฏฺฐมํ.