๓. สีลฏฺฐิติวคฺโค

๑-๒. สีลสุตฺตาทิวณฺณนา

๓๘๗-๓๘๘. ตติยวคฺคสฺส ปฐเม สีลานีติ จตุปาริสุทฺธิสีลานิ. ทุติเย อุมฺมงฺโคติ ปญฺหมคฺโค ปญฺหคเวสนํ.

๓-๕. ปริหานสุตฺตาทิวณฺณนา

๓๘๙-๓๙๑. ตติเย ปริหานํ โหตีติ ปุคฺคลวเสน ปริหานํ โหติ. โย หิ พุทฺเธสุ ธรนฺเตสุปิ จตฺตาโร สติปฏฺฐาเน น ภาเวติ, ตสฺส สทฺธมฺโม อนฺตรหิโต นาม โหติ เทวทตฺตาทีนํ วิย. อิติ อิมสฺมึ สุตฺเต ตสฺส ปุคฺคลสฺเสว ธมฺมนฺตรธานํ กถิตํ. จตุตฺถปญฺจเมสุ สพฺพํ อุตฺตานเมว.

๖. ปเทสสุตฺตวณฺณนา

๓๙๒. ฉฏฺเฐ ปเทสํ ภาวิตตฺตาติ ปเทสโต ภาวิตตฺตา. จตฺตาโร หิ มคฺเค ตีณิ จ ผลานิ นิพฺพตฺเตนฺเตน สติปฏฺฐานา ปเทสํ ภาวิตา นาม โหนฺติ.

๗. สมตฺตสุตฺตวณฺณนา

๓๙๓. สตฺตเม สมตฺตํ ภาวิตตฺตาติ สมตฺตา ภาวิตตฺตา. อรหตฺตผลํ อุปฺปาเทนฺเตน หิ สติปฏฺฐานา สมตฺตํ ภาวิตา นาม โหนฺติ.

๘-๑๐. โลกสุตฺตาทิวณฺณนา

๓๙๔-๓๙๖. อฏฺฐเม มหาภิญฺญตนฺติ ฉนฺนํ อภิญฺญานํ วเสน วุตฺตํ. สหสฺสํ โลกํ อภิชานามีติ สตตวิหารวเสเนว วุตฺตํ. เถโร กิร ปาโตว อุฏฺฐาย มุขํ โธวิตฺวา เสนาสเน นิสินฺโน อตีเต กปฺปสหสฺสํ, อนาคเต กปฺปสหสฺสํ อนุสฺสรติ, ปจฺจุปฺปนฺเนปิ สหสฺสํ จกฺกวาฬานํ ตสฺสาวชฺชนสฺส คตึ อนุพนฺธติ. อิติ โส ทิพฺเพน จกฺขุนา สหสฺสํ โลกํ อภิชานาติ, อยมสฺส สตตวิหาโร. เสสํ สพฺพตฺถ อุตฺตานตฺถเมวาติ.

สีลฏฺฐิติวคฺโค ตติโย.