๙. อรญฺญายตนอิสิสุตฺตวณฺณนา

๒๕๕. นวเม ปณฺณกุฏีสุ สมฺมนฺตีติ หิมวนฺตปเทเส รมณีเย อรญฺญายตเน รตฺติฏฺฐานทิวาฏฺฐานจงฺกมนาทีหิ สมฺปนฺนาสุ ปณฺณสาลาสุ วสนฺติ. สกฺโก จ เทวานมินฺโท เวปจิตฺติ จาติ อิเม เทฺว ชนา ชามาติกสสุรา กาเลน กลหํ กโรนฺติ, กาเลน เอกโต จรนฺติ, อิมสฺมึ ปน กาเล เอกโต จรนฺติ. ปฏลิโยติ คณงฺคณูปาหนา. ขคฺคํ โอลคฺเคตฺวาติ ขคฺคํ อํเส โอลคฺเคตฺวา. ฉตฺเตนาติ ทิพฺพเสตจฺฉตฺเตน มตฺถเก ธารยมาเนน. อปพฺยามโต กริตฺวาติ พฺยามโต อกตฺวา. จิรทิกฺขิตานนฺติ จิรสมาทิณฺณวตานํ. อิโต ปฏิกฺกมฺมาติ ‘‘อิโต ปกฺกม ปริวชฺชย, มา อุปริวาเต ติฏฺฐา’’ติ วทนฺติ. น เหตฺถ เทวาติ เอตสฺมึ สีลวนฺตานํ คนฺเธ เทวา น ปฏิกฺกูลสญฺญิโน, อิฏฺฐกนฺตมนาปสญฺญิโนเยวาติ ทีเปติ. นวมํ.