๑. สพฺพสงฺคาหิกวารวณฺณนา

๙๗๘. อิทานิ ตทนนฺตเร ธมฺมหทยวิภงฺเค ปาฬิปริจฺเฉโท ตาว เอวํ เวทิตพฺโพ – เอตฺถ หิ อาทิโตว ขนฺธาทีนํ ทฺวาทสนฺนํ โกฏฺฐาสานํ วเสน สพฺพสงฺคาหิกวาโร นาม วุตฺโต. ทุติโย เตสํเยว ธมฺมานํ กามธาตุอาทีสุ อุปฺปตฺตานุปฺปตฺติทสฺสนวาโร นาม. ตติโย ตตฺเถว ปริยาปนฺนาปริยาปนฺนทสฺสนวาโร นาม. จตุตฺโถ ตีสุ ภูมีสุ อุปฺปตฺติกฺขเณ วิชฺชมานาวิชฺชมานธมฺมทสฺสนวาโร นาม. ปญฺจโม เตสํ ธมฺมานํ ภูมนฺตรวเสน ทสฺสนวาโร นาม. ฉฏฺโฐ คตีสุ อุปฺปาทกกมฺมอายุปฺปมาณทสฺสนวาโร นาม. สตฺตโม อภิญฺเญยฺยาทิวาโร นาม. อฏฺฐโม สารมฺมณานารมฺมณวาโร นาม. นวโม เตสํ ขนฺธาทิธมฺมานํ ทิฏฺฐสุตาทิวเสน สงฺคเหตฺวา ทสฺสนวาโร นาม. ทสโม กุสลตฺติกาทิวเสน สงฺคเหตฺวา ทสฺสนวาโร นาม.

๙๗๙. เอวํ ทสหิ วาเรหิ ปริจฺฉินฺนาย ปาฬิยา ปฐเม ตาว สพฺพสงฺคาหิกวาเร ‘‘อวีจิโต ยาว ภวคฺคํ เอตฺถนฺตเร กติ ขนฺธา’’ติ ปุจฺฉิเต ‘‘เอโกติ วา…เป… จตฺตาโรติ วา ฉาติ วา อวตฺวา ปญฺจาติ วตฺตุํ สมตฺโถ อญฺโญ นตฺถี’’ติ อตฺตโน ญาณพลํ ทีเปนฺโต ปญฺจกฺขนฺธาติ ปุจฺฉานุรูปํ วิสฺสชฺชนํ อาห. ยถาปุจฺฉํ วิสฺสชฺชนญฺหิ สพฺพญฺญุพฺยากรณํ นามาติ วุจฺจติ. ทฺวาทสายตนานีติอาทีสุปิ เอเสว นโย. รูปกฺขนฺธาทีนํ ปเภโท ขนฺธวิภงฺคาทีสุ วุตฺตนเยเนว เวทิตพฺโพ.