(๗.) สตฺตกนิทฺเทสวณฺณนา

๙๔๙. สตฺตกนิทฺเทเส ถามคตฏฺเฐน อปฺปหีนฏฺเฐน จ อนุเสนฺตีติ อนุสยา. วฏฺฏสฺมึ สตฺเต สํโยเชนฺติ ฆเฏนฺตีติ สํโยชนานิ. สมุทาจารวเสน ปริยุฏฺฐหนฺตีติ ปริยุฏฺฐานานิ. กามราโคว ปริยุฏฺฐานํ กามราคปริยุฏฺฐานํ. เสเสสุปิ เอเสว นโย.

๙๕๐. อสตํ ธมฺมา, ลามกฏฺเฐน วา อสนฺตา ธมฺมาติ อสทฺธมฺมา. ราคาทีหิ โทเสหิ ทุฏฺฐานิ จริตานีติ ทุจฺจริตานิ. เตน เตนากาเรน มญฺญนฺตีติ มานา.

๙๕๑. ทิฏฺฐินิทฺเทเส รูปีติ รูปวา. จาตุมหาภูติโกติ จตุมหาภูตมโย. มาตาปิตูนํ เอตนฺติ มาตาเปตฺติกํ. กินฺตํ? สุกฺกโสณิตํ. มาตาเปตฺติเก สมฺภูโต ชาโตติ มาตาเปตฺติกสมฺภโว. อิธ รูปกายสีเสน มนุสฺสตฺตภาวํ อตฺตาติ วทติ. ทุติโย ตํ ปฏิกฺขิปิตฺวา ทิพฺพตฺตภาวํ วทติ. ทิพฺโพติ เทวโลเก สมฺภูโต. กามาวจโรติ ฉกามาวจรเทวปริยาปนฺโน. กพฬีการํ ภกฺขยตีติ กพฬีการภกฺโข. มโนมโยติ ฌานมเนน นิพฺพตฺโต. สพฺพงฺคปจฺจงฺคีติ สพฺพงฺคปจฺจงฺคยุตฺโต. อหีนินฺทฺริโยติ ปริปุณฺณินฺทฺริโย; ยานิ พฺรหฺมโลเก อตฺถิ เตสํ วเสน, อิตเรสญฺจ สณฺฐานวเสเนตํ วุตฺตํ. อากาสานญฺจายตนูปโคติ อากาสานญฺจายตนภาวํ อุปคโต. อิตเรสุปิ เอเสว นโย. เสสํ สพฺพตฺถ อุตฺตานตฺถเมวาติ.

สตฺตกนิทฺเทสวณฺณนา.