๘. ชีวิตาโวโรปนกถาวณฺณนา

๖๔๘-๖๔๙. อิทานิ ชีวิตาโวโรปนกถา นาม โหติ. ตตฺถ ยสฺมา โทสสมฺปยุตฺเตน จิตฺเตน ปาณาติปาโต โหติ, โทโส จ ทิฏฺฐิสมฺปนฺนสฺส อปฺปหีโน, ตสฺมา ‘‘ทิฏฺฐิสมฺปนฺโน สญฺจิจฺจ ปาณํ ชีวิตา โวโรเปยฺยา’’ติ เยสํ ลทฺธิ, เสยฺยถาปิ ปุพฺพเสลิยาปรเสลิยานํ; เต สนฺธาย ทิฏฺฐิสมฺปนฺโนติ ปุจฺฉา สกวาทิสฺส, ปฏิญฺญา อิตรสฺส. สญฺจิจฺจ มาตรนฺติอาทิปเญฺหสุ ปน ‘‘อฏฺฐานเมตํ อนวกาโส’’ติ สุตฺตภเยน ปฏิกฺขิปติ. สตฺถริ อคารโวติอาทิ สตฺถาราทีสุ สคารวสฺส สิกฺขาปทสฺส วีติกฺกมาภาวทสฺสนตฺถํ วุตฺตํ. อิตโร ปน อกุสลวเสน ตสฺส อคารโว นาม นตฺถีติ ปฏิกฺขิปิตฺวา สคารวภาวญฺจ สมฺปฏิจฺฉิตฺวา ปุน อคารโวติ ปุฏฺโฐ เตสุ เตสุ กิจฺเจสุ ปสุตตาย วิกฺขิตฺตานํ อสติยา อมนสิกาเรน เจติเย อภิวาทนปทกฺขิณกรณาภาวํ สนฺธาย ปฏิชานาติ. ปุน โอหเทยฺยาติอาทินา นเยน ปุฏฺโฐ ตาทิสาย กิริยาย สญฺจิจฺจ อกรณโต ปฏิกฺขิปติ. เสสเมตฺถ อุตฺตานตฺถเมวาติ.

ชีวิตาโวโรปนกถาวณฺณนา.