๘. อฏฺฐมนโย วิปฺปยุตฺเตนสมฺปยุตฺตปทวณฺณนา

๓๑๗. อิทานิ วิปฺปยุตฺเตนสมฺปยุตฺตปทํ ภาเชตุํ รูปกฺขนฺเธนาติอาทิ อารทฺธํ. ตตฺถ สพฺพาปิ ปุจฺฉา โมฆปุจฺฉาว. รูปกฺขนฺเธน หิ วิปฺปยุตฺตา นาม จตฺตาโร ขนฺธา, เตสํ อญฺเญหิ สมฺปโยโค นตฺถิ. เวทนากฺขนฺเธน วิปฺปยุตฺตํ รูปํ นิพฺพานญฺจ, ตสฺส จ เกนจิ สมฺปโยโค นตฺถิ. เอวํ สพฺพปเทสุ. วิปฺปยุตฺตานํ ปน สมฺปโยคาภาโว เวทิตพฺโพ. อิติ ปุจฺฉาย โมฆตฺตา สพฺพวิสฺสชฺชเนสุ นตฺถิ นตฺถิอิจฺเจว วุตฺตนฺติ.

วิปฺปยุตฺเตนสมฺปยุตฺตปทวณฺณนา.