๙. สตฺถุสาสนสุตฺตวณฺณนา

๘๓. นวเม เอโกติ อทุติโย. วูปกฏฺโฐติ กาเยน คณโต, จิตฺเตน กิเลเสหิ วูปกฏฺโฐ วิเวกฏฺโฐ ทูรีภูโต. อปฺปมตฺโตติ สติอวิปฺปวาเส ฐิโต. ปหิตตฺโตติ เปสิตตฺโต. นิพฺพิทายาติ วฏฺเฏ อุกฺกณฺฐนตฺถาย. วิราคายาติ ราคาทีนํ วิรชฺชนตฺถาย. นิโรธายาติ อปฺปวตฺติกรณตฺถาย. วูปสมายาติ กิเลสวูปสมาย อปฺปวตฺติยา. อภิญฺญายาติ ติลกฺขณํ อาโรเปตฺวา อภิชานนตฺถาย. สมฺโพธายาติ มคฺคสงฺขาตสฺส สมฺโพธสฺส อตฺถาย. นิพฺพานายาติ นิพฺพานสฺส สจฺฉิกรณตฺถาย.