๘. วินยวคฺโค

๑. ปฐมวินยธรสุตฺตวณฺณนา

๗๕. อฏฺฐมสฺส ปฐเม อาปตฺตึ ชานาตีติ อาปตฺตึเยว อาปตฺตีติ ชานาติ. เสสปเทสุปิ เอเสว นโย.

๒. ทุติยวินยธรสุตฺตวณฺณนา

๗๖. ทุติเย สฺวาคตานีติ สุอาคตานิ สุปฺปคุณานิ. สุวิภตฺตานีติ โกฏฺฐาสโต สุฏฺฐุ วิภตฺตานิ. สุปฺปวตฺตีนีติ อาวชฺชิตาวชฺชิตฏฺฐาเน สุฏฺฐุ ปวตฺตานิ ทฬฺหปฺปคุณานิ. สุวินิจฺฉิตานีติ สุฏฺฐุ วินิจฺฉิตานิ. สุตฺตโสติ วิภงฺคโต. อนุพฺยญฺชนโสติ ขนฺธกปริวารโต.

๓. ตติยวินยธรสุตฺตวณฺณนา

๗๗. ตติเย วินเย โข ปน ฐิโต โหตีติ วินยลกฺขเณ ปติฏฺฐิโต โหติ. อสํหีโรติ น สกฺกา โหติ คหิตคฺคหณํ วิสฺสชฺชาเปตุํ.

๙. สตฺถุสาสนสุตฺตวณฺณนา

๘๓. นวเม เอโกติ อทุติโย. วูปกฏฺโฐติ กาเยน คณโต, จิตฺเตน กิเลเสหิ วูปกฏฺโฐ วิเวกฏฺโฐ ทูรีภูโต. อปฺปมตฺโตติ สติอวิปฺปวาเส ฐิโต. ปหิตตฺโตติ เปสิตตฺโต. นิพฺพิทายาติ วฏฺเฏ อุกฺกณฺฐนตฺถาย. วิราคายาติ ราคาทีนํ วิรชฺชนตฺถาย. นิโรธายาติ อปฺปวตฺติกรณตฺถาย. วูปสมายาติ กิเลสวูปสมาย อปฺปวตฺติยา. อภิญฺญายาติ ติลกฺขณํ อาโรเปตฺวา อภิชานนตฺถาย. สมฺโพธายาติ มคฺคสงฺขาตสฺส สมฺโพธสฺส อตฺถาย. นิพฺพานายาติ นิพฺพานสฺส สจฺฉิกรณตฺถาย.

๑๐. อธิกรณสมถสุตฺตวณฺณนา

๘๔. ทสเม อธิกรณานิ สเมนฺติ วูปสเมนฺตีติ อธิกรณสมถา. อุปฺปนฺนุปฺปนฺนานนฺติ อุปฺปนฺนานํ อุปฺปนฺนานํ. อธิกรณานนฺติ วิวาทาธิกรณํ อนุวาทาธิกรณํ อาปตฺตาธิกรณํ กิจฺจาธิกรณนฺติ อิเมสํ จตุนฺนํ. สมถาย วูปสมายาติ สมถตฺถญฺเจว วูปสมนตฺถญฺจ. สมฺมุขาวินโย ทาตพฺโพ…เป… ติณวตฺถารโกติ อิเม สตฺต สมถา ทาตพฺพา. เตสํ วินิจฺฉโย วินยสํวณฺณนโต (จูฬว. อฏฺฐ. ๑๘๖-๑๘๗ อาทโย) คเหตพฺโพ. อปิจ ทีฆนิกาเย สงฺคีติสุตฺตวณฺณนายมฺปิ (ที. นิ. อฏฺฐ. ๓.๓๓๑ อธิกรณสมถสตฺตกวณฺณนา) วิตฺถาริโตเยว, ตถา มชฺฌิมนิกาเย สามคามสุตฺตวณฺณนายาติ (ม. นิ. อฏฺฐ. ๓.๔๖).

วินยวคฺโค อฏฺฐโม.