๒. ปทโสธนมูลจกฺกวาโร

(ก) อนุโลมํ

๑๒. (ก) จกฺขุ จกฺขายตนนฺติ?

ทิพฺพจกฺขุ ปญฺญาจกฺขุ จกฺขุ, น จกฺขายตนํ. จกฺขายตนํ จกฺขุ เจว จกฺขายตนญฺจ…เป….

(ข) อายตนา โสตายตนนฺติ?

โสตายตนํ อายตนญฺเจว โสตายตนญฺจ. อวเสสา อายตนา น โสตายตนํ.

จกฺขุ จกฺขายตนนฺติ?

ทิพฺพจกฺขุ ปญฺญาจกฺขุ จกฺขุ, น จกฺขายตนํ. จกฺขายตนํ จกฺขุ เจว จกฺขายตนญฺจ…เป….

อายตนา ฆานายตนนฺติ…เป… อายตนา ธมฺมายตนนฺติ?

ธมฺมายตนํ อายตนญฺเจว ธมฺมายตนญฺจ. อวเสสา อายตนา น ธมฺมายตนํ.

โสตํ โสตายตนนฺติ?…เป… อวเสสา อายตนา น ธมฺมายตนํ…เป….

ธมฺโม ธมฺมายตนนฺติ?

ธมฺมายตนํ ฐเปตฺวา อวเสโส ธมฺโม, น ธมฺมายตนํ. ธมฺมายตนํ ธมฺโม เจว ธมฺมายตนญฺจ…เป….

อายตนา จกฺขายตนนฺติ?

จกฺขายตนํ อายตนญฺเจว จกฺขายตนญฺจ. อวเสสา อายตนา น จกฺขายตนํ.

ธมฺโม ธมฺมายตนนฺติ?

ธมฺมายตนํ ฐเปตฺวา อวเสโส ธมฺโม, น ธมฺมายตนํ. ธมฺมายตนํ ธมฺโม เจว ธมฺมายตนญฺจ.

อายตนา โสตายตนนฺติ…เป… อายตนา มนายตนนฺติ?

มนายตนํ อายตนญฺเจว มนายตนญฺจ. อวเสสา อายตนา น มนายตนํ.

(เอเกกปทมูลกํ จกฺกํ พนฺธิตพฺพํ อสมฺโมหนฺเตน).

(ข) ปจฺจนีกํ

๑๓. (ก) น จกฺขุ น จกฺขายตนนฺติ? อามนฺตา.

(ข) นายตนา น โสตายนนฺติ? อามนฺตา.

(ก) น จกฺขุ น จกฺขายตนนฺติ? อามนฺตา.

(ข) นายตนา น ฆานายตนนฺติ? อามนฺตา.…เป….

นายตนา น ธมฺมายตนนฺติ? อามนฺตา.

น โสตํ น โสตายตนนฺติ? อามนฺตา.

นายตนา น จกฺขายตนํ…เป… นายตนา น ธมฺมายตนนฺติ? อามนฺตา.

น ฆานํ น ฆานายตนํ…เป… นายตนา น ธมฺมายตนนฺติ?

อามนฺตา.…เป….

(ก) น ธมฺโม น ธมฺมายตนนฺติ? อามนฺตา.

(ข) นายตนา น จกฺขายตนนฺติ? อามนฺตา.

น ธมฺโม น ธมฺมายตนนฺติ? อามนฺตา.

นายตนา น โสตายตนํ…เป… นายตนา น มนายตนนฺติ? อามนฺตา.

(จกฺกํ พนฺธนฺเตน สพฺพตฺถ อามนฺตาติ กาตพฺพํ).