๑. ปทโสธนวาโร
(ก) อนุโลมํ
๑๐. (ก) จกฺขุ จกฺขายตนนฺติ?
ทิพฺพจกฺขุ ปญฺญาจกฺขุ จกฺขุ, น จกฺขายตนํ. จกฺขายตนํ จกฺขุ เจว จกฺขายตนญฺจ.
(ข) จกฺขายตนํ จกฺขูติ? อามนฺตา.
(ก) โสตํ โสตายตนนฺติ?
ทิพฺพโสตํ ตณฺหาโสตํ โสตํ, น โสตายตนํ. โสตายตนํ โสตญฺเจว โสตายตนญฺจ.
(ข) โสตายตนํ โสตนฺติ? อามนฺตา.
(ก) ฆานํ ฆานายตนนฺติ? อามนฺตา.
(ข) ฆานายตนํ ฆานนฺติ? อามนฺตา.
(ก) ชิวฺหา ชิวฺหายตนนฺติ? อามนฺตา.
(ข) ชิวฺหายตนํ ชิวฺหาติ? อามนฺตา.
(ก) กาโย กายายตนนฺติ?
กายายตนํ ฐเปตฺวา อวเสโส กาโย, น กายายตนํ. กายายตนํ กาโย เจว กายายตนญฺจ.
(ข) กายายตนํ กาโยติ? อามนฺตา.
(ก) รูปํ รูปายตนนฺติ?
รูปายตนํ ฐเปตฺวา อวเสสํ รูปํ, น รูปายตนํ. รูปายตนํ รูปญฺเจว รูปายตนญฺจ.
(ข) รูปายตนํ รูปนฺติ? อามนฺตา.
(ก) สทฺโท สทฺทายตนนฺติ? อามนฺตา.
(ข) สทฺทายตนํ สทฺโทติ? อามนฺตา.
(ก) คนฺโธ คนฺธายตนนฺติ?
สีลคนฺโธ สมาธิคนฺโธ ปญฺญาคนฺโธ คนฺโธ, น คนฺธายตนํ. คนฺธายตนํ คนฺโธ เจว คนฺธายตนญฺจ.
(ข) คนฺธายตนํ คนฺโธติ? อามนฺตา.
(ก) รโส รสายตนนฺติ?
อตฺถรโส ธมฺมรโส วิมุตฺติรโส รโส, น รสายตนํ. รสายตนํ รโส เจว รสายตนญฺจ.
(ข) รสายตนํ รโสติ? อามนฺตา.
(ก) โผฏฺฐพฺโพ โผฏฺฐพฺพายตนนฺติ? อามนฺตา.
(ข) โผฏฺฐพฺพายตนํ โผฏฺฐพฺโพติ? อามนฺตา.
(ก) มโน มนายตนนฺติ? อามนฺตา.
(ข) มนายตนํ มโนติ? อามนฺตา.
(ก) ธมฺโม ธมฺมายตนนฺติ?
ธมฺมายตนํ ฐเปตฺวา อวเสโส ธมฺโม, น ธมฺมายตนํ. ธมฺมายตนํ ธมฺโม เจว ธมฺมายตนญฺจ.
(ข) ธมฺมายตนํ ธมฺโมติ? อามนฺตา.
(ข) ปจฺจนีกํ
๑๑. (ก) น จกฺขุ น จกฺขายตนนฺติ? อามนฺตา.
(ข) น จกฺขายตนํ น จกฺขูติ?
ทิพฺพจกฺขุ ปญฺญาจกฺขุ น จกฺขายตนํ, จกฺขุ. จกฺขุญฺจ จกฺขายตนญฺจ ฐเปตฺวา อวเสสํ [อวเสสา (สฺยา. ปี.)] น เจว จกฺขุ น จ จกฺขายตนํ.
(ก) น โสตํ น โสตายตนนฺติ? อามนฺตา.
(ข) น โสตายตนํ น โสตนฺติ?
ทิพฺพโสตํ ตณฺหาโสตํ น โสตายตนํ, โสตํ. โสตญฺจ โสตายตนญฺจ ฐเปตฺวา อวเสสํ น เจว โสตํ น จ โสตายตนํ.
(ก) น ฆานํ น ฆานายตนนฺติ? อามนฺตา.
(ข) น ฆานายตนํ น ฆานนฺติ? อามนฺตา.
(ก) น ชิวฺหา น ชิวฺหายตนนฺติ? อามนฺตา.
(ข) น ชิวฺหายตนํ น ชิวฺหาติ? อามนฺตา.
(ก) น กาโย น กายายตนนฺติ? อามนฺตา.
(ข) น กายายตนํ น กาโยติ?
กายายตนํ ฐเปตฺวา อวเสโส น กายายตนํ, กาโย. กายญฺจ กายายตนญฺจ ฐเปตฺวา อวเสสํ [อวเสโส (สฺยา.)] น เจว กาโย น จ กายายตนํ.
(ก) น รูปํ น รูปายตนนฺติ? อามนฺตา.
(ข) น รูปายตนํ น รูปนฺติ?
รูปายตนํ ฐเปตฺวา อวเสสํ น รูปายตนํ, รูปํ. รูปญฺจ รูปายตนญฺจ ฐเปตฺวา อวเสสํ น เจว รูปํ น จ รูปายตนํ.
(ก) น สทฺโท น สทฺทายตนนฺติ? อามนฺตา.
(ข) น สทฺทายตนํ น สทฺโทติ? อามนฺตา.
(ก) น คนฺโธ น คนฺธายตนนฺติ? อามนฺตา.
(ข) น คนฺธายตนํ น คนฺโธติ?
สีลคนฺโธ สมาธิคนฺโธ ปญฺญาคนฺโธ น คนฺธายตนํ, คนฺโธ. คนฺธญฺจ คนฺธายตนญฺจ ฐเปตฺวา อวเสสํ [อวเสสา (สฺยา.)] น เจว คนฺโธ น จ คนฺธายตนํ.
(ก) น รโส น รสายตนนฺติ? อามนฺตา.
(ข) น รสายตนํ น รโสติ?
อตฺถรโส ธมฺมรโส วิมุตฺติรโส น รสายตนํ, รโส. รสญฺจ รสายตนญฺจ ฐเปตฺวา อวเสสํ น เจว รโส น จ รสายตนํ.
(ก) น โผฏฺฐพฺโพ น โผฏฺฐพฺพายตนนฺติ? อามนฺตา.
(ข) น โผฏฺฐพฺพายตนํ น โผฏฺฐพฺโพติ? อามนฺตา.
(ก) น มโน น มนายตนนฺติ? อามนฺตา.
(ข) น มนายตนํ น มโนติ? อามนฺตา.
(ก) น ธมฺโม น ธมฺมายตนนฺติ? อามนฺตา.
(ข) น ธมฺมายตนํ น ธมฺโมติ?
ธมฺมายตนํ ฐเปตฺวา อวเสโส น ธมฺมายตนํ, ธมฺโม. ธมฺมญฺจ ธมฺมายตนญฺจ ฐเปตฺวา อวเสสํ น เจว ธมฺโม น จ ธมฺมายตนํ.