(๒) มูลมูลนโย

๘๙. (ก) เย เกจิ นามา ธมฺมา, สพฺเพ เต นามมูลมูลาติ?

นเวว นามมูลมูลานิ. อวเสสา นามา ธมฺมา น นามมูลมูลา.

(ข) เย วา ปน นามมูลมูลา, สพฺเพ เต ธมฺมา นามาติ? อามนฺตา.

๙๐. (ก) เย เกจิ นามา ธมฺมา, สพฺเพ เต นามมูเลน เอกมูลมูลาติ?

อเหตุกํ นามํ นามมูเลน น เอกมูลมูลํ. สเหตุกํ นามํ นามมูเลน เอกมูลมูลํ.

(ข) เย วา ปน นามมูเลน เอกมูลมูลา, สพฺเพ เต ธมฺมา นามาติ?

นามสมุฏฺฐานํ รูปํ นามมูเลน เอกมูลมูลํ, น นามํ. นามํ นามมูเลน เอกมูลมูลญฺเจว นามญฺจ.

๙๑. (ก) เย เกจิ นามมูเลน เอกมูลมูลา ธมฺมา, สพฺเพ เต นามมูเลน อญฺญมญฺญมูลมูลาติ?

มูลานิ ยานิ เอกโต อุปฺปชฺชนฺติ นามมูลานิ เอกมูลมูลานิ เจว อญฺญมญฺญมูลมูลานิ จ. อวเสสา นามมูลสหชาตา ธมฺมา นามมูเลน เอกมูลมูลา, น จ อญฺญมญฺญมูลมูลา.

(ข) เย วา ปน นามมูเลน อญฺญมญฺญมูลมูลา, สพฺเพ เต ธมฺมา นามาติ? อามนฺตา.