๑-๗. ปฏิจฺจวาราทิ

๑๒. นเหตุญฺเจว นเหตุวิปฺปยุตฺตญฺจ ธมฺมํ ปฏิจฺจ นเหตุ เจว นเหตุวิปฺปยุตฺโต จ ธมฺโม อุปฺปชฺชติ เหตุปจฺจยา. นเหตุญฺเจว นเหตุวิปฺปยุตฺตญฺจ ธมฺมํ ปฏิจฺจ นเหตุวิปฺปยุตฺโต เจว น นเหตุ จ ธมฺโม อุปฺปชฺชติ เหตุปจฺจยา. นเหตุญฺเจว นเหตุวิปฺปยุตฺตญฺจ ธมฺมํ ปฏิจฺจ นเหตุ เจว นเหตุวิปฺปยุตฺโต จ นเหตุวิปฺปยุตฺโต เจว น นเหตุ จ ธมฺมา อุปฺปชฺชนฺติ เหตุปจฺจยา. (๓)

นเหตุวิปฺปยุตฺตญฺเจว น นเหตุญฺจ ธมฺมํ ปฏิจฺจ นเหตุวิปฺปยุตฺโต เจว น นเหตุ จ ธมฺโม อุปฺปชฺชติ เหตุปจฺจยา. นเหตุวิปฺปยุตฺตญฺเจว น นเหตุญฺจ ธมฺมํ ปฏิจฺจ นเหตุ เจว นเหตุวิปฺปยุตฺโต จ ธมฺโม อุปฺปชฺชติ เหตุปจฺจยา. นเหตุวิปฺปยุตฺตญฺเจว น นเหตุญฺจ ธมฺมํ ปฏิจฺจ นเหตุ เจว นเหตุวิปฺปยุตฺโต จ นเหตุวิปฺปยุตฺโต เจว น นเหตุ จ ธมฺมา อุปฺปชฺชนฺติ เหตุปจฺจยา. (๓)

นเหตุญฺเจว นเหตุวิปฺปยุตฺตญฺจ นเหตุวิปฺปยุตฺตญฺเจว น นเหตุญฺจ ธมฺมํ ปฏิจฺจ นเหตุ เจว นเหตุวิปฺปยุตฺโต จ ธมฺโม อุปฺปชฺชติ เหตุปจฺจยา… ตีณิ. (สํขิตฺตํ.)

เหตุยา นว…เป… อวิคเต นว. (สพฺพตฺถ วิตฺถาโร.)