๘๒. กิเลสวิปฺปยุตฺตสํกิเลสิกทุกํ

๗๕. กิเลสวิปฺปยุตฺตํ นสํกิเลสิกํ ธมฺมํ ปฏิจฺจ กิเลสวิปฺปยุตฺโต นสํกิเลสิโก ธมฺโม อุปฺปชฺชติ เหตุปจฺจยา. กิเลสวิปฺปยุตฺตํ นสํกิเลสิกํ ธมฺมํ ปฏิจฺจ กิเลสวิปฺปยุตฺโต นอสํกิเลสิโก ธมฺโม อุปฺปชฺชติ เหตุปจฺจยา. กิเลสวิปฺปยุตฺตํ นสํกิเลสิกํ ธมฺมํ ปฏิจฺจ กิเลสวิปฺปยุตฺโต นสํกิเลสิโก จ กิเลสวิปฺปยุตฺโต นอสํกิเลสิโก จ ธมฺมา อุปฺปชฺชนฺติ เหตุปจฺจยา. (๓)

กิเลสวิปฺปยุตฺตํ นอสํกิเลสิกํ ธมฺมํ ปฏิจฺจ กิเลสวิปฺปยุตฺโต นอสํกิเลสิโก ธมฺโม อุปฺปชฺชติ เหตุปจฺจยา. (๑)

กิเลสวิปฺปยุตฺตํ นสํกิเลสิกญฺจ กิเลสวิปฺปยุตฺตํ นอสํกิเลสิกญฺจ ธมฺมํ ปฏิจฺจ กิเลสวิปฺปยุตฺโต นอสํกิเลสิโก ธมฺโม อุปฺปชฺชติ เหตุปจฺจยา. (๑) (สํขิตฺตํ.)

เหตุยา ปญฺจ. (สพฺพตฺถ วิตฺถาโร.)