๓๑. คนฺถวิปฺปยุตฺตคนฺถนิยทุกํ

๔๕. คนฺถวิปฺปยุตฺตํ นคนฺถนิยํ ธมฺมํ ปฏิจฺจ คนฺถวิปฺปยุตฺโต นคนฺถนิโย ธมฺโม อุปฺปชฺชติ เหตุปจฺจยา. คนฺถวิปฺปยุตฺตํ นคนฺถนิยํ ธมฺมํ ปฏิจฺจ คนฺถวิปฺปยุตฺโต นอคนฺถนิโย ธมฺโม อุปฺปชฺชติ เหตุปจฺจยา. คนฺถวิปฺปยุตฺตํ นคนฺถนิยํ ธมฺมํ ปฏิจฺจ คนฺถวิปฺปยุตฺโต นคนฺถนิโย จ คนฺถวิปฺปยุตฺโต นอคนฺถนิโย จ ธมฺมา อุปฺปชฺชนฺติ เหตุปจฺจยา. (๓)

คนฺถวิปฺปยุตฺตํ นอคนฺถนิยํ ธมฺมํ ปฏิจฺจ คนฺถวิปฺปยุตฺโต นอคนฺถนิโย ธมฺโม อุปฺปชฺชติ เหตุปจฺจยา. (๑)

คนฺถวิปฺปยุตฺตํ นคนฺถนิยญฺจ คนฺถวิปฺปยุตฺตํ นอคนฺถนิยญฺจ ธมฺมํ ปฏิจฺจ คนฺถวิปฺปยุตฺโต นอคนฺถนิโย ธมฺโม อุปฺปชฺชติ เหตุปจฺจยา. (๑) (สํขิตฺตํ.)

เหตุยา ปญฺจ, อารมฺมเณ เทฺว…เป… อวิคเต ปญฺจ. (สพฺพตฺถ วิตฺถาโร.)

คนฺถโคจฺฉกํ นิฏฺฐิตํ.