๑-๗. ปฏิจฺจวาราทิ

๓๓. อาสววิปฺปยุตฺตํ นสาสวํ ธมฺมํ ปฏิจฺจ อาสววิปฺปยุตฺโต นสาสโว ธมฺโม อุปฺปชฺชติ เหตุปจฺจยา. อาสววิปฺปยุตฺตํ นสาสวํ ธมฺมํ ปฏิจฺจ อาสววิปฺปยุตฺโต นอนาสโว ธมฺโม อุปฺปชฺชติ เหตุปจฺจยา. อาสววิปฺปยุตฺตํ นสาสวํ ธมฺมํ ปฏิจฺจ อาสววิปฺปยุตฺโต นสาสโว จ อาสววิปฺปยุตฺโต นอนาสโว จ ธมฺมา อุปฺปชฺชนฺติ เหตุปจฺจยา. (๓)

อาสววิปฺปยุตฺตํ นอนาสวํ ธมฺมํ ปฏิจฺจ อาสววิปฺปยุตฺโต นอนาสโว ธมฺโม อุปฺปชฺชติ เหตุปจฺจยา. (๑)

อาสววิปฺปยุตฺตํ นสาสวญฺจ อาสววิปฺปยุตฺตํ นอนาสวญฺจ ธมฺมํ ปฏิจฺจ อาสววิปฺปยุตฺโต นอนาสโว ธมฺโม อุปฺปชฺชติ เหตุปจฺจยา. (สํขิตฺตํ.)

เหตุยา ปญฺจ, อารมฺมเณ เทฺว…เป… อวิคเต ปญฺจ. (สพฺพตฺถ วิตฺถาโร.)

อาสวโคจฺฉกํ นิฏฺฐิตํ.