๑-๗. ปฏิจฺจวาราทิ

ปจฺจยจตุกฺกํ

เหตุปจฺจโย

๑๒. เหตุํ เหตุสมฺปยุตฺตํ ธมฺมํ ปฏิจฺจ เหตุ เหตุสมฺปยุตฺโต ธมฺโม อุปฺปชฺชติ เหตุปจฺจยา. เหตุํ เหตุสมฺปยุตฺตํ ธมฺมํ ปฏิจฺจ นเหตุ เหตุสมฺปยุตฺโต ธมฺโม อุปฺปชฺชติ เหตุปจฺจยา. เหตุํ เหตุสมฺปยุตฺตํ ธมฺมํ ปฏิจฺจ เหตุ เหตุสมฺปยุตฺโต จ นเหตุ เหตุสมฺปยุตฺโต จ ธมฺมา อุปฺปชฺชนฺติ เหตุปจฺจยา. (๓)

นเหตุํ เหตุสมฺปยุตฺตํ ธมฺมํ ปฏิจฺจ นเหตุ เหตุสมฺปยุตฺโต ธมฺโม อุปฺปชฺชติ เหตุปจฺจยา… ตีณิ.

เหตุํ เหตุสมฺปยุตฺตญฺจ นเหตุํ เหตุสมฺปยุตฺตญฺจ ธมฺมํ ปฏิจฺจ เหตุ เหตุสมฺปยุตฺโต ธมฺโม อุปฺปชฺชติ เหตุปจฺจยา… ตีณิ. (สํขิตฺตํ.)

๑๓. เหตุยา นว, อารมฺมเณ นว…เป… อวิคเต นว. (สํขิตฺตํ.)

๑๔. เหตุ เหตุสมฺปยุตฺโต ธมฺโม เหตุสฺส เหตุสมฺปยุตฺตสฺส ธมฺมสฺส เหตุปจฺจเยน ปจฺจโย… ตีณิ. (สํขิตฺตํ.)

เหตุยา ตีณิ…เป… อวิคเต นว. (สํขิตฺตํ.)

(ยถา กุสลตฺติเก ปญฺหาวารํ, เอวํ วิตฺถาเรตพฺพํ.)

๑๕. เหตุํ เหตุวิปฺปยุตฺตํ ธมฺมํ ปฏิจฺจ นเหตุ เหตุวิปฺปยุตฺโต ธมฺโม อุปฺปชฺชติ เหตุปจฺจยา. (๑)

นเหตุํ เหตุวิปฺปยุตฺตํ ธมฺมํ ปฏิจฺจ นเหตุ เหตุวิปฺปยุตฺโต ธมฺโม อุปฺปชฺชติ เหตุปจฺจยา. (๑)

เหตุํ เหตุวิปฺปยุตฺตญฺจ นเหตุํ เหตุวิปฺปยุตฺตญฺจ ธมฺมํ ปฏิจฺจ นเหตุ เหตุวิปฺปยุตฺโต ธมฺโม อุปฺปชฺชติ เหตุปจฺจยา. (๑) (สํขิตฺตํ.)

เหตุยา ตีณิ, อารมฺมเณ เอกํ…เป… อวิคเต ตีณิ.

(สหชาตวารมฺปิ…เป… สมฺปยุตฺตวารมฺปิ ปฏิจฺจวารสทิสํ วิตฺถาเรตพฺพํ.)

๑๖. เหตุ เหตุวิปฺปยุตฺโต ธมฺโม นเหตุสฺส เหตุวิปฺปยุตฺตสฺส ธมฺมสฺส เหตุปจฺจเยน ปจฺจโย. (สํขิตฺตํ.)

เหตุยา เอกํ, อารมฺมเณ จตฺตาริ…เป… อวิคเต จตฺตาริ. (สํขิตฺตํ.)

(ยถา กุสลตฺติเก ปญฺหาวารํ, เอวํ วิตฺถาเรตพฺพํ.)