๑-๔-๖. กุสลตฺติก-เหตุสเหตุกาทิทุกานิ

๖. นกุสลํ นเหตุญฺเจว นอเหตุกญฺจ ธมฺมํ ปฏิจฺจ อกุสโล เหตุ เจว สเหตุโก จ ธมฺโม อุปฺปชฺชติ เหตุปจฺจยา. นกุสลํ นเหตุญฺเจว นอเหตุกญฺจ ธมฺมํ ปฏิจฺจ อพฺยากโต เหตุ เจว สเหตุโก จ ธมฺโม อุปฺปชฺชติ เหตุปจฺจยา. เทฺว.

(นอกุสเล เทฺว, นอพฺยากเต เทฺว. ปฐมํ คณิตเกน เอกํ, ทุติยํ คณิตเกน เอกํ, ตติยํ คณิตเกน เอกํ, สพฺพตฺถ นว ปญฺหา.)

นกุสลํ นอเหตุกญฺเจว น จ เหตุํ ธมฺมํ ปฏิจฺจ อกุสโล สเหตุโก เจว น จ เหตุ ธมฺโม อุปฺปชฺชติ เหตุปจฺจยา… เหตุยา นว.

๗. นกุสลํ นเหตุญฺเจว นเหตุวิปฺปยุตฺตญฺจ ธมฺมํ ปฏิจฺจ อกุสโล เหตุ เจว เหตุสมฺปยุตฺโต จ ธมฺโม อุปฺปชฺชติ เหตุปจฺจยา… เหตุยา นว.

นกุสลํ นเหตุวิปฺปยุตฺตญฺเจว นนเหตุญฺจ ธมฺมํ ปฏิจฺจ อกุสโล เหตุสมฺปยุตฺโต เจว น จ เหตุ ธมฺโม อุปฺปชฺชติ เหตุปจฺจยา… เหตุยา นว.

๘. นกุสลํ นเหตุํ นสเหตุกํ ธมฺมํ ปฏิจฺจ อพฺยากโต นเหตุ สเหตุโก ธมฺโม อุปฺปชฺชติ เหตุปจฺจยา… เหตุยา ตีณิ.

๙. นกุสลํ นเหตุํ นอเหตุกํ ธมฺมํ ปฏิจฺจ อกุสโล นเหตุ อเหตุโก ธมฺโม อุปฺปชฺชติ เหตุปจฺจยา. (๑)

นอกุสลํ นเหตุํ นอเหตุกํ ธมฺมํ ปฏิจฺจ อพฺยากโต นเหตุ อเหตุโก ธมฺโม อุปฺปชฺชติ เหตุปจฺจยา. (๑)

นอพฺยากตํ นเหตุํ นอเหตุกํ ธมฺมํ ปฏิจฺจ อพฺยากโต นเหตุ อเหตุโก ธมฺโม อุปฺปชฺชติ เหตุปจฺจยา. (๑) (คณิตเกน ตีณิ ปญฺหา.)… เหตุยา ฉ.