๑-๕. กุสลตฺติก-เหตุเหตุสมฺปยุตฺตทุกํ

๑๓. กุสลํ เหตุญฺเจว เหตุสมฺปยุตฺตญฺจ ธมฺมํ ปฏิจฺจ นอกุสโล นเหตุ เจว นเหตุวิปฺปยุตฺโต จ ธมฺโม อุปฺปชฺชติ เหตุปจฺจยา. กุสลํ เหตุญฺเจว เหตุสมฺปยุตฺตญฺจ ธมฺมํ ปฏิจฺจ นอพฺยากโต นเหตุ เจว นเหตุวิปฺปยุตฺโต จ ธมฺโม อุปฺปชฺชติ เหตุปจฺจยา. กุสลํ เหตุญฺเจว เหตุสมฺปยุตฺตญฺจ ธมฺมํ ปฏิจฺจ นอกุสโล นเหตุ เจว นเหตุวิปฺปยุตฺโต จ นอพฺยากโต นเหตุ เจว นเหตุวิปฺปยุตฺโต จ ธมฺมา อุปฺปชฺชนฺติ เหตุปจฺจยา. ตีณิ.

(อกุสลํ ตีณิ กาตพฺพํ, อพฺยากตํ ตีณิ กาตพฺพํ.)

เหตุยา นว.

๑๔. กุสลํ เหตุสมฺปยุตฺตญฺเจว น จ เหตุํ ธมฺมํ ปฏิจฺจ นอกุสโล นเหตุวิปฺปยุตฺโต เจว นนเหตุ จ ธมฺโม อุปฺปชฺชติ เหตุปจฺจยา. กุสลํ เหตุสมฺปยุตฺตญฺเจว น จ เหตุํ ธมฺมํ ปฏิจฺจ นอพฺยากโต นเหตุวิปฺปยุตฺโต เจว นนเหตุ จ ธมฺโม อุปฺปชฺชติ เหตุปจฺจยา. กุสลํ เหตุสมฺปยุตฺตญฺเจว น จ เหตุํ ธมฺมํ ปฏิจฺจ นอกุสโล นเหตุวิปฺปยุตฺโต เจว นนเหตุ จ นอพฺยากโต นเหตุวิปฺปยุตฺโต เจว นนเหตุ จ ธมฺมา อุปฺปชฺชนฺติ เหตุปจฺจยา. ตีณิ.

อกุสลํ เหตุสมฺปยุตฺตญฺเจว น จ เหตุํ ธมฺมํ ปฏิจฺจ… ตีณิ. อพฺยากตํ… ตีณิ. เหตุยา นว.