๑-๗. ปฏิจฺจวาราทิ

ปจฺจยจตุกฺกํ

๑๓. อพฺยากตํ วิปากํ ธมฺมํ ปฏิจฺจ อพฺยากโต วิปาโก ธมฺโม อุปฺปชฺชติ เหตุปจฺจยา. (สํขิตฺตํ.)

เหตุยา เอกํ, อารมฺมเณ เอกํ…เป… อวิคเต เอกํ. (สํขิตฺตํ.)

(สหชาตวาเรปิ…เป… ปญฺหาวาเรปิ สพฺพตฺถ เอกํ.)

๑๔. กุสลํ วิปากธมฺมธมฺมํ ปฏิจฺจ กุสโล วิปากธมฺมธมฺโม อุปฺปชฺชติ เหตุปจฺจยา. (๑)

อกุสลํ วิปากธมฺมธมฺมํ ปฏิจฺจ อกุสโล วิปากธมฺมธมฺโม อุปฺปชฺชติ เหตุปจฺจยา. (๑) (สํขิตฺตํ.)

เหตุยา เทฺว, อารมฺมเณ เทฺว…เป… อวิคเต เทฺว. (สํขิตฺตํ.)

(สหชาตวารมฺปิ…เป… สมฺปยุตฺตวารมฺปิ ปฏิจฺจวารสทิสํ.)

๑๕. กุสโล วิปากธมฺมธมฺโม กุสลสฺส วิปากธมฺมธมฺมสฺส เหตุปจฺจเยน ปจฺจโย. (๑)

อกุสโล วิปากธมฺมธมฺโม อกุสลสฺส วิปากธมฺมธมฺมสฺส เหตุปจฺจเยน ปจฺจโย. (๑)

กุสโล วิปากธมฺมธมฺโม กุสลสฺส วิปากธมฺมธมฺมสฺส อารมฺมณปจฺจเยน ปจฺจโย. กุสโล วิปากธมฺมธมฺโม อกุสลสฺส วิปากธมฺมธมฺมสฺส อารมฺมณปจฺจเยน ปจฺจโย. (๒)

อกุสโล วิปากธมฺมธมฺโม อกุสลสฺส วิปากธมฺมธมฺมสฺส อารมฺมณปจฺจเยน ปจฺจโย. อกุสโล วิปากธมฺมธมฺโม กุสลสฺส วิปากธมฺมธมฺมสฺส อารมฺมณปจฺจเยน ปจฺจโย. (๒) (สํขิตฺตํ.)

๑๖. เหตุยา เทฺว, อารมฺมเณ จตฺตาริ, อธิปติยา ตีณิ, อนนฺตเร เทฺว…เป… สหชาเต เทฺว, อุปนิสฺสเย จตฺตาริ…เป… อวิคเต เทฺว. (สํขิตฺตํ. ยถา กุสลตฺติเก ปญฺหาวารํ เอวํ วิตฺถาเรตพฺพํ.)

๑๗. อพฺยากตํ เนววิปากนวิปากธมฺมธมฺมํ ปฏิจฺจ อพฺยากโต เนววิปากนวิปากธมฺมธมฺโม อุปฺปชฺชติ เหตุปจฺจยา. (สํขิตฺตํ.)

เหตุยา เอกํ, อารมฺมเณ เอกํ…เป… อวิคเต เอกํ. (สํขิตฺตํ.)

(สหชาตวาเรปิ…เป… ปญฺหาวาเรปิ สพฺพตฺถ เอกํ.)