๑-๗. ปฏิจฺจวาราทิ

เหตุปจฺจโย

๙๖. สวิตกฺกสวิจารํ กุสลํ ธมฺมํ ปฏิจฺจ สวิตกฺกสวิจาโร กุสโล ธมฺโม อุปฺปชฺชติ เหตุปจฺจยา… ตีณิ.

อวิตกฺกวิจารมตฺตํ กุสลํ ธมฺมํ ปฏิจฺจ อวิตกฺกวิจารมตฺโต กุสโล ธมฺโม อุปฺปชฺชติ เหตุปจฺจยา… จตฺตาริ.

อวิตกฺกอวิจารํ กุสลํ ธมฺมํ ปฏิจฺจ อวิตกฺกอวิจาโร กุสโล ธมฺโม อุปฺปชฺชติ เหตุปจฺจยา. (๑)

อวิตกฺกอวิจารํ กุสลํ ธมฺมํ ปฏิจฺจ อวิตกฺกวิจารมตฺโต กุสโล ธมฺโม อุปฺปชฺชติ เหตุปจฺจยา. (๑)

อวิตกฺกวิจารมตฺตํ กุสลญฺจ อวิตกฺกอวิจารํ กุสลญฺจ ธมฺมํ…เป… สวิตกฺกสวิจารํ กุสลญฺจ อวิตกฺกวิจารมตฺตํ กุสลญฺจ ธมฺมํ ปฏิจฺจ สวิตกฺกสวิจาโร กุสโล ธมฺโม อุปฺปชฺชติ เหตุปจฺจยา. (๑)

เหตุยา เอกาทส.

๙๗. สวิตกฺกสวิจารํ อกุสลํ ธมฺมํ ปฏิจฺจ สวิตกฺกสวิจาโร อกุสโล ธมฺโม อุปฺปชฺชติ เหตุปจฺจยา… ตีณิ.

อวิตกฺกวิจารมตฺตํ อกุสลํ ธมฺมํ ปฏิจฺจ สวิตกฺกสวิจาโร อกุสโล ธมฺโม อุปฺปชฺชติ เหตุปจฺจยา. (๑)

สวิตกฺกสวิจารํ อกุสลญฺจ อวิตกฺกวิจารมตฺตํ อกุสลญฺจ ธมฺมํ ปฏิจฺจ สวิตกฺกสวิจาโร อกุสโล ธมฺโม อุปฺปชฺชติ เหตุปจฺจยา. (๑)

เหตุยา ปญฺจ.

๙๘. สวิตกฺกสวิจารํ อพฺยากตํ ธมฺมํ ปฏิจฺจ สวิตกฺกสวิจาโร อพฺยากโต ธมฺโม อุปฺปชฺชติ เหตุปจฺจยา.

เหตุยา สตฺตตึส.