๑-๗. ปฏิจฺจวาราทิ

เหตุปจฺจโย

๙๓. อนุปาทินฺนุปาทานิยํ กุสลํ ธมฺมํ ปฏิจฺจ อนุปาทินฺนุปาทานิโย กุสโล ธมฺโม อุปฺปชฺชติ เหตุปจฺจยา.

อนุปาทินฺนอนุปาทานิยํ กุสลํ ธมฺมํ ปฏิจฺจ อนุปาทินฺนอนุปาทานิโย กุสโล ธมฺโม อุปฺปชฺชติ เหตุปจฺจยา. (๑) (สํขิตฺตํ.)

เหตุยา เทฺว. (สพฺพตฺถ วิตฺถาโร.)

อนุปาทินฺนุปาทานิยํ อกุสลํ ธมฺมํ ปฏิจฺจ อนุปาทินฺนุปาทานิโย อกุสโล ธมฺโม อุปฺปชฺชติ เหตุปจฺจยา. (สพฺพตฺถ เอกํ. สพฺพตฺถ วิตฺถาโร.)

๙๔. อุปาทินฺนุปาทานิยํ อพฺยากตํ ธมฺมํ ปฏิจฺจ อุปาทินฺนุปาทานิโย อพฺยากโต ธมฺโม อุปฺปชฺชติ เหตุปจฺจยา… ตีณิ. (สพฺพตฺถ วิตฺถาโร.)

อนุปาทินฺนุปาทานิยํ อพฺยากตํ ธมฺมํ ปฏิจฺจ อนุปาทินฺนุปาทานิโย อพฺยากโต ธมฺโม อุปฺปชฺชติ เหตุปจฺจยา… ตีณิ.

อนุปาทินฺนอนุปาทานิยํ อพฺยากตํ ธมฺมํ ปฏิจฺจ อนุปาทินฺนอนุปาทานิโย อพฺยากโต ธมฺโม อุปฺปชฺชติ เหตุปจฺจยา. (๑)

อนุปาทินฺนุปาทานิยํ อพฺยากตญฺจ อนุปาทินฺนอนุปาทานิยํ อพฺยากตญฺจ ธมฺมํ ปฏิจฺจ อนุปาทินฺนุปาทานิโย อพฺยากโต ธมฺโม อุปฺปชฺชติ เหตุปจฺจยา. (๑)

อุปาทินฺนุปาทานิยํ อพฺยากตญฺจ อนุปาทินฺนุปาทานิยํ อพฺยากตญฺจ ธมฺมํ ปฏิจฺจ อนุปาทินฺนุปาทานิโย อพฺยากโต ธมฺโม อุปฺปชฺชติ เหตุปจฺจยา. (๑) (สํขิตฺตํ.)

เหตุยา นว. (สพฺพตฺถ วิตฺถาโร.)