๓. อพฺยากตปทํ

เหตุปจฺจโย

๑๖. สาสวํ อพฺยากตํ ธมฺมํ ปฏิจฺจ สาสโว อพฺยากโต ธมฺโม อุปฺปชฺชติ เหตุปจฺจยา. (๑)

อนาสวํ อพฺยากตํ ธมฺมํ ปฏิจฺจ อนาสโว อพฺยากโต ธมฺโม อุปฺปชฺชติ เหตุปจฺจยา. อนาสวํ อพฺยากตํ ธมฺมํ ปฏิจฺจ สาสโว อพฺยากโต ธมฺโม อุปฺปชฺชติ เหตุปจฺจยา. อนาสวํ อพฺยากตํ ธมฺมํ ปฏิจฺจ สาสโว อพฺยากโต จ อนาสโว อพฺยากโต จ ธมฺมา อุปฺปชฺชนฺติ เหตุปจฺจยา. (๓)

สาสวํ อพฺยากตญฺจ อนาสวํ อพฺยากตญฺจ ธมฺมํ ปฏิจฺจ สาสโว อพฺยากโต ธมฺโม อุปฺปชฺชติ เหตุปจฺจยา. (๑) (สํขิตฺตํ.)

๑๗. เหตุยา ปญฺจ, อารมฺมเณ เทฺว, อธิปติยา ปญฺจ…เป… อาเสวเน เอกํ…เป… วิปาเก ปญฺจ…เป… อวิคเต ปญฺจ (สํขิตฺตํ).

นเหตุยา เอกํ, นอารมฺมเณ ตีณิ, นอธิปติยา เทฺว, นปุเรชาเต จตฺตาริ, นปจฺฉาชาเต นอาเสวเน ปญฺจ, นกมฺเม…เป… นมคฺเค เอกํ…เป… นวิปฺปยุตฺเต เทฺว…เป… โนวิคเต ตีณิ (สํขิตฺตํ).

(สหชาตวาโรปิ…เป… สมฺปยุตฺตวาโรปิ สพฺพตฺถ วิตฺถาเรตพฺโพ.)