อปริยาปนฺนปทํ

เหตุ-อารมฺมณปจฺจยา

๔๕. กุสลํ อปริยาปนฺนํ ธมฺมํ ปฏิจฺจ กุสโล อปริยาปนฺโน ธมฺโม อุปฺปชฺชติ เหตุปจฺจยา. (๑)

อพฺยากตํ อปริยาปนฺนํ ธมฺมํ ปฏิจฺจ อพฺยากโต อปริยาปนฺโน ธมฺโม อุปฺปชฺชติ เหตุปจฺจยา. (๑) (สํขิตฺตํ.)

เหตุยา เทฺว, อารมฺมเณ เทฺว…เป… อวิคเต เทฺว (สํขิตฺตํ.) (สหชาตวารมฺปิ…เป… สมฺปยุตฺตวารมฺปิ ปฏิจฺจวารสทิสํ).

๔๖. กุสโล อปริยาปนฺโน ธมฺโม กุสลสฺส อปริยาปนฺนสฺส ธมฺมสฺส เหตุปจฺจเยน ปจฺจโย. (๑)

อพฺยากโต อปริยาปนฺโน ธมฺโม อพฺยากตสฺส อปริยาปนฺนสฺส ธมฺมสฺส เหตุปจฺจเยน ปจฺจโย. (๑)

อพฺยากโต อปริยาปนฺโน ธมฺโม อพฺยากตสฺส อปริยาปนฺนสฺส ธมฺมสฺส อารมฺมณปจฺจเยน ปจฺจโย. อพฺยากโต อปริยาปนฺโน ธมฺโม กุสลสฺส อปริยาปนฺนสฺส ธมฺมสฺส อารมฺมณปจฺจเยน ปจฺจโย. (๒)

๔๗. เหตุยา เทฺว, อารมฺมเณ เทฺว, อธิปติยา ตีณิ, อนนฺตเร เทฺว…เป… อุปนิสฺสเย จตฺตาริ…เป… อวิคเต เทฺว. (สํขิตฺตํ.)

(ยถา กุสลตฺติเก ปญฺหาวารํ, เอวํ วิตฺถาเรตพฺพํ.)