๑-๗. ปฏิจฺจวาราทิ

ปจฺจยจตุกฺกํ

เหตุปจฺจโย

๔๑. กุสลํ ปริยาปนฺนํ ธมฺมํ ปฏิจฺจ กุสโล ปริยาปนฺโน ธมฺโม อุปฺปชฺชติ เหตุปจฺจยา… ตีณิ.

อกุสลํ ปริยาปนฺนํ ธมฺมํ ปฏิจฺจ อกุสโล ปริยาปนฺโน ธมฺโม อุปฺปชฺชติ เหตุปจฺจยา… ตีณิ.

อพฺยากตํ ปริยาปนฺนํ ธมฺมํ ปฏิจฺจ อพฺยากโต ปริยาปนฺโน ธมฺโม อุปฺปชฺชติ เหตุปจฺจยา. (๑)

กุสลํ ปริยาปนฺนญฺจ อพฺยากตํ ปริยาปนฺนญฺจ ธมฺมํ ปฏิจฺจ อพฺยากโต ปริยาปนฺโน ธมฺโม อุปฺปชฺชติ เหตุปจฺจยา. (๑)

อกุสลํ ปริยาปนฺนญฺจ อพฺยากตํ ปริยาปนฺนญฺจ ธมฺมํ ปฏิจฺจ อพฺยากโต ปริยาปนฺโน ธมฺโม อุปฺปชฺชติ เหตุปจฺจยา. (๑) (สํขิตฺตํ.)

๔๒. เหตุยา นว, อารมฺมเณ ตีณิ…เป… วิปาเก เอกํ…เป… อวิคเต นว (สํขิตฺตํ. สหชาตวารมฺปิ…เป… สมฺปยุตฺตวารมฺปิ ปฏิจฺจวารสทิสํ).

๔๓. กุสโล ปริยาปนฺโน ธมฺโม กุสลสฺส ปริยาปนฺนสฺส ธมฺมสฺส เหตุปจฺจเยน ปจฺจโย… ตีณิ.

อกุสโล ปริยาปนฺโน ธมฺโม อกุสลสฺส ปริยาปนฺนสฺส ธมฺมสฺส เหตุปจฺจเยน ปจฺจโย… ตีณิ.

อพฺยากโต ปริยาปนฺโน ธมฺโม อพฺยากตสฺส ปริยาปนฺนสฺส ธมฺมสฺส เหตุปจฺจเยน ปจฺจโย. (๑) (สํขิตฺตํ.)

๔๔. เหตุยา สตฺต, อารมฺมเณ นว, อธิปติยา นว…เป… อวิคเต เตรส (สํขิตฺตํ. ยถา กุสลตฺติเก ปญฺหาวารํ, เอวํ วิตฺถาเรตพฺพํ).

อปริยาปนฺนปทํ

เหตุ-อารมฺมณปจฺจยา

๔๕. กุสลํ อปริยาปนฺนํ ธมฺมํ ปฏิจฺจ กุสโล อปริยาปนฺโน ธมฺโม อุปฺปชฺชติ เหตุปจฺจยา. (๑)

อพฺยากตํ อปริยาปนฺนํ ธมฺมํ ปฏิจฺจ อพฺยากโต อปริยาปนฺโน ธมฺโม อุปฺปชฺชติ เหตุปจฺจยา. (๑) (สํขิตฺตํ.)

เหตุยา เทฺว, อารมฺมเณ เทฺว…เป… อวิคเต เทฺว (สํขิตฺตํ.) (สหชาตวารมฺปิ…เป… สมฺปยุตฺตวารมฺปิ ปฏิจฺจวารสทิสํ).

๔๖. กุสโล อปริยาปนฺโน ธมฺโม กุสลสฺส อปริยาปนฺนสฺส ธมฺมสฺส เหตุปจฺจเยน ปจฺจโย. (๑)

อพฺยากโต อปริยาปนฺโน ธมฺโม อพฺยากตสฺส อปริยาปนฺนสฺส ธมฺมสฺส เหตุปจฺจเยน ปจฺจโย. (๑)

อพฺยากโต อปริยาปนฺโน ธมฺโม อพฺยากตสฺส อปริยาปนฺนสฺส ธมฺมสฺส อารมฺมณปจฺจเยน ปจฺจโย. อพฺยากโต อปริยาปนฺโน ธมฺโม กุสลสฺส อปริยาปนฺนสฺส ธมฺมสฺส อารมฺมณปจฺจเยน ปจฺจโย. (๒)

๔๗. เหตุยา เทฺว, อารมฺมเณ เทฺว, อธิปติยา ตีณิ, อนนฺตเร เทฺว…เป… อุปนิสฺสเย จตฺตาริ…เป… อวิคเต เทฺว. (สํขิตฺตํ.)

(ยถา กุสลตฺติเก ปญฺหาวารํ, เอวํ วิตฺถาเรตพฺพํ.)