๗. ปญฺหาวาโร

ปจฺจยจตุกฺกํ

เหตุอารมฺมณปจฺจยาทิ

๖๖. สํกิลิฏฺฐสํกิเลสิโก เหตุ ธมฺโม สํกิลิฏฺฐสํกิเลสิกสฺส เหตุสฺส ธมฺมสฺส เหตุปจฺจเยน ปจฺจโย. (๑)

อสํกิลิฏฺฐสํกิเลสิโก เหตุ ธมฺโม อสํกิลิฏฺฐสํกิเลสิกสฺส เหตุสฺส ธมฺมสฺส เหตุปจฺจเยน ปจฺจโย. (๑)

อสํกิลิฏฺฐอสํกิเลสิโก เหตุ ธมฺโม อสํกิลิฏฺฐอสํกิเลสิกสฺส เหตุสฺส ธมฺมสฺส เหตุปจฺจเยน ปจฺจโย. (๑)

๖๗. สํกิลิฏฺฐสํกิเลสิโก เหตุ ธมฺโม สํกิลิฏฺฐสํกิเลสิกสฺส เหตุสฺส ธมฺมสฺส อารมฺมณปจฺจเยน ปจฺจโย… เทฺว.

อสํกิลิฏฺฐสํกิเลสิโก เหตุ ธมฺโม อสํกิลิฏฺฐสํกิเลสิกสฺส เหตุสฺส ธมฺมสฺส อารมฺมณปจฺจเยน ปจฺจโย… เทฺว.

อสํกิลิฏฺฐอสํกิเลสิโก เหตุ ธมฺโม อสํกิลิฏฺฐสํกิเลสิกสฺส เหตุสฺส ธมฺมสฺส อารมฺมณปจฺจเยน ปจฺจโย. (๑)

๖๘. สํกิลิฏฺฐสํกิเลสิโก เหตุ ธมฺโม สํกิลิฏฺฐสํกิเลสิกสฺส เหตุสฺส ธมฺมสฺส อธิปติปจฺจเยน ปจฺจโย. (๑)

อสํกิลิฏฺฐสํกิเลสิโก เหตุ ธมฺโม อสํกิลิฏฺฐสํกิเลสิกสฺส เหตุสฺส ธมฺมสฺส อธิปติปจฺจเยน ปจฺจโย. อสํกิลิฏฺฐสํกิเลสิโก เหตุ ธมฺโม สํกิลิฏฺฐสํกิเลสิกสฺส เหตุสฺส ธมฺมสฺส อธิปติปจฺจเยน ปจฺจโย. (๒)

อสํกิลิฏฺฐอสํกิเลสิโก เหตุ ธมฺโม อสํกิลิฏฺฐอสํกิเลสิกสฺส เหตุสฺส ธมฺมสฺส อธิปติปจฺจเยน ปจฺจโย… เทฺว.

๖๙. สํกิลิฏฺฐสํกิเลสิโก เหตุ ธมฺโม สํกิลิฏฺฐสํกิเลสิกสฺส เหตุสฺส ธมฺมสฺส อนนฺตรปจฺจเยน ปจฺจโย… ฉ…เป….

สํกิลิฏฺฐสํกิเลสิโก เหตุ ธมฺโม สํกิลิฏฺฐสํกิเลสิกสฺส เหตุสฺส ธมฺมสฺส อุปนิสฺสยปจฺจเยน ปจฺจโย. สํกิลิฏฺฐสํกิเลสิโก เหตุ ธมฺโม อสํกิลิฏฺฐสํกิเลสิกสฺส เหตุสฺส ธมฺมสฺส อุปนิสฺสยปจฺจเยน ปจฺจโย. สํกิลิฏฺฐสํกิเลสิโก เหตุ ธมฺโม อสํกิลิฏฺฐอสํกิเลสิกสฺส เหตุสฺส ธมฺมสฺส อุปนิสฺสยปจฺจเยน ปจฺจโย. (๑)

อสํกิลิฏฺฐสํกิเลสิโก เหตุ ธมฺโม อสํกิลิฏฺฐสํกิเลสิกสฺส เหตุสฺส ธมฺมสฺส อุปนิสฺสยปจฺจเยน ปจฺจโย… ตีณิ.

อสํกิลิฏฺฐอสํกิเลสิโก เหตุ ธมฺโม อสํกิลิฏฺฐอสํกิเลสิกสฺส เหตุสฺส ธมฺมสฺส อุปนิสฺสยปจฺจเยน ปจฺจโย… เทฺว (สํขิตฺตํ).

๗๐. เหตุยา ตีณิ, อารมฺมเณ ปญฺจ, อธิปติยา ปญฺจ, อนนฺตเร ฉ, สมนนฺตเร ฉ, สหชาเต ตีณิ, อญฺญมญฺเญ ตีณิ, นิสฺสเย ตีณิ, อุปนิสฺสเย อฏฺฐ, อาเสวเน ตีณิ, วิปาเก เทฺว, อินฺทฺริเย เทฺว…เป… อวิคเต ตีณิ (สํขิตฺตํ).

นเหตุยา อฏฺฐ, นอารมฺมเณ อฏฺฐ (สํขิตฺตํ).

เหตุปจฺจยา นอารมฺมเณ ตีณิ (สํขิตฺตํ).

นเหตุปจฺจยา อารมฺมเณ ปญฺจ (สํขิตฺตํ).

(ยถา กุสลตฺติเก ปญฺหาวารํ, เอวํ วิตฺถาเรตพฺพํ.)

นเหตุปทปจฺจยจตุกฺกํ

๗๑. สํกิลิฏฺฐสํกิเลสิกํ นเหตุํ ธมฺมํ ปฏิจฺจ สํกิลิฏฺฐสํกิเลสิโก นเหตุ ธมฺโม อุปฺปชฺชติ เหตุปจฺจยา. สํกิลิฏฺฐสํกิเลสิกํ นเหตุํ ธมฺมํ ปฏิจฺจ อสํกิลิฏฺฐสํกิเลสิโก นเหตุ ธมฺโม อุปฺปชฺชติ เหตุปจฺจยา. สํกิลิฏฺฐสํกิเลสิกํ นเหตุํ ธมฺมํ ปฏิจฺจ สํกิลิฏฺฐสํกิเลสิโก นเหตุ จ อสํกิลิฏฺฐสํกิเลสิโก นเหตุ จ ธมฺมา อุปฺปชฺชนฺติ เหตุปจฺจยา. (๓)

อสํกิลิฏฺฐสํกิเลสิกํ นเหตุํ ธมฺมํ ปฏิจฺจ อสํกิลิฏฺฐสํกิเลสิโก นเหตุ ธมฺโม อุปฺปชฺชติ เหตุปจฺจยา. (๑)

อสํกิลิฏฺฐอสํกิเลสิกํ นเหตุํ ธมฺมํ ปฏิจฺจ อสํกิลิฏฺฐอสํกิเลสิโก นเหตุ ธมฺโม อุปฺปชฺชติ เหตุปจฺจยา… ตีณิ.

สํกิลิฏฺฐสํกิเลสิกํ นเหตุญฺจ อสํกิลิฏฺฐสํกิเลสิกํ นเหตุญฺจ ธมฺมํ ปฏิจฺจ อสํกิลิฏฺฐสํกิเลสิโก นเหตุ ธมฺโม อุปฺปชฺชติ เหตุปจฺจยา. (๑)

อสํกิลิฏฺฐสํกิเลสิกํ นเหตุญฺจ อสํกิลิฏฺฐอสํกิเลสิกํ นเหตุญฺจ ธมฺมํ ปฏิจฺจ อสํกิลิฏฺฐสํกิเลสิโก นเหตุ ธมฺโม อุปฺปชฺชติ เหตุปจฺจยา. (๑)

๗๒. สํกิลิฏฺฐสํกิเลสิกํ นเหตุํ ธมฺมํ ปฏิจฺจ สํกิลิฏฺฐสํกิเลสิโก นเหตุ ธมฺโม อุปฺปชฺชติ อารมฺมณปจฺจยา. (๑)

อสํกิลิฏฺฐสํกิเลสิกํ นเหตุํ ธมฺมํ ปฏิจฺจ อสํกิลิฏฺฐสํกิเลสิโก นเหตุ ธมฺโม อุปฺปชฺชติ อารมฺมณปจฺจยา. (๑)

อสํกิลิฏฺฐอสํกิเลสิกํ นเหตุํ ธมฺมํ ปฏิจฺจ อสํกิลิฏฺฐอสํกิเลสิโก นเหตุ ธมฺโม อุปฺปชฺชติ อารมฺมณปจฺจยา. (๑) (สํขิตฺตํ.)

๗๓. เหตุยา นว, อารมฺมเณ ตีณิ, อธิปติยา นว, อนนฺตเร ตีณิ, สมนนฺตเร ตีณิ, สหชาเต นว, อญฺญมญฺเญ ตีณิ, นิสฺสเย นว, อุปนิสฺสเย ตีณิ, ปุเรชาเต ตีณิ, อาเสวเน ตีณิ, กมฺเม นว, วิปาเก ปญฺจ, อาหาเร นว…เป… อวิคเต นว (สํขิตฺตํ).

ปจฺจนียํ –นเหตุปจฺจโย

๗๔. อสํกิลิฏฺฐสํกิเลสิกํ นเหตุํ ธมฺมํ ปฏิจฺจ อสํกิลิฏฺฐสํกิเลสิโก นเหตุ ธมฺโม อุปฺปชฺชติ นเหตุปจฺจยา (สํขิตฺตํ).

นเหตุยา เอกํ, นอารมฺมเณ ปญฺจ, นอธิปติยา ฉ, นปุเรชาเต สตฺต…เป… นกมฺเม ตีณิ…เป… นวิปฺปยุตฺเต ตีณิ…เป… โนวิคเต ปญฺจ (สํขิตฺตํ).

(สหชาตวารมฺปิ…เป… สมฺปยุตฺตวารมฺปิ วิตฺถาเรตพฺพํ.)