๓. ปจฺจยานุโลมปจฺจนียํ

๔๕. สิยา กุสลํ ธมฺมํ ปฏิจฺจ กุสโล ธมฺโม อุปฺปชฺเชยฺย เหตุปจฺจยา นอารมฺมณปจฺจยา… สิยา กุสลํ ธมฺมํ ปฏิจฺจ อกุสโล ธมฺโม อุปฺปชฺเชยฺย เหตุปจฺจยา นอารมฺมณปจฺจยา.

(ยถา อนุโลเม เหตุปจฺจโย วิตฺถาริโต, เอวํ อนุโลมปจฺจนีเยปิ ปทํ วิตฺถาเรตพฺพํ.)

๔๖. สิยา กุสลํ ธมฺมํ ปฏิจฺจ กุสโล ธมฺโม อุปฺปชฺเชยฺย เหตุปจฺจยา นอธิปติปจฺจยา… เหตุปจฺจยา นอนนฺตรปจฺจยา…เป… เหตุปจฺจยา โนอวิคตปจฺจยา.

๔๗. สิยา กุสลํ ธมฺมํ ปฏิจฺจ กุสโล ธมฺโม อุปฺปชฺเชยฺย เหตุปจฺจยา อารมฺมณปจฺจยา นอธิปติปจฺจยา… เหตุปจฺจยา อารมฺมณปจฺจยา นอนนฺตรปจฺจยา…เป… เหตุปจฺจยา อารมฺมณปจฺจยา โนอวิคตปจฺจยา.

เหตุปจฺจยา อารมฺมณปจฺจยา อธิปติปจฺจยา นอนนฺตรปจฺจยา…เป… เหตุปจฺจยา อารมฺมณปจฺจยา อธิปติปจฺจยา โนอวิคตปจฺจยา.

เหตุปจฺจยา อารมฺมณปจฺจยา อธิปติปจฺจยา อนนฺตรปจฺจยา นสมนนฺตรปจฺจยา…เป… เหตุปจฺจยา อารมฺมณปจฺจยา อธิปติปจฺจยา อนนฺตรปจฺจยา โนอวิคตปจฺจยา…เป….

เหตุปจฺจยา อารมฺมณปจฺจยา อธิปติปจฺจยา อนนฺตรปจฺจยา สมนนฺตรปจฺจยา สหชาตปจฺจยา อญฺญมญฺญปจฺจยา นิสฺสยปจฺจยา อุปนิสฺสยปจฺจยา ปุเรชาตปจฺจยา ปจฺฉาชาตปจฺจยา อาเสวนปจฺจยา กมฺมปจฺจยา วิปากปจฺจยา อาหารปจฺจยา อินฺทฺริยปจฺจยา ฌานปจฺจยา มคฺคปจฺจยา สมฺปยุตฺตปจฺจยา วิปฺปยุตฺตปจฺจยา อตฺถิปจฺจยา นตฺถิปจฺจยา วิคตปจฺจยา โนอวิคตปจฺจยา.

๔๘. สิยา กุสลํ ธมฺมํ ปฏิจฺจ กุสโล ธมฺโม อุปฺปชฺเชยฺย อารมฺมณปจฺจยา… อธิปติปจฺจยา… อนนฺตรปจฺจยา…เป… อวิคตปจฺจยา นเหตุปจฺจยา … อวิคตปจฺจยา นอารมฺมณปจฺจยา…เป… อวิคตปจฺจยา โนวิคตปจฺจยา.

อวิคตปจฺจยา เหตุปจฺจยา นอารมฺมณปจฺจยา…เป… อวิคตปจฺจยา เหตุปจฺจยา โนวิคตปจฺจยา.

อวิคตปจฺจยา เหตุปจฺจยา อารมฺมณปจฺจยา นอธิปติปจฺจยา…เป… อวิคตปจฺจยา เหตุปจฺจยา อารมฺมณปจฺจยา โนวิคตปจฺจยา.

อวิคตปจฺจยา เหตุปจฺจยา อารมฺมณปจฺจยา อธิปติปจฺจยา อนนฺตรปจฺจยา สมนนฺตรปจฺจยา สหชาตปจฺจยา…เป… โนวิคตปจฺจยา.

(ค) ติกญฺจ ปฏฺฐานวรํ ทุกุตฺตมํ,

ทุกํ ติกญฺเจว ติกํ ทุกญฺจ;

ติกํ ติกญฺเจว ทุกํ ทุกญฺจ,

ฉ อนุโลมปจฺจนียมฺหิ นยา สุคมฺภีราติ.