๑. วิภงฺควาโร

เหตุปจฺจโย

๑. สํกิลิฏฺฐสํกิเลสิกํ ธมฺมํ ปฏิจฺจ สํกิลิฏฺฐสํกิเลสิโก ธมฺโม อุปฺปชฺชติ เหตุปจฺจยา – สํกิลิฏฺฐสํกิเลสิกํ เอกํ ขนฺธํ ปฏิจฺจ ตโย ขนฺธา…เป… เทฺว ขนฺเธ ปฏิจฺจ เทฺว ขนฺธา. (๑)

สํกิลิฏฺฐสํกิเลสิกํ ธมฺมํ ปฏิจฺจ อสํกิลิฏฺฐสํกิเลสิโก ธมฺโม อุปฺปชฺชติ เหตุปจฺจยา – สํกิลิฏฺฐสํกิเลสิเก ขนฺเธ ปฏิจฺจ จิตฺตสมุฏฺฐานํ รูปํ. (๒)

สํกิลิฏฺฐสํกิเลสิกํ ธมฺมํ ปฏิจฺจ สํกิลิฏฺฐสํกิเลสิโก จ อสํกิลิฏฺฐสํกิเลสิโก จ ธมฺมา อุปฺปชฺชนฺติ เหตุปจฺจยา – สํกิลิฏฺฐสํกิเลสิกํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป… เทฺว ขนฺเธ ปฏิจฺจ เทฺว ขนฺธา จิตฺตสมุฏฺฐานญฺจ รูปํ. (๓)

อสํกิลิฏฺฐสํกิเลสิกํ ธมฺมํ ปฏิจฺจ อสํกิลิฏฺฐสํกิเลสิโก ธมฺโม อุปฺปชฺชติ เหตุปจฺจยา – อสํกิลิฏฺฐสํกิเลสิกํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป… เทฺว ขนฺเธ ปฏิจฺจ เทฺว ขนฺธา จิตฺตสมุฏฺฐานญฺจ รูปํ; ปฏิสนฺธิกฺขเณ อสํกิลิฏฺฐสํกิเลสิกํ เอกํ ขนฺธํ ปฏิจฺจ ตโย ขนฺธา กฏตฺตา จ รูปํ…เป… เทฺว ขนฺเธ ปฏิจฺจ เทฺว ขนฺธา กฏตฺตา จ รูปํ; ขนฺเธ ปฏิจฺจ วตฺถุ, วตฺถุํ ปฏิจฺจ ขนฺธา; เอกํ มหาภูตํ ปฏิจฺจ ตโย มหาภูตา…เป… มหาภูเต ปฏิจฺจ จิตฺตสมุฏฺฐานํ รูปํ กฏตฺตารูปํ อุปาทารูปํ. (๑)

๒. อสํกิลิฏฺฐอสํกิเลสิกํ ธมฺมํ ปฏิจฺจ อสํกิลิฏฺฐอสํกิเลสิโก ธมฺโม อุปฺปชฺชติ เหตุปจฺจยา – อสํกิลิฏฺฐอสํกิเลสิกํ เอกํ ขนฺธํ ปฏิจฺจ ตโย ขนฺธา…เป… เทฺว ขนฺเธ ปฏิจฺจ เทฺว ขนฺธา. (๑)

อสํกิลิฏฺฐอสํกิเลสิกํ ธมฺมํ ปฏิจฺจ อสํกิลิฏฺฐสํกิเลสิโก ธมฺโม อุปฺปชฺชติ เหตุปจฺจยา – อสํกิลิฏฺฐอสํกิเลสิเก ขนฺเธ ปฏิจฺจ จิตฺตสมุฏฺฐานํ รูปํ. (๒)

อสํกิลิฏฺฐอสํกิเลสิกํ ธมฺมํ ปฏิจฺจ อสํกิลิฏฺฐสํกิเลสิโก จ อสํกิลิฏฺฐอสํกิเลสิโก จ ธมฺมา อุปฺปชฺชนฺติ เหตุปจฺจยา – อสํกิลิฏฺฐอสํกิเลสิกํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป… เทฺว ขนฺเธ ปฏิจฺจ เทฺว ขนฺธา จิตฺตสมุฏฺฐานญฺจ รูปํ. (๓)

อสํกิลิฏฺฐสํกิเลสิกญฺจ อสํกิลิฏฺฐอสํกิเลสิกญฺจ ธมฺมํ ปฏิจฺจ อสํกิลิฏฺฐสํกิเลสิโก ธมฺโม อุปฺปชฺชติ เหตุปจฺจยา – อสํกิลิฏฺฐอสํกิเลสิเก ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํ. (๑)

สํกิลิฏฺฐสํกิเลสิกญฺจ อสํกิลิฏฺฐสํกิเลสิกญฺจ ธมฺมํ ปฏิจฺจ อสํกิลิฏฺฐสํกิเลสิโก ธมฺโม อุปฺปชฺชติ เหตุปจฺจยา – สํกิลิฏฺฐสํกิเลสิเก ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํ (สํขิตฺตํ). (๑)