๑๙. เอกูนวีสติมวคฺโค

(๑๘๗) ๒. สุญฺญตากถา

๘๓๒. สุญฺญตา สงฺขารกฺขนฺธปริยาปนฺนาติ? อามนฺตา. อนิมิตฺตํ สงฺขารกฺขนฺธปริยาปนฺนนฺติ? น เหวํ วตฺตพฺเพ…เป… สุญฺญตา สงฺขารกฺขนฺธปริยาปนฺนาติ? อามนฺตา. อปฺปณิหิโต สงฺขารกฺขนฺธปริยาปนฺโนติ? น เหวํ วตฺตพฺเพ…เป… อนิมิตฺตํ น วตฺตพฺพํ – ‘‘สงฺขารกฺขนฺธปริยาปนฺน’’นฺติ? อามนฺตา. สุญฺญตา น วตฺตพฺพา – ‘‘สงฺขารกฺขนฺธปริยาปนฺนา’’ติ? น เหวํ วตฺตพฺเพ…เป… อปฺปณิหิโต น วตฺตพฺโพ – ‘‘สงฺขารกฺขนฺธปริยาปนฺโน’’ติ? อามนฺตา. สุญฺญตา น วตฺตพฺพา – ‘‘สงฺขารกฺขนฺธปริยาปนฺนา’’ติ? น เหวํ วตฺตพฺเพ…เป….

สุญฺญตา สงฺขารกฺขนฺธปริยาปนฺนาติ? อามนฺตา. สงฺขารกฺขนฺโธ น อนิจฺโจ น สงฺขโต น ปฏิจฺจสมุปฺปนฺโน น ขยธมฺโม น วยธมฺโม น วิราคธมฺโม น นิโรธธมฺโม น วิปริณามธมฺโมติ? น เหวํ วตฺตพฺเพ…เป… นนุ สงฺขารกฺขนฺโธ อนิจฺโจ สงฺขโต ปฏิจฺจสมุปฺปนฺโน ขยธมฺโม วยธมฺโม วิราคธมฺโม นิโรธธมฺโม วิปริณามธมฺโมติ? อามนฺตา. หญฺจิ สงฺขารกฺขนฺโธ อนิจฺโจ…เป… วิปริณามธมฺโม, โน จ วต เร วตฺตพฺเพ – ‘‘สุญฺญตา สงฺขารกฺขนฺธปริยาปนฺนา’’ติ.

๘๓๓. รูปกฺขนฺธสฺส สุญฺญตา สงฺขารกฺขนฺธปริยาปนฺนาติ? อามนฺตา. สงฺขารกฺขนฺธสฺส สุญฺญตา รูปกฺขนฺธปริยาปนฺนาติ? น เหวํ วตฺตพฺเพ…เป… เวทนากฺขนฺธสฺส…เป… สญฺญากฺขนฺธสฺส… วิญฺญาณกฺขนฺธสฺส สุญฺญตา สงฺขารกฺขนฺธปริยาปนฺนาติ? อามนฺตา. สงฺขารกฺขนฺธสฺส สุญฺญตา วิญฺญาณกฺขนฺธปริยาปนฺนาติ? น เหวํ วตฺตพฺเพ…เป….

สงฺขารกฺขนฺธสฺส สุญฺญตา น วตฺตพฺพา – ‘‘รูปกฺขนฺธปริยาปนฺนา’’ติ? อามนฺตา. รูปกฺขนฺธสฺส สุญฺญตา น วตฺตพฺพา – ‘‘สงฺขารกฺขนฺธปริยาปนฺนา’’ติ? น เหวํ วตฺตพฺเพ…เป… สงฺขารกฺขนฺธสฺส สุญฺญตา น วตฺตพฺพา – ‘‘เวทนากฺขนฺธปริยาปนฺนา…เป… สญฺญากฺขนฺธปริยาปนฺนา… วิญฺญาณกฺขนฺธปริยาปนฺนา’’ติ? อามนฺตา. วิญฺญาณกฺขนฺธสฺส สุญฺญตา น วตฺตพฺพา – ‘‘สงฺขารกฺขนฺธปริยาปนฺนา’’ติ? น เหวํ วตฺตพฺเพ…เป….

๘๓๔. น วตฺตพฺพํ – สุญฺญตา สงฺขารกฺขนฺธปริยาปนฺนา’’ติ? อามนฺตา. นนุ วุตฺตํ ภควตา – ‘‘สุญฺญมิทํ, ภิกฺขเว, สงฺขารา อตฺเตน วา อตฺตนิเยน วา’’ติ [ม. นิ. ๓.๖๙ อาเนญฺชสปฺปาเย]! อตฺเถว สุตฺตนฺโตติ? อามนฺตา. เตน หิ สุญฺญตา สงฺขารกฺขนฺธปริยาปนฺนาติ.

สุญฺญตากถา นิฏฺฐิตา.