๑๙. เอกูนวีสติมวคฺโค

(๑๘๘) ๓ สามญฺญผลกถา

๘๓๕. สามญฺญผลํ อสงฺขตนฺติ? อามนฺตา. นิพฺพานํ ตาณํ เลณํ สรณํ ปรายณํ อจฺจุตํ อมตนฺติ? น เหวํ วตฺตพฺเพ…เป… สามญฺญผลํ อสงฺขตํ, นิพฺพานํ อสงฺขตนฺติ? อามนฺตา. เทฺว อสงฺขตานีติ? น เหวํ วตฺตพฺเพ…เป… เทฺว อสงฺขตานีติ? อามนฺตา. เทฺว ตาณานิ…เป… อนฺตริกา วาติ? น เหวํ วตฺตพฺเพ…เป….

๘๓๖. สามญฺญผลํ อสงฺขตนฺติ? อามนฺตา. สามญฺญํ อสงฺขตนฺติ? น เหวํ วตฺตพฺเพ …เป… สามญฺญํ สงฺขตนฺติ? อามนฺตา. สามญฺญผลํ สงฺขตนฺติ? น เหวํ วตฺตพฺเพ…เป….

โสตาปตฺติผลํ อสงฺขตนฺติ? อามนฺตา. โสตาปตฺติมคฺโค อสงฺขโตติ? น เหวํ วตฺตพฺเพ…เป… โสตาปตฺติมคฺโค สงฺขโตติ? อามนฺตา. โสตาปตฺติผลํ สงฺขตนฺติ? น เหวํ วตฺตพฺเพ…เป….

สกทาคามิผลํ…เป… อนาคามิผลํ…เป… อรหตฺตผลํ อสงฺขตนฺติ? อามนฺตา. อรหตฺตมคฺโค อสงฺขโตติ? น เหวํ วตฺตพฺเพ…เป… อรหตฺตมคฺโค สงฺขโตติ? อามนฺตา. อรหตฺตผลํ สงฺขตนฺติ? น เหวํ วตฺตพฺเพ…เป….

โสตาปตฺติผลํ อสงฺขตํ, สกทาคามิผลํ…เป… อนาคามิผลํ …เป… อรหตฺตผลํ อสงฺขตํ, นิพฺพานํ อสงฺขตนฺติ? อามนฺตา. ปญฺจ อสงฺขตานีติ? น เหวํ วตฺตพฺเพ…เป… ปญฺจ อสงฺขตานีติ? อามนฺตา. ปญฺจ ตาณานิ…เป… อนฺตริกา วาติ? น เหวํ วตฺตพฺเพ…เป….

สามญฺญผลกถา นิฏฺฐิตา.