๑๕. ปนฺนรสมวคฺโค

(๑๕๔) ๑๐. อสญฺญสตฺตุปิกกถา

๗๓๕. สญฺญาเวทยิตนิโรธสมาปตฺติ อสญฺญสตฺตุปิกาติ? อามนฺตา. อตฺถิ สญฺญาเวทยิตนิโรธํ สมาปนฺนสฺส อโลโภ กุสลมูลํ, อโทโส กุสลมูลํ, อโมโห กุสลมูลํ, สทฺธา วีริยํ สติ สมาธิ ปญฺญาติ? น เหวํ วตฺตพฺเพ…เป… นตฺถิ สญฺญาเวทยิตนิโรธํ สมาปนฺนสฺส อโลโภ กุสลมูลํ, อโทโส กุสลมูลํ…เป… ปญฺญาติ? อามนฺตา. หญฺจิ นตฺถิ สญฺญาเวทยิตนิโรธํ สมาปนฺนสฺส อโลโภ กุสลมูลํ, อโทโส กุสลมูลํ, อโมโห กุสลมูลํ, สทฺธา วีริยํ สติ สมาธิ ปญฺญา, โน จ วต เร วตฺตพฺเพ – ‘‘สญฺญาเวทยิตนิโรธสมาปตฺติ อสญฺญสตฺตุปิกา’’ติ.

สญฺญาเวทยิตนิโรธสมาปตฺติ อสญฺญสตฺตุปิกาติ? อามนฺตา. อตฺถิ สญฺญาเวทยิตนิโรธํ สมาปนฺนสฺส ผสฺโส เวทนา สญฺญา เจตนา จิตฺตนฺติ? น เหวํ วตฺตพฺเพ…เป… นตฺถิ สญฺญาเวทยิตนิโรธํ สมาปนฺนสฺส ผสฺโส เวทนา สญฺญา เจตนา จิตฺตนฺติ? อามนฺตา. อผสฺสกสฺส มคฺคภาวนา…เป… อจิตฺตกสฺส มคฺคภาวนาติ? น เหวํ วตฺตพฺเพ…เป… นนุ สผสฺสกสฺส มคฺคภาวนา…เป… สจิตฺตกสฺส มคฺคภาวนาติ? อามนฺตา. หญฺจิ สผสฺสกสฺส มคฺคภาวนา…เป… สจิตฺตกสฺส มคฺคภาวนา, โน จ วต เร วตฺตพฺเพ – ‘‘สญฺญาเวทยิตนิโรธสมาปตฺติ อสญฺญสตฺตุปิกา’’ติ.

สญฺญาเวทยิตนิโรธสมาปตฺติ อสญฺญสตฺตุปิกาติ? อามนฺตา. เย เกจิ สญฺญาเวทยิตนิโรธํ สมาปชฺชนฺติ, สพฺเพ เต อสญฺญสตฺตุปิกาติ? น เหวํ วตฺตพฺเพ…เป….

๗๓๖. น วตฺตพฺพํ – ‘‘สญฺญาเวทยิตนิโรธสมาปตฺติ อสญฺญสตฺตุปิกา’’ติ? อามนฺตา. นนุ อิธาปิ อสญฺญี ตตฺราปิ อสญฺญีติ? อามนฺตา. หญฺจิ อิธาปิ อสญฺญี ตตฺราปิ อสญฺญี, เตน วต เร วตฺตพฺเพ – ‘‘สญฺญาเวทยิตนิโรธสมาปตฺติ อสญฺญสตฺตุปิกา’’ติ.

อสญฺญสตฺตุปิกกถา นิฏฺฐิตา.