จาณกฺยนีติลา คาถา

ลาลเน พหโว โทสา,

ตาฬเน พหโว คุณา;

ตสฺมา ปุตฺตญฺจ สิสฺสญฺจ,

ตาฬเย น จ ลาลเย.

๒๘. อตีตสฺส หิ มิตฺตสฺส,

โย เจ โทสํ ปกาสเย;

โส หเว ปจฺจุปฺปนฺนสฺส,

โทสํ ภาเสติ ญายติ.

๒๙. ลตาวิย เสวกา เต,

เย นิสฺสยํ ปลมฺพเร;

นิสฺสยสฺส วินาเสน,

ภูมฺยํ เสนฺติ อนาถกา.

๓๐. โทสสิงฺเคหิ วิชฺฌนฺโต,

มานขูเรหิ อกฺกมํ;

ภยํ กโรติ โลกมฺหิ,

โคว พาโล วิหึสโก.

๓๑. อาโท อุปริ โลโกยํ,

อุชุเลขาย ติฏฺฐติ;

มุสาวาเตหิ ตํโลกํ,

นิปาเตสิ อนชฺชวํ.

๓๒. สุฆฏํ กุมฺภกาเรน,

นารโห ปริภุญฺชิตุํ;

ตถูปมาย เวกฺเขยฺย,

สกมฺมปรกมฺมนิ.

๓๓. อนนฺตรํสี สูโรปิ,

นสกฺโกติ ฆนํ ตมํ;

วิชฺฌิตุํ รํสิยา โลเก,

ตถา มทนโมหิตา;

นสกฺโกนฺติ มทํ เภตฺวา,

ปญฺญาภาย ปภาสิตุํ.

๓๔. เขทเวรํ ทลิทฺทมฺหิ,

โภคิมฺหิ โรคุปทฺทวํ;

เทสฺสเวรญฺจ อาณิมฺหิ,

ปสฺเส โลกสฺส เวริตํ.

๓๕. สํลทฺเธน สุโภเคน,

ชีวํ สุทฺธํ กเร นิชํ;

เสฏฺโฐ โส เตน ชีเวน,

เชคุจฺโฉ มลชีวิโก.

๓๖. วชิร ปุปฺผราคานํ,

วิเสสํ โย นพุชฺฌติ;

กถญฺหิ โส วิกฺกีเณยฺย,

กีเณยฺย วา ยถาตถํ.

๓๗. กิปฺปีลิ โกปิ จินฺเตตฺวา,

ปพฺพตํ เภตฺตุ มุสฺสหํ;

อพลา ตนุมชฺฌตฺตา,

จินฺตา หสฺยาว สา มุธา.

๓๘. ชาตมตฺตํ น โย สตฺตุํ,

โรคญฺจูปสมํ นเย;

มหาพโลปิ เตเนว,

วุทฺธึปตฺวา ส หญฺญเต.

๓๙. สชีวมํสภกฺเขหิ,

สทาฐีหิ มุเขหิ โภ;

พิฬารพฺยคฺฆสีหานํ,

นิหีนานิ อเนกธา;

ติกฺขานิ ขรวาทานิ,

มนุสฺสานํ มุขานิ เว.

๔๐. วิลุปฺปนฺตา วิธาวนฺติ,

สชีววุตฺติกมฺมุนา;

ชนา เตน วิหญฺญนฺติ,

จรนฺติ ธมฺมเวมุขา.

๔๑. สุลภํ โลกิยํ โลเก,

สาสนียํว ทุลฺลภํ;

ทุลฺลภํ ตํ วมญฺญนฺโต,

เอโส พาลตโม ภเว.

๔๒. โย ปติตฺถ อคฺยาวาฏํ,

โมหา ตํ อุปการิตุํ;

อญฺโญโรหิ ตทา วาฏํ,

ทุตีโย มุฬฺหมุฬฺหโก.

๔๓. พฺยคฺโฆ อาวุธวิทฺโธ หิ,

อกา ทุฏฺฐานิ นินฺนทํ;

ตเถว สาธุสตฺเถน,

วิทฺโธ พาโล ปกุปฺปิโต.

๔๔. ปิวนฺติ โลหิตํ ฑํสา,

อนฺโต ตุณฺเฑน มกฺขิกา;

พหิทฺธา ปริวาเรนฺติ,

ชโน เตน ฑํสายเย.

๔๕. อธนสฺส ขโณ อปฺโป,

สทฺธมฺโม อปฺปกาลิโน;

อปฺปโก เตน ยุญฺเชยฺยุํ,

ขณํ พหุํ ลเภตเว.