นโม ตสฺส ภควโต อรหโต สมฺมาสมฺพุทฺธสฺส

ปชฺชมธุ

อานนฺท รญฺญ รตนาทิ มหา ยตินฺท,

นิจฺจปฺปพุทฺธ ปทุมปฺปิย เสวินงฺคี;

พุทฺธปฺปิเยน ฆน พุทฺธ คุณปฺปิเยน,

เถราลินา รจิต ปชฺชมธุํ ปิพนฺตุ.

๑. อุณฺณาปปุณฺณสสิมณฺทลโต คลิตฺวา,

ปาทมฺพุชงฺคุลิ ทลฏฺฐ สุธา ลวานํ;

ปนฺตีว สตฺถุ นขปนฺติ ปชาวิเสสํ,

ปีเณตุ สุทฺธ สุขิตมฺมณ ตุณฺฑปีตา.

๒. ขิตฺตาย มารริปุนา ปริวตฺย สตฺถุ,

ปาทสฺสยา ชิต ทิสาย สิตตฺตลาย;

ยา เชติ กญฺจน สราวลิยา สิรึ สา,

เทตนฺคินํ รณชยงฺคุลิปนฺติกนฺตา.

๓. โสวณฺณ วณฺณ สุขุมจฺฉวิ โสมฺม กุมฺม,

ปิฏฺฐีว ปิฏฺฐิ กมตุนฺนติ ภาติ เยสํ;

เตสุปฺปติฏฺฐิตสุโกมลทีฆปณฺหิ,

ปาทา ชินสฺส ปททนฺตุ ปทํ ชนสฺส.

๔. อจฺเฉร ปงฺกชสิรํ สิริยา สกาย,

เย มทฺทิโน วิย จรนฺติ สโรช สีเส;

สญฺจุมฺพิตา วิย จ ตานิ ปราค ราคา,

เต นีรชา มุนิปทา ปททนฺตุ ลกฺขึ.

๕. อคามิ กาล ชน มงฺคล ภตฺตุ ภาวํ,

วฺยากตฺตุมตฺร กุสเลนิว นิมฺมิตานิ;

ยาตฺราสุมฏฺฐสตมงฺคลกฺขณานิ,

สาเธตุ นํ ปทยุคํ ชยมงฺคลานิ.

๖. สสฺเสวิชนฺตุวรสนฺติปุรปฺปเวเส,

นิจฺจํ สุสชฺช ฐปิตานิว มงฺคลาย;

เย เต ทธนฺติ กลมงฺคลลกฺขณานิ,

วตฺตนฺตุ เต ชินปทา ชยมงฺคลาย.

๗. สพฺเพภิภูย สปเทสุ นิปาตนสฺส,

สญฺญาณกํ วิย ยทสฺสิตสพฺพโลโก;

ปาทาตฺยโธกตติโลกสิโรวรา ปิ,

โลกํ ปุณนฺตุ ชยมงฺคลการณานิ.

๘. โลกตฺตเยกสรณตฺตวิภาวนาย,

สชฺโช ว ติฏฺฐติ ยหึ สุวิภตฺตโลโก;

ตํ สพฺพโลกปฏิพิมฺพิตทปฺปณาภํ,

ปาททฺวยํ ชนสุสชฺชนเหตุ โหตุ.

๙. โลกุตฺตราย สิริยาธิคมาย สุฏฺฐุ,

รชนฺติ ยตฺถ ทิคุณานิว ปาตุ ภูตา;

จกฺกาสนาภิสหเนมิสหสฺสรานิ,

ตฺยงฺฆี ทิสนฺตุ สกลิสฺสริยํ ชนสฺส.

๑๐. ยตฺรุลฺลสนฺติ ทุวิธานิว ปาตู ภูตา,

ธมฺมสฺสสพฺพภุวนสฺส จ อิสฺสรตฺเต;

จกฺกานิ จกฺกสทิสานิ สุทสฺสนสฺส,

ตานชฺช ชนฺตุ สรณา จรณานิ โหนฺตุ.

๑๑. สตฺเตสุ วจฺฉตุ สิรี สิริวจฺฉเกน,

โสวตฺถิ โสตฺถิมนุติฏฺฐตุ ปุคฺคเลสุ;

นนฺทึ ชนานมนุวตฺตตุ นนฺทิวตฺตี,

สีสานลํกุรุตุ ปาทวตํสโก ปิ.

๑๒. ภทฺทาย ปีฐมุปคจฺฉตุ ภทฺทปีฐํ,

วุทฺธึ ชนานมนุวตฺตตุ วทฺธมานํ;

ปุณฺณตฺตมงฺคิมนุกุพฺพตุ ปุณฺณกุมฺโภ,

ปาติ จ ปาตุ สตตํ ชนตํ อปายา.

๑๓. เสตาตปตฺตมปเนตมฆาตเป ตํ,

ขคฺโค วิฉินฺทตุ สทา ทุริตาริวคฺเค;

สํเกฺลสทาหมปเนตุ สตาลวณฺฏ,

สํวีชนี กุมติมกฺขิกโมรหตฺโถ.

๑๔. อากฑฺฒโน ชนวิโลจนมตฺตนินฺนํ,

วาเรตุ สพฺพคติวารนมงฺกุโส โส;

ปาทมฺพุชสฺสิริวิลาสนิเกตนํ ว,

ปาสาทลขณมุเปตุ มโนปสาทํ.

๑๕. ปาณีนมตฺตภชตํ วรปุณฺณปตฺตํ,

สมฺมา ททาตุ ปทนิสฺสิตปุณฺณปตฺโต;

ปาเทสุ ชนฺตุ มนพนฺธนทามภูตํ,

ทามํ ทเมตุ วิมลํ ชนตมฺมนานิ.

๑๖. อุณฺหีสกุปฺปลมณีปทุเมหิ ปาทา,

สสฺเสวิชนฺตุกรณานิ วิภูสยนฺตุ;

สนฺเนตฺตนาวุปคตานมนคฺฆกานิ,

โพชฺฌงฺคสตฺตรตนานิ ทเท สมุทฺโท.

๑๗. อุตฺตุงฺค นิจฺจลคุงา ชิตตาย นิจฺจํ,

เสวีว ปาทสิริ นิจฺจ สมุพฺพหํ ว;

อตฺราปิ สกฺกภวนุพฺพหเณ นิยุตฺโต,

ปาทฏฺฐเมรุ ภวตํ ภวตํ วิภูตฺยา.

๑๘. โส จกฺกวาฬสิขรี ปฺยวตํ สมนฺตา,

สพฺพูปสคฺควิสราชนตํ สมคฺคํ;

ทีปา ปุถูปิ จตุโร ทฺวิสหสฺส ขุทฺทา,

ธาเรนฺตฺวปายปตมานมทตฺว ชนฺตุํ.

๑๙. สูโร ปโพธยตุ ชนฺตุ สโรรุหานิ,

จนฺโท ปสาท กุมุทานิ มโนทเหสุ;

นกฺขตฺตชาตมขิลํ สุภตาย โหตุ,

จกฺกํ ธชํ ริปุชยาย ชยทฺธชาย.

๒๐. เชตุํ สสํสท-สุทสฺสน-จกฺกวตฺติ,

จกฺกานุคนฺตลลิตํ ยหิมาวเหยฺย;

จกฺกาณุวตฺติ ปริสาวต-จกฺกวตฺติ,

นํวตฺตตํ ปทยุคํ ชนตา หิตาย.

๒๑. ปุเชตุมาคต วตา วชิราสนฏฺฐ,

มินฺเทน ฉฑฺฑิต มหาวิชยุตฺตราขฺยํ;

สํขํ ปวิฏฺฐมิว มารภยา ปทาโธ,

ปาทฏฺฐสํขมิห วตฺตตุ สนฺติยา โว.

๒๒. โสวณฺณมจฺฉยุคลํ สิวภตฺต โภเค,

อิจฺฉา พหูปกรณํ ภวตํ ชนานํ;

กุมฺภีลธิคฺคหิตโต ว ปทุตฺถจิตฺตา,

ปาทมฺพุชากร วิคาหิ ตุ โนปโหนฺตุ.

๒๓. สตฺตาปคา ชนมโนช มเล ชหนฺตุ,

สํเกฺลสทาหมปเนนฺตุ ทหา จ สตฺต;

เสลา จ สตฺต วิทธนฺตุ ชนสฺส ตานํ,

โลกปฺปสิทฺธิชนเน ภวตํ ปตากา.

๒๔. ปาฏงฺกิ สนฺติ คมเน ภวตูปการา,

ทาเหตฺตเนสุ ชหตํ ปทจามรํ ตํ;

สลฺโลกโลจนมหุสฺสว-อุสฺสิตํ ว,

วตฺเตยฺย โตรณมนุตฺตรมงฺคลาย.

๒๕. ยสฺมึ มิคินฺท คต ภีติ พลาว ทฑฺฒ,

ทานา นตา สิรวิทารณ ปีฬิตาว;

นาลาคิรี กริวโร คิริเมขโล จ,

ตํ สีหวิกฺกมปทํ หนตา ฆทนฺตึ.

๒๖. ปาปาหิโน หนตุ ปาทสุวณฺณราชา,

วฺยคฺฆาธิโป กลิชเน อทตํ อเสสํ;

วาลาห-อสฺสปติ สมฺปติตุํ อทตฺวา,

ปาเยสุ ปาปยตุ สนฺติปุรมฺปชาโย.

๒๗. ฉทฺทนฺต ทนฺติ ลลิตํ คลิตํ รุสมฺหา,

ลุทฺเทตฺต ทุพฺภินิ ทิเส อจลํ ทธาโน;

ปาทฏฺฐหตฺถิปติ สมฺปติ ชนฺตุตาเส,

ตาเสตุ หาสมปรนฺทิสตํ สตานํ.

๒๘. สพฺพงฺคิโน จรณุโปสถ หตฺถิราชา,

ปาเปตุ สพฺพจตุทีปิกรชฺชลกฺขึ;

กิตฺตีว ปาทปริจาริกตา นิยุตฺตา,

เกลสเสลปฏิมา หิตมาจเรยฺย.

๒๙. สามิสฺส หํสสมเย ทหปาสพทฺธ,

มาสีน เวสคมโก วิย ปาทหํโส;

นิคฺโฆส คนฺติชิตโต วิย มูคปกฺโข,

ยาเรตุ สพฺพ ชนตา ภวคนฺตุกตฺตํ.

๓๐. โอหาย ทิพฺพสรสึ ขิลโลก สพฺพ,

รมฺมงฺฆิวาปิมวคาหิตวาว ปาเท;

เอราวโณ กริวโร มนสาภิรุเฬฺห,

ชนฺตุํ ปุรินฺททปุรํ นยตํ ว สีฆํ.

๓๑. หิตฺวา สกมฺภวนมงฺฆินิเสวนตฺถ,

มาคมฺม รมฺม ตรตายิห นิสฺสิโต ว;

ปาเลตฺว มูนิ ปทวาปิตรงฺคภงฺคิ,

มนฺคี กโรนฺตตนุวาสุกิ นาคราชา.

๓๒. นาถสฺส กญฺจนสิขาวลชาติลีล,

มาวิกรํ ว ปทนิสฺสิตโมรราชา;

ตํ ธมฺมเทสนรเวนิว ลุทฺทกสฺส,

โลกสฺส ปาปผณิโน หนตํ อเสสํ.

๓๓. สํสารสาครคเต สธเน ชเน เต,

เนตมฺปเท กลจตุมฺมุขเหมนาวา;

นิพฺพาณปฏฺฏนวรํ ภรุกจฺฉกนฺตํ,

สุปฺปารปณฺฑิต คตา วิย อาสุนาวา.

๓๔. สมฺโพธิ ญาณ ปริปาจยโต มุนิสฺส,

ภตฺโต ยถา หิมวตทฺทิ สมาธิเหตุ;

เอวมฺมเนน ภชตํ หิมวทฺทิปาเท,

สมฺโพธิญาณ ปริปาจนเหตุ โหตุ.

๓๕. ทฬฺหํ ปราชิตตยา มุนินา สเรน,

สุญฺญสฺสโรปคต ปญฺชร พนฺธโนว;

โส ปาทปญฺชรคโต กรวีกปกฺขี,

สพฺเพสมปฺปียาวจญฺชหตา ภวนฺตํ.

๓๖. เต จกฺกวาก มกรา อปิ โกญฺจ ชีวํ,

ชีวาทิ ปกฺขิวิสรา สรสีว ภุตฺตํ;

เวสฺสนฺตเรน จรณมฺพุชิ นิพฺภชนฺตา,

ชนฺตุ ตหึ วิย ปเท สุรเมนฺตุ นิจฺจํ.