สีล-นิทฺเทส

๒๙๑. ปมาทํ ภยโต ทิสฺวา,

อ-ปฺปมาทญฺจ เขมโต;

ภาเวถ อฏฺฐงฺคิกํ มคฺคํ,

เอสา พุทฺธานุสาสนี.

๒๙๒. หีเนน พฺรหฺม-จริเยน,

ขตฺติเย อุปปชฺชติ;

มชฺฌิเมน จ เทวตฺตํ,

อุตฺตเมน วิ-สุชฺฌติ.

ก.

นคเร พนฺธุมติยา,

พนฺธุมา นาม ขตฺติโย;

ทิวเส ปุณฺณมาย โส,

อุปคจฺฉิ อุโปสถํ.

ข.

อหํ เตน สมเยน,

คุมฺภ-ทาสี อหํ ตหึ;

ทิสฺวา ส-ราชกํ เสนํ,

เอวาหํ จินฺตยึ ตทา.

ค.

ราชาปิ รชฺชํ ฉฏฺเฏตฺวา,

อุปคจฺฉิ อุโปสถํ;

ส-ผลํ นูน ตํ กมฺมํ,

ชน-กาโย ปโมทิโต.

ฆ.

โยนิโส ปจฺจเวกฺขิตฺวา,

ทุคฺคจฺจญฺจ ทลิทฺทตํ;

มานสํ สมฺปหํสิตฺวา,

อุปคจฺฉิมุ โปสถํ.

ง.

อหํ อุโปสถํ กตฺวา,

สมฺมา-สมฺพุทฺธสาสเน;

เตน กมฺเมน สุ-กเตน,

ตาวตึสํ อคจฺฉหํ.

จ.

ตตฺถ เม สุ-กตํ พฺยมฺหํ,

อุพฺภ-โยชนมุคฺคตํ;

กูฏาคาร-วรูเปตํ,

มหาสนสุ-ภูสิตํ.

ฉ.

อจฺฉรา สต-สหสฺสา,

อุปติฏฺฐนฺติ มํ สทา;

อญฺเญ เทเว อติกฺกมฺม,

อติโรจามิ สพฺพทา.

ช.

จตุสฏฺฐิ-เทว-ราชูนํ,

มเหสิตฺตมการยึ;

เตสฏฺฐิ-จกฺกวตฺตินํ,

มเหสิตฺตมการยึ.

ฌ.

สุวณฺณ-วณา หุตฺวาน,

ภเวสุ สํสรามหํ;

สพฺพตฺถ ปวรา โหมิ,

อุโปสถสฺสิทํ ผลํ.

ญ.

หตฺถิ-ยานํ อสฺส-ยานํ,

รถ-ยานญฺจ สิวิกํ;

ลภามิ สพฺพเมตมฺปิ,

อุโปสถสฺสิทํ ผลํ.

ฏ.

โสณฺณ-มยํ รูปิ-มยํ,

อโถปิ ผลิกา-มยํ;

โลหิตงฺค-มยญฺเจว,

สพฺพํ ปฏิลภามหํ.

ฐ.

โกเสยฺย-กมฺพลิยานิ,

โขม-กปฺปาสิกานิ จ;

มหคฺฆานิ จ วตฺถานิ,

สพฺพํ ปฏิลภามหํ.

ฑ.

อนฺนํ ปานํ ขาทนียํ,

วตฺถํ เสนาสนานิ จ;

สพฺพเมตํ ปฏิลเภ,

อุโปสถสฺสิทํ ผลํ.

ฒ.

วร-คนฺธญฺจ มาลญฺจ,

จุณฺณกญฺฉ วิเลปนํ;

สพฺพเมตํ ปฏิลเภ,

อุโปสถสฺสิทํ ผลํ.

ณ.

กูฏาคารญฺจ ปาสาทํ,

มณฺฑปํ หมฺมิยํ คุหํ;

สพฺพเมตํ ปฏิลเภ,

อุโปสถสฺสิทํ ผลํ.

ต.

ชาติยา สตฺต-วสฺสาหํ,

ปพฺพชึ อน-คาริยํ;

อฑฺฒ-มาเส อ-สปฺปตฺเต,

อร หตฺตํ อปาปุณึ.

ถ.

กิเลสา ฌาปิตา มยฺหํ,

ภวา สพฺเพ สมูหตา;

สพฺพาสว-ปริกฺขีณา,

นตฺถิ ทานิ ปุน-พฺภโว.

ท.

เอก-นวุติโต กปฺเป,

ยํ กมฺมมกรึ ตทา;

ทุคฺคตึ นาภิชานามิ,

อุโปสถสฺสิทํ ผลํ.

ธ.

สฺวาคตํ วต เม อาสิ,

มม พุทฺธสฺส สนฺติเก;

ติสฺโส วิชฺชา อนุ-ปตฺตา,

กตํ พุทฺธสฺส สาสนํ.

น.

ปฏิสมฺภิทา จตสฺโส,

วิโมกาปิ จ อฏฺฐิเม;

ฉฬาภิญฺญา สจฺฉิกตา,

กตํ พุทฺธสฺส สาสนํ.

๒๙๓. ญาตีนญฺจ ปิโย โหติ,

มิตฺเตสุ จ วิโรจติ;

กายสฺส เภทา สุ-คตึ,

อุปปชฺชติ สีลวา.

๒๙๔. นิพฺพานํ ปตฺถยนฺเตน สมาทินฺนํ,

ปญฺจ-สีลมฺปิ อธิ-สีลํ;

ทส-สีลมฺปิ อธิ-สีลเมว.

ก.

นคเร จนฺทวติยา,

ภฏโก อาสหํ ตทา;

ปร-กมฺมายเน ยุตฺโต,

ปพฺพชฺชํ น ลภามหํ.

ข.

มหนฺธการ-ปิหิตา,

ติวิธคฺคีหิ ฑยฺหเร;

เกน นุโข อุปาเยน,

วิ-สํยุตฺโต ภเว อหํ.

ค.

เทยฺยธมฺโม จ เม นตฺถิ,

ภฏโก ทุกฺขิโต อหํ;

ยํ นูนาหํ ปญฺจ-สีลํ,

รกฺเขยฺยํ ปริปูรยํ.

ฆ.

อโนมทสฺสิสฺส มุนิโน,

นิสโภ นาม สาวโก;

ตมหํ อุปสงฺกมฺม,

ปญฺจ-สิกฺขาปทคฺคหึ.

ง.

วสฺส-สต-สหสฺสานิ,

อายุ วิชฺชติ ตาวเท;

ตาวตา ปญฺจ-สีลานิ,

ปริปุณฺณานิ โคปยึ.

จ.

มจฺจุ-กาลมฺหิ สมฺปตฺเต,

เทวา อสฺสาสยนฺติ มํ;

รโถ สหสฺส-ยุตฺโต เต,

มาริสสฺส อุปฏฺฐิโต.

ฉ.

วตฺตนฺเต จริเม จิตฺเต,

มม สีลํ อนุสฺสรึ;

เตน กมฺเมน สุ-กเตน,