นวม ปริจฺเฉท

อภยาภิเสโก

๑. มเหสี ชนยี ปุตฺเต, ทส เอกญฺจ ธีตรํ;

สพฺพเชฏฺโฐ’ภโย นาม, จิตฺตานาม กนิฏฺฐิกา.

๒. ปสฺสิตฺวา ตํ วิยากํสุ, พฺราหฺมณา มนฺตปารคา;

‘‘รชฺชเหตุ สุโต อสฺสา, ฆาตยิสฺสติ มาตุเล’’.

๓. ฆาเตสฺสามิ กนิฏฺฐินฺติ, นิจฺฉิเต ภาตรา’ภโย;

วาเรสิ กาเล วาเสสุํ, เคหํ ตํ เอกถุณิเก.

๔. รญฺโญ จ สิริคพฺเภน, ตสฺส ทฺวารมการยุํ;

อนฺโต ฐเปสุํ เอกญฺจ, ทาสึ นรสตํ พหิ.

๕. รูเปนุ’มฺมาทยี นเร, ทิฏฺฐมตฺตาว สายโต;

ตโต อุมฺมาทจิตฺตา’ติ, นามํ โสปปทํ ลภิ.

๖. สุตฺวาน ลํกาคมนํ, ภทฺทกจฺจานเทวิยา;

มาตรา โจทิตา ปุตฺตา, ฐเปเตฺว’กญฺจ อาคมุํ.

๗. ทิสฺวาน เต ปณฺฑุวาสุ-เทวํ ลงฺกินฺทมาคตา;

ทิสฺวาน ตํ กนิฏฺฐิญฺจ, โรทิตฺวา สห ตาย จ.

๘. รญฺญา สุกตสกฺการา, รญฺโญ’นุญฺญาย จาริกํ;

จรึสุ ลํกาทีปมฺหิ, นิวสุญฺจ ยถารุจึ.

๙. ราเมน วุสิตฐานํ, รามโคณนฺติ วุจฺจติ;

อุรุเวลา’นุราธานํ, นิวาสา จ ตถา ตถา.

๑๐. ตถา วิชิตทีฆายุ-โรหณานํ นิวาสกา;

วิชิตคาโม ทีฆายุ-โรหณนฺติ จ วุจฺจติ.

๑๑. กาเรสิ อนุราโธ โส, วาปึ ทกฺขิณโต ตโต;

การาเปตฺวา ราชเคหํ, ตตฺถ วาสมกปฺปยี.

๑๒. มหาราชา ปณฺฑุวาสุ-เทโว ชฏฺฐสุตํ สกํ;

อภยํ อุปรชฺชมฺหิ, กาเล สมภิเสจยิ.

๑๓. ทีฆายุสฺส กุมารสฺส, ตนโย ทีฆคามณิ;

สุตฺวา อุมฺมาทจิตฺตํ ตํ, ตสฺสํ ชาตกุตูหโล.

๑๔. คเหตฺวา’ปติสฺส คามํ, ตํ อปสฺสิ มนุชาธิปํ;

อทา สโหปราเชน, ราชุปฏฺฐานมสฺสโส.

๑๕. ควกฺขาภิมุขฏฺฐาเน, ตํ อุเปจฺจ ฐิตํ ตุสา;

ทิสฺวาน คามิณึ จิตฺตา, รตฺตจิตฺตา’ห ทาสิกํ.

๑๖. ‘‘โก เอโส’’ติ ตโต สุตฺวา,

มาตุลสฺส สุโตอิติ;

ทาสึ ตตฺถ นิโยเชสิ,

สทฺธึกตฺวาน โส ตโต.

๑๗. ควกฺขมฺหิ ฑสาเปตฺวา, รตฺตึ กกฺกฏยนฺตกํ;

อารุยฺห ฉินฺทยิตฺวาน, กวาฏํ เตน ปาวิสิ.

๑๘. ตาย สทฺธึ วสิตฺวาน, ปจฺจูเสเยว นิกฺขมิ;

เอวํ นิจฺจํ วสี ตตฺถ, ฉิทฺทาภาวา อปากโฏ.

๑๙. สา เตน อคฺคหี คพฺภํ, คพฺเภ ปริณเต ตโต;

มาตุ อาโรจยี ทาสี, มาตา ปุจฺฉิย ธีตรํ.

๒๐. รญฺโญ อาโรจยี ราชา, อมนฺเตตฺวา สุเต’พฺรหฺมา;

โปสิโยโส’ปิ อเมฺหหิ, เทว ตสฺเสว ตํ อิติ.

๒๑. ปุตฺโต เจ มารยิสฺสาม, ต’นฺติ ตสฺส อทํสุ ตํ;

สา สูติกาลสมฺปตฺเต, สูติ เคหญฺจ ปาวิสึ.

๒๒. สงฺกิตฺวา โคปกํ จิตฺตํ, กาลเวลญฺจ ทาสกํ;

ตสฺมึ กมฺเม นิสฺสายา’ติ, คามณิ ปริจารเก.

๒๓. เต ปฏิญฺญํ อเทนฺเต เต, ราชปุตฺตา อฆาตยุํ;

ยกฺขา หุตฺวาน รกฺขึสุ, อุโภ คพฺเภ กุมารกํ.

๒๔. อญฺญํ อุปวิชญฺญํ สา, สลฺลกฺขา เปสิ ทาสิยา;

จิตฺตา สา ชนยี ปุตฺตํ, สา อิตฺถิ ปน ธีตรํ.

๒๕. จิตฺตํ สหสฺสํ ทาเปตฺวา, ตสฺสา ปุตฺตํ สกมฺปิ จ;

อาณาเปตฺวา ธีตรํ ตํ, นิปชฺชาเปสิ สนฺติเก.

๒๖. ธีตา ลทฺธา’ติ สุตฺวาน, ตุฏฺฐา ราชสุตา อหุํ;

มาตา จ มาตุมาตา จ, อุโภ ปน กุมารกํ.

๒๗. มาตามหสฺส นามญฺจ, เชฏฺฐสฺส มาตุลสฺส จ;

เอกํ กตฺวา ตมกรุํ, ปณฺฑุกาภยนามกํ.

๒๘. ลํกา ปาโล ปณฺฑุวาสุ-เทโว รชฺชมการยิ;

ตึส วสฺสมฺหิ ชาตมฺหิ, มโต โส ปณฺฑุกาภเย.

๒๙. ตสฺมึ มตสฺมึ มนุชาธิปสฺมึ,

สพฺเพ สมาคมฺม นรินฺทปุตฺตา;

ตสฺสาภยสฺสาภยทสฺส ภาตุ,

ราชาภิเสกํ อกรุํ อุฬาราติ.

สุชนปฺปสาท สํเวคตฺถาย กเต มหาวํเส

อภยาภิเสโก นาม

นวโม ปริจฺเฉโท.