อฏฺฐม ปริจฺเฉท

ปณฺฑุวาสุเทวาภิเสโก

๑. วิชโย โส มหาราชา, วสฺเส อนฺติมเก ฐิโต;

อิติ จินฺตยิ ‘‘วุทฺโธ’หํ, น จ วิชฺชติ เม สุโต.

๒. กิจฺเฉน วาสิตํ รฏฺฐํ, นสฺเสยฺย มม อจฺจเย;

อาณาเปยฺยํ รชฺชเหตุ-สุมิตฺตํ ภาตรํ มม.

๓. อถา’มจฺเจหิ มนฺเตตฺวา, เลขํ ตตฺถ วิสชฺชยิ;

เลขํ ทตฺวาน วิชโย, น จิเรน ทิวงฺคโต.

๔. ตสฺมึ มเต อมจฺจา เต, เปกฺขนฺตา ขตฺติยาคมํ;

อุปติสฺสคาเม ฐตฺวาน, รฏฺฐํ สมุนุสาสิสุํ.

๕. มเต วิชยราชมฺหิ, ขตฺติยาคมนา ปุรา;

เอกํ วสฺสํ อยํ ลํกา-ทีโป อาสิ อราชโก.

๖. ตสฺมึ สีหปุเร ตสฺส, สีหพาหุสฺส ราชิโน;

อจฺจเยน สุมิตฺโต โส, ราชา ตสฺส สุโต อหุ.

๗. ตสฺส ปุตฺตา ตโย อาสุํ, มทฺทราชสฺส ธีตุยา;

ทูตา สีหปุรํ คนฺตฺวา, รญฺโญ เลขํ อทํสุ เต.

๘. เลขํ สุตฺวาน โส ราชา, ปุตฺเต อามนฺตยี ตโย;

อหํ มหลฺลโก ตาตา, เอโก ตุเมฺหสุ คจฺฉตุ.

๙. ลํกํ เนกคุณํ กนฺตํ, มม ภาตุสฺส สนฺตกํ;

ตสฺส’จฺจ เยน ตตฺเถว, รชฺชํ กาเรตุ โสภนํ.

๑๐. กณิฏฺฐโก ปณฺฑุวาสุ-เทโว ราชกุมารโก;

‘‘คมิสฺสามีติ จินฺเตตฺวา, ญตฺวา โสตฺถิ คตมฺปิ จ.

๑๑. ปิตรา สมนุญฺญาโต, ทฺวตฺตึสามจฺจ ทารเก;

อาทาย อารุหี นาวํ, ปริพฺพาชกลิงฺควา.

๑๒. มหากนฺทรนชฺชา เต, มุขทฺวารมฺหิ โอตรํ;

เต ปริพฺพาชเก ทิสฺวา, ชโน สกฺกริ สาธุกํ.

๑๓. ปุจฺฉิตฺวา นครํ เอตฺถ, อุปยนฺตํ กเมน เต;

อุปติสฺส คามํ สมฺปตฺตา, เทวตา ปริปาลิตา.

๑๔. อมจฺจา’นุมโต’มจฺโจ, ปุจฺฉิ เนมิตฺตกา ตหึ;

ขตฺติยา’คมนํ ตสฺส, โส พฺยากาสิ ปรํปิ จ.

๑๕. สตฺตเม ทีวเสเยว, อาคมิสฺสติ ขตฺติโย;

พุทฺธสาสน เมตสฺส, วํสโช’ว ฐเปสฺสติ.

๑๖. สตฺตเม ทิวเสเยว, เต ปริพฺพาชเก ตหึ;

ปตฺเต ทิสฺวาน ปุจฺฉิตฺวา, อมจฺจา เต วิชานิย.

๑๗. ตํ ปณฺณุวาสุเทวํ เต, ลํการชฺเชน อปฺปยุํ;

มเหสิยา อภาวาโส, น ตาว อภิเสจยิ.

๑๘. อมิโตทนสกฺกสฺส, ปณฺฑุสกฺโก สุโต อหุ;

ญตฺวา วินาสํ สกฺยานํ, โส อาทาย สกํ ชนํ.

๑๙. คนฺตฺวา อญฺญาปเทเสน, คงฺคาปารํ ตหึ ปุรํ;

มาเปตฺวา ตตฺถ กาเรสิ, รชฺชํ ตสฺส สุเต ลภิ.

๒๐. ธีตา กณิฏฺฐิตา อาสิ, ภทฺทกจฺจาน นามิกา;

สพฺพลกฺขณสมฺปนฺนา, สุรูปา อภิปตฺถิตา.

๒๑. ตทตฺถํ สตฺตราชาโน, ปณฺณากาเร มหารเห;

เปเสสุํ ราชิโน ตสฺส, ภีโต ราชูหิ โส ปน.

๒๒. ญตฺวาน โสตฺถิคมนํ, อภิเสกผลมฺปิ จ;

สหทฺวตฺตึส อิตฺถีหิ, นาวํ อาโรปิยา’สุตํ.

๒๓. คงฺคาย ขิปิ คณฺหาตุ, ปหุ เม ธีตรํ อิติ;

คเหตุํ เต น สกฺขึสุ, นาวาสาปน สีฆคา.

๒๔. ทุติเย ทิวเสเยว, โคณาคามก ปฏฺฏนํ;

ปตฺตาปพฺพชิตา การา, สพฺพา ตา ตตฺถ โอตรุํ.

๒๕. ปุจฺฉิตฺวา นครํ เอตฺถ, ตา กเมโนปยนฺติโย;

อุปติสฺสคามํ สมฺปตฺตา, เทวตา ปริปาลิตา.

๒๖. เนมิตฺตกสฺส วจนํ, สุตฺวา ตตฺถา’คตา ตุ ตา;

ทิสฺวา อมจฺโจ ปุจฺฉิตฺวา, ญตฺวา รญฺโญ สมปฺปยิ.

๒๗. ตํ ปณฺฑุวาสุเทวํ เต, อมจฺจา สุทฺธพุทฺธิโน;

รชฺเช สมภิสิญฺจึสุ, ปุณฺณสพฺพมโนรถํ.

๒๘. สุภทฺทกจฺจาน มโนมรูปินึ;

มเหสีภาเว อภิสิญฺจิย’ตฺตโน;

สหคตา ตาย ปทาสิ อตฺตนา;

สหาคตานํ วสิ ภูมิโป สุขนฺตี.

สุชนปฺปสาท สํเวคตฺถาย กเต มหาวํเส

ปณฺฑุวาสุเทวาภิเสโก นาม

อฏฺฐโม ปริจฺเฉโท.