จตุปญฺญาสติม ปริจฺเฉท

ฉ ราชโกนาม

๑. กตฺวา วิกฺกมฺม พาหู’ติ, นาม ภูปาลสูนุโต;

ตสฺสาณาย ปวตฺตึสุ, สาทรํ สีหฬา ขิลา.

๒. โส ราชา ทมิเฬ หนฺตุํ, ธนํ สญฺจิย’เนกาธา;

สงฺคหํ เสวกานญฺจ, กุรุมาโน ยโถจิตํ.

๓. อลงฺการกิรีฏานิ, ฉตฺตสีหาสนานิ จ;

การยิตฺวา’ภิเสกตฺถํ, สจิเวหา’ภิยาจิโต.

๔. น ยาว ราชรฏฺฐสฺส, คหณํ โหติ ตาว เม;

ฉตฺตุสฺสาปนกมฺเมน, กึ เตนา’ติ วิวาริย.

๕. สตํ นรสหสฺสานํ, สงฺกเลตฺวา มหพฺพโล;

สงฺคามารพฺภ กาลมฺหิ, วาตโรคาภิปีฬิโต.

๖. ยุชฺฌิตุํ สมโย เนติ, ทฺวาทเส วจฺฉเร ลหุํ;

อุเปจฺจ เทวนครํ, คญฺฉิเทวสหพฺยตํ.

๗. กิตฺตินาโม จ สจิโว, เสนาปจฺจมธิฏฺฐิโต;

รชฺชตฺถิโก ทินานฏฺฐ, นิชาณํ สมฺปวตฺตยิ.

๘. ฆาเตตฺวา ตํ มหาลาน-กิตฺตินาโม มหพฺพโล;

ปตฺวา’ภิเสกํ ภุญฺชนฺโต, เทสํ ตํ โรหณวฺหยํ.

๙. สํวจฺฉรมฺหิ ตติเย, โจฬยุทฺเธ ปราชิโต;

สหตฺเถน สกํ สีสํ, ฉินฺทิตฺวา สหสา มริ.

๑๐. ตทาปิเต กิรีฏาทิ-ธนสารํ สมาทิย;

เปเสสุํ ทมิฬา โจฬ-มหีปาลสฺส สนฺติกํ.

๑๑. ภยา สรฏฺฐํ หิตฺวา’ถ, ทุฏฺฐเทเส วสํ ตทา;

เอโก วิกฺกมปณฺฑูติ, วิสฺสุโต ปตฺถิวตฺตโช.

๑๒. วิญฺญาตลงฺกาวุตฺตนฺโต, เทสมาคมฺม โรหณํ;

กาฬติตฺเถ วสํ วสฺส-เมกํ รชฺชมการยิ.

๑๓. รามนฺวยสมุพฺภูโต, ตทายุชฺฌ ปุราคโต;

ชคตี ปาลนาเมน, วิสฺสุโต ภูภุชตฺตโช.

๑๔. รเณ วิกฺกมปณฺฑุตํ, ฆาตาเปตฺวา มหพฺพโล;

ตโต จตฺตาริ วสฺสานิ, รชฺชํ กาเรสิ โรหเณ.

๑๕. ตมฺปิ โจฬารเณ หนฺตฺวา, มเหสึ ธีตรา สห;

วิตฺตสารญฺจ สากลํ, โจฬรฏฺฐมเปสยุํ.

๑๖. ราชา ปรกฺกโม นาม, ปณฺฑุราชสุโต ตโต;

อกา วสฺสทฺวยํ โจฬา, ฆาเตสุํ ตมฺปิ ยุชฺฌิย.

๑๗. อิเม ภุสํ โลภพลาภิภูตา,

คตา อเสสา วิวสา วินาสํ;

อิจฺเจวมญฺญาย สทา สปญฺโญ,

ตณฺหกฺขเยเยว รตึ กเรยฺย.

สุชนปฺปสาทสํเวคตฺถาย กเต มหาวํเส

ฉ ราชโก นาม

จตุปญฺญาสติโม ปริจฺเฉโท.