ติวญฺญาสติม ปจฺเฉท

ลํกาวิโลโปนาม

๑. มหินฺโท ตํ กณิฏฺโฐ โส, ราชปุตฺโต ตทจฺจเย;

อุสฺสาปิย เสตจฺฉตฺต-มนุราธปุเร วเร.

๒. เสน เสนานีนา’นีต เทสนฺตรชนา กุเล;

ตตฺถ วาสมกปฺเปสิ, กิจฺเฉน ทสวจฺฉเร.

๓. อเปตนีติ มคฺคสฺส, มุทุภูตสฺส สพฺพโส;

อุปฺปาทภาคํ นาทํสุ, ตสฺส ชานปทา ตทา.

๔. อจฺจนฺตํ ขีณจิตฺโต โส, วสฺสมฺหิ ทสเม วิภู;

วุตฺติทาเนน นาสกฺขิ, สงฺคเหตุํ สกํ พลํ.

๕. อลทฺธ วุตฺติโน สพฺเพ, เกรฬา สหิตา ตโต;

น วุตฺติทานํ โน ยาว, โหติ มาตาว ภุญฺชตุ.

๖. อิติ ราชฆรทฺวาเร, สาหเสกรสา ภุสํ;

จาปหตา นิสีทึสุ, สนฺนทฺธฉุริกายุธา.

๗. หตฺถสารํ สมาทาย, เต วิวญฺจิย ภูปติ;

อุมฺมคฺคโต วินิคฺคมฺม, ตุริโต โรหณํ อคา.

๘. สีทุปพฺพตคามมฺหิ, ขนฺธวารํ นิพนฺธิย;

ภาตุ ชายมฺม เหสิตฺเต, ฐเปตฺวา โส ตหึ วสี.

๙. น จิรสฺเสว ตสฺสาย, มตา ยสมหีปติ;

มเหสิตฺเต นิเวเสสิ, สกภาตุสฺส ธีตรํ.

๑๐. เทวิยา ตาย สญฺชาเต, สุเต กสฺสปนามเก;

อชฺฌาวุตฺตํ วิหายา’ถ, ขนฺธาวารํ มหีมติ.

๑๑. การยิตฺวาน นครํ, กปฺปคลฺลกคามเก;

อธิปจฺจํ ปวตฺเตนฺโต, โรหเณ สุจิรํ วสี.

๑๒. ตโต เสเสสุ ฐาเนสุ, เกรฬา สีหฬา ตทา;

กณฺณาฏา จ ยถากาม-มาธิปจฺจํ ปวตฺตยุํ.

๑๓. อถสฺส วาณิโช เอโก, ปรตีรํ อิธาคโต;

คนฺตฺวา ปวตฺตึ ลํกาย, โจฬรญฺโญ นิเวทยิ.

๑๔. โสตํ สุณิตฺวา เปเสสิ, ลํกาคหณมานโส;

พลํ มหนฺตํ พลวา, ตํ ขิปฺปํ ลํกโมตริ.

๑๕. ปฏฺฐาโย ติณฺณฐานมฺหา, วิเหเฐนฺตํ พหู ชเน;

อนุกฺกเมน ตํ โจฬ-พลํ โรหณมชฺฌคา.

๑๖. ฉตฺตึเส ราชิโน วสฺเส, มเหสึ รตนานิ จ;

มกุฏญฺจ กมายาตํ, สพฺพมาภรณํ ตถา.

๑๗. อมูลิกญฺจวชิร-วลยํ เทวทตฺติยํ;

อจฺเฉชฺชจฺฉุริกํ ฉินฺน-ปฏฺฏิกา ธาตุกญฺจ เต.

๑๘. ปวิฏฺฐํ วนทุคฺคมฺหิ, ภยาตญฺจ มหีปตึ;

ชีวคฺคาหมคณฺหึสุ, สนฺธิเลสมฺปทสฺสิย.

๑๙. มหีปาลํ ธนํ ตญฺจ, สพฺพํ หตฺถคตํ ตโต;

เปสยึสุ ลหุํ โจฬ-มหีปาลสฺส สนฺติกํ.

๒๐. นิกายตฺติตเย ธาตุ-คพฺเภ ลํกาตเล ขิเล;

มหารเห สุวณฺณาทิ-ปฏิพิมฺเพ จ’นปฺปเก.

๒๑. ภินฺทิตฺวา สหสา สพฺเพ, วิหาเร จ ตหึ ตหึ;

ยโถ โชหาริโน ยกฺขา, ลงฺกายํ สารมคฺคหุํ.

๒๒. เต โจฬา ราชรฏฺฐํ ตํ, ปุลตฺถิปุรนิสฺสิตา;

รกฺขปาสาณกณฺฑวฺห, ฐานาวธิมภุญฺชิสุํ.

๒๓. ตํ กุมารกมาทาย, กสฺสปํ รฏฺฐวาสิโน;

วฑฺเฒนฺติ โจฬภยโต, โคปยนฺตา สุสาทรา.

๒๔. โจฬราชา กุมารํ ตํ, สุตฺวา ทฺวาทสวสฺสิกํ;

คหณตฺถาย เปเสสิ, มหามจฺเจ มหาพเล.

๒๕. อูนํ ปญฺจสหสฺเสน, โยธลกฺขํ สมาทิย;

สพฺพํ เต โรหณํ เทสํ, สงฺโขเภสุ มิโต ตโต.

๒๖. กิตฺตินาโม’ถ สจิโว, มกฺขกุทฺรูสวาสิโก;

มุทฺธนาโม ตถามจฺโจ, มารคลฺลกวาสิโก.

๒๗. อุโภปิ เต มหาวีรา, ยุทฺโธปายวิจกฺขณา;

โจฬเสนํ วินาเสตุ-มจฺจนฺตกตนิจฺฉยา.

๒๘. ปลุฏฺฐคิรินามมฺหิ, ฐาเน ทุคฺเค นิเวสิย;

กตฺวา ฉมาสํ สงฺคามํ, หนึสุ ทมิเฬ พหูํ.

๒๙. หตาวสิฏฺฐา โจฬาตา, รเณ ตสฺมึ ภยทฺทิตา;

ปลายิตฺวา ยถาปุพฺพํ, ปุลตฺติปุรมาวสุํ.

๓๐. กุมาโร ชยิโต ทิสฺวา, อุโภ เต สจิเว ตทา;

หฏฺฐตุฏฺโฐ ‘‘วรํ ตาตา, คณฺหถา’’ติ ส จพฺรวี.

๓๑. พุทฺโธ ปเวณิคามํ โส, วรํ ยาจิตฺถ กิตฺติโก;

สงฺฆิกํ คหิตํ ภาคํ, วิสฺสชฺเชตุํ วรํ วริ.

๓๒. ราชปุตฺตวราลทฺธ-วรา’มจฺจวรา ตทา;

นิทฺทรา สาทรา วีรา, ปาเท วนฺทึสุ ตสฺส เต.

๓๓. ราชา ทฺวาทสวสฺสานิ, วสิตฺวา โจฬมณฺฑเล;

อฏฺฐตาลีสวสฺสมฺหิ, มหินฺโท โส ทิวํคโต.

๓๔. ปมาท โทสานคเตน เอวํ,

ลทฺธา’ปิ โภคานนถิรา ภวนฺติ;

อิจฺจปฺปมํทํ หิตมาสสาโน,

นิจฺจํ สุวิญฺญูสุสมา จเรยฺย.

สุชนปฺปสาทสํเวคตฺถาย กเต มหาวํเส

ลํกาวิโลโป นาม

ติปญฺญาสติโม ปริจฺเฉโท.