เตจตฺตาลีสติม ปริจฺเฉท

จตุราชโก

๑. ตโต วิชิตสงฺคาโม, กสฺสโป ปุริตาสโย;

มหาปาฬิมฺหิ สงฺฆสฺส, สมิทฺธํ โภชนํ อกา.

๒. นาคสาลา นิวาสึ โส, มหาธมฺมกถึ ยตึ;

มหาปูชาย ปูเชตฺวา, สทฺธมฺมํ เตน วาจยิ.

๓. วสนฺตํ ภาตุอาวาเส, สมุทฺทิสฺส ลิขาปยิ;

กฏนฺธการวาสึ โส, ปาฬิ สพฺพํ สสงฺคหํ.

๔. ชิณฺณํ สงฺขริกมฺมญฺจ, นวํ กาเรสิ เจติเย;

สงฺฆโภคมเนกญฺจ, ตตฺถ ตตฺถ ปวตฺตยิ.

๕. นานามณิสมุชฺโชตํ, กาสิ จูฬมณิตฺตยํ;

สตํ ปณฺฑุปลาสานํ, วตฺถทาเนน ตปฺปยิ.

๖. ตสฺสาสุํ พหโว ปุตฺตา, เชฏฺโฐ เตสญฺจ มาณโก;

สพฺเพ เต น วยปฺปตฺตา, พาลาวิคตพุทฺธิโน.

๗. ตโต โส พฺยาธินา ผุฏฺโฐ, อเตกิจฺเฉน เกนจิ;

ปุตฺตา เม พาลกา สพฺเพ, เน’เต รชฺชกฺขมา อิติ.

๘. วสนฺตํ โรหเณ เทเส, ภาคิเนยฺยํ มหามตึ;

อาหุย สพฺพํ ปาทาสิ, รชฺชํ ปุตฺเตหิ อตฺตโน.

๙. คนฺธมาลาทิปูชาหิ, ปูชยิตฺวาน เจติเย;

ภิกฺขุสงฺฆํ ขมาธปสิ, ทตฺวาน จตุปจฺจยํ.

๑๐. เอวํ ธมฺมํ จริตฺวาน, มิตฺตามจฺจชเนสุ จ;

คโต นวหิ วสฺเสหิ, ยถากมฺมํ นราธิโป.

๑๑. กตฺวา กตฺตพฺพกิจฺจํ โส, มาตุลสฺส สคารโว;

สงฺคหนฺโต ชนํ มาโณ, ทมิเฬ นีหราปยิ.

๑๒. เอกโต ทมิฬา หุตฺวา, นิพฺพาเสม อิมํ อิติ;

ตสฺมึ ฐิเต พหิทฺธาว, อคฺคเหสุํ ปุรํ สยํ.

๑๓. หตฺต ทาฐสฺส เปเสสิ, ชมฺพุทีปคตสฺส เต;

อาคนฺตุํตว กาโลติ, สาสนํ รชฺชคาหเณ.

๑๔. มาโณ’ปิ สงฺฆํ เปเสสิ, สาสนํ ปิตุโรหณํ;

ปิตา สุตฺวาน ตํ อาคา, น จีเรเนว โรหณา.

๑๕. อุเภ เต มนฺตยิตฺวาน, อกํสุ สนฺธิเลสกํ;

อุมิเฬหิ ตโต ชาตา, สพฺเพ เต สมวุตฺติโน.

๑๖. ตโต โส ปิตรํ รชฺเช, อภิสิญฺจิตฺถ มาณโก;

โส’ภิสิตฺโต นิกายานํ, สหสฺสานํ ตยํ อทา.

๑๗. สงฺฆํ รฏฺฐญฺจ สงฺคยฺห, สพฺพํ ราชกุลฏฺฐิตํ;

ภณฺฑํ เปเสสิ สตฺตูหิ, รกฺขณตฺถาย โรหณํ.

๑๘. หตฺถทาโฐปิ สุตฺวาน, ทมิฬานํ ตุ สาสนํ;

ขเณนา’คา อิมํ ทีปํ, คเหตฺวา ทมิฬฺหํ พลํ.

๑๙. ตทา เต ทมิฬา สพฺเพ, ปริภูตา อิธ ฐิตา;

อายนฺตเมว ตํ คนฺตฺวา, ปริวาเรสุ มญฺชเส.

๒๐. มาโณปิ สุตฺวา ตํ สพฺพํ, นายํ กาโลติ ยุชฺฌิตุํ;

เปเสตฺวา ปิตุราชานํ, สทฺธึ สาเรน โรหณํ.

๒๑. ปุพฺพเทสํ สยํ คนฺตฺวา, สงฺคณฺหนฺโต ชนํ วสี;

ลทฺธา ทมิฬปกฺขํ โส, คเหตฺวา ราชกํ ปุรํ.

๒๒. ทาโฐปติสฺโส ราชาติ, นามํ สาเวติ อตฺตโน;

มาตุลํ วิย ตํ โลโก, เตน นาเมน โวหริ.

๒๓. ปิตุจฺฉปุตฺตมาเนตฺวา, อคฺคโพธิ สนามกํ;

ฐเปตฺวา ยุวราชตฺเต, เทสญฺจา’ทาสิ ทกฺขิณํ.

๒๔. ฐานนฺตรญฺจ ปาทาสิ, นิสฺสิตานํ ยถารหํ;

สาสนสฺส จ โลกสฺส, สพฺพํ กตฺตพฺพมาจริ.

๒๕. มหาปาฬิมฺหิ ทาเปสิ, สวตฺถํ ทธิภตฺตกํ;

ขีรํ ปายาสกญฺเจว, ธมฺมํ สุณิ อุโปสถิ.

๒๖. กาเรตฺวา สพฺพปูชาโย, เทสา เปตฺวาน เทสนํ;

เอวมาทีหิ ปุญฺเญหิ, อตฺตานํ’กาสิ ภทฺทกํ.

๒๗. กสฺสปสฺส วิหารสฺส, ทตฺวาเสนวฺหคามกํ;

มหาคลฺลญฺจ ปาทาสิ, ปธานฆรกสฺส โส.

๒๘. ปริเวณสฺส โมรสฺส, อกาสิ สกคามกํ;

ถูปารามสฺส ปุณฺโณฬึ, ทตฺวา สกฺกาสิ เจติยํ.

๒๙. กปฺปูรปริเวณํ โส, กาเรสิ อภยุตฺตเร;

วิหารํ ติปุถุลฺลวฺหํ, กตฺวา ตสฺเสว ทาปยิ.

๓๐. ตสฺมึ กโรนฺเต วาเรสุํ, สีมายนฺโต’ติ ภิกฺขโว;

เถริยา เต กิพาเหตฺวา, พลํ ตเถว การยิ.

๓๑. อถ เต เต เถริยา ภิกฺขู, ทุมฺมญฺญู ตตฺถ ราชินิ;

อสฺสทฺธํ ตํ วิทิตฺวาน, ปตฺตนิกฺกุชฺชนํ กรุํ.

๓๒. วุตฺตญฺหิ มุนินา เตน, อสฺสทฺโธ โย อุปาสโก;

อลาภาย จ ภิกฺขูนํ, เจเตต’กฺโกสติ จ เต.

๓๓. ปตฺตนิกุชฺชนํ ตสฺส, กตฺตพฺพนฺติ ตโต หิ เต;

ตสฺส ตํ กมฺมมกรุํ, โลโก มญฺญิตฺถ อญฺญถา.

๓๔. อาทายุ กุชฺชิตํ ปตฺตํ, จรนฺโต ภิกฺขุภิกฺขกํ;

นิกุชฺเชยฺย ฆรทฺวาเร, ตสฺสา’ติ กถิกํ กรุํ.

๓๕. ตสฺมึ โส สมเย ผุฏฺโฐ, พฺยาธินา มหตามริ;

วสฺสมฺหิ นวเม ราชา, สมฺปตฺโต ชีวิตกฺขยํ.

๓๖. ทปฺปุโลปิ ตโต ราชา, คโต โรหณกํ สกํ;

วาสํ กปฺเปสิ ตตฺเถว, กโรนฺโต ปุญฺญสญฺจยํ.

๓๗. อิโต ปฏฺฐาย วกฺขาม, ตสฺส วํสมนากุลํ;

วุจฺจมานมฺหิ เอตฺเถว, ตสฺมึ โหติ อสงฺกโร.

๓๘. ชาโต โอกฺกากวํสมฺหิ, มหาติสฺโสติ วิสฺสุโต;

อาสิ เอโก มหาปุญฺโญ, สมากิณฺณคุณากโร.

๓๙. ตสฺเส’กา ภริยา อาสิ, สงฺฆปิวาติ วีสฺสุตา;

ธญฺญปุญฺญคุณูเปตา, ธีตา โรหณสามิโน.

๔๐. ตสฺสาปุตฺตา ตโย อาสุํ, ปฐโม อคฺคเพธิโก;

ทุติโย ทปฺปุโล นาม, ตติโย มณิอกฺขิโก.

๔๑. เอกาว ธีตา ตสฺสาสิ, ราชนมคมา จ สา;

เชฏฺโฐ โรหณนามสฺส, เทสสฺสา’สิ สยํ วสี.

๔๒. มหาปาฬึ ส กาเรสิ, มหาคาเม มหาธโน;

ทาฐคฺคโพธินามญฺจ, ปริเวณํ ตหิ วํโส.

๔๓. กาณคามมฺหิ กาณานํ, คิลานานญฺจ สาลเก;

วิหาเร ปฏิมาเวฺห จ, มหนฺตํ ปฏิมาฆรํ.

๔๔. ปติฏฺฐเปสิ กตฺวาน, พุทฺธตตฺถ สิลามยํ;

มหนฺตนามํ สปฺปญฺโญ, อิทฺธีหิ วิย นิมฺมิตํ.

๔๕. สาลวาณญฺจ กาเรสิ, วิหารํ อตฺตนามกํ,

ปริเวณวิหารญฺจ, ตถา กาชรคามกํ.

๔๖. นวกมฺมานิ กาเรตฺวา, ธมฺมสาลวิหารเก;

สยํ วจฺจกุฏี เอส, ตตฺถ โสเธสิ พุทฺธิมา.

๔๗. อุจฺจิฏฺฐํ ภิกฺขุสงฺฆสฺส, โภชนํ ปริภุญฺชิย;

มณฺฑคามญฺจ สงฺฆสฺส, คามํ’ทาสิ มสาทวา.

๔๘. ปุญฺญาเน’ตานิจญฺญานิ, กตฺวา ตสฺมึ ทิวงฺคเต;

อาสี ตสฺสา’นุโช ตตฺถ, สามิ ทปฺปุลนามโก.

๔๙. อิสฺเสรํ ตตฺถ วตฺเตสิ, สมฺปมทฺทิย สตฺต โว;

มหาทานํ ปวตฺเตสิ, นิสฺสงฺกํ โรหณํ อคา.

๕๐. ตสฺส ตุฏฺโฐ ชโน อาห, มหาสามีติ เอสโน;

ตโต ปฏฺฐาย ตํ โลโก-มหาสามีติ โวหริ.

๕๑. สุตฺวาน ตํ สิลาทาโฐ, นรินฺโท สกธีตรํ;

ตสฺส ปาทาสิ สนฺตุฏฺโฐ, คุเณหิ พหุเกหิ จ.

๕๒. ยุชราชตฺตมสฺสาทา, รชฺชโยคฺโคติ มานิตุํ;

มาณวมฺมาทโย ตสฺส, ปุตฺตา อาสุํ มหาสยา.

๕๓. ปาสาณทิปวาสิสฺส, มหาเถรสฺส สนฺติเก;

ธมฺมํ สุตฺวา ปสีทิตฺวา, ตสฺมึ ตํ พหุมานิตุํ.

๕๔. วิหารํ โรหเณ กตฺวา, ตสฺส ปาทาสิ โสปิ ตํ;

จาตุทฺทิสิยสงฺฆสฺส, ปริโภคาย วิสฺสชฺชิ.

๕๕. อมฺพมาลา วิหาราทิ, วิหาเร การยิ พหู;

ขทิราลิวิหารญฺจ, กตฺวา เทว มปูชยิ.

๕๖. ปาสาทมนุรารามํ, มุตฺโตลมฺพํ สุชิณฺณกํ;

สีริวฑฺฒญฺจ ปาสาทํ, ตถา ตกฺกมฺพิลํ ปรํ.

๕๗. โสเธตฺวา ภิกฺขโว ตตฺถ, ทฺวตฺตึส ปริวาสยิ;

สพฺพปจฺจยทาเนน, สนฺตปฺเปตฺวา มหีมติ.

๕๘. อทา เกวฏฺฏคมฺภีรํ, คามํ นาควิหารเก;

ตถา ราชวิหารสฺส, โคนฺนคามํ สมาทิยิ.

๕๙. อทา ตีสวิหารสฺส, ตถากนฺติกปพฺพกํ;

จิตฺตลปพฺพตสฺสา’ทา, คามํ โส โคนฺนวิฏฺฐิกํ.

๖๐. ทตฺวา ริยากรสฺเสส, คามํ โสมาลวตฺถุกํ;

อกาสิ ปฏิมาเคหํ, ตเถว สุมโนหรํ.

๖๑. ตตฺรฏฺฐสฺส ชินสฺสา’กา, อุณฺณโลมํ มหคฺฆิยํ;

เหมปฏฺฏญฺจ กาเรสิ, สพฺพํ ปูชาวิธึ ส’กา.

๖๒. เจติเย ปริชิณฺเณ โส, สุธากมฺเมน รญฺชยิ;

ติปญฺจหตฺถํ กาเรสิ, เมตฺเตยฺยํ สุคตํ ปรํ.

๖๓. เอวมาทินิ ปุญฺญานิ, อปฺปเมยฺยานิ โส วิภู;

อกาสิ จ สยํ สาธุ, ปริวาเรหี การยิ.

๖๔. ปริวารา จ ตสฺสาสุํ, พหูปุญฺญกรา นรา;

วิหารา เนกกา อาสุํ, กตา เตหิ สปฺปจฺจยา.

๖๕. กทาจิ มคฺคํ คจฺฉํ โส, อรญฺญมฺหิ อคามเก;

เสนํ สํวิทหิตฺวาน, วาสํ กปฺเปสิ รตฺติยํ.

๖๖. สุนหาตวิลฺลิตฺโต โส, สุภุตฺโตสยเน สุเข;

นิปนฺเนสุ ฆเร รมฺเม, นิทฺทายิตุมุปกฺกมิ.

๖๗. อลภนฺโต ตทา นิทฺทํ, กินฺนุ โข อิติ การณํ;

ปวตฺตึ อุปธาเรนฺโต, ทิวเส สพฺพมตฺตโน.

๖๘. อทิสฺวา การณํ อนฺโต, อวสฺสํ พหิ เหสฺสติ;

อิติ จินฺติย โยเชสิ, มนุสฺเสตํ คเวสิตุํ.

๖๙. เอวมาห จ นิสฺสงฺกํ, อยฺยกา มม รตฺติยํ;

เตเมนฺตา รุกฺขมูลสฺมึ, ฐิตา อาเนถ เต อิติ.

๗๐. เตปิ คนฺตฺวา คเวสนฺตา, ทีปหตฺถา มหาชนา;

มหาคามา’คเต ภิกฺขู, รุกฺขมูลคเต ตทา.

๗๑. เต คนฺตฺวา สาสนํ รญฺโญ, อาโรเจสุํ ปธาวิโส;

ทิสฺวา จ ภิกฺขุ สนฺตุฏฺโฐ, เนตฺวา วาสฆรํ สกํ.

๗๒. นิจฺจทานาย ภิกฺขูนํ, ฐปิเต รตฺตจีวเร;

เตสํ ทตฺวาน ตินฺตานิ, จีวรานิ สมาทิย.

๗๓. สุกฺขาปิย จ กตฺวาน, ปาทโธวนกาทิกํ;

นิสีทาปิย เต สพฺเพ, สยเน สาธุ สนฺถเต.

๗๔. เภสชฺชํ ปฏิยาเทตฺวา, สยเมโว’ปนามิย;

ปจฺจูเสปิ จ กตฺวาน, กตฺตพฺพํ โภชนาทิกํ.