จตุตฺถ ปริจฺเฉท

ทุติย สํคีติ

๑. อชาตสตฺตุ ปุตฺโต ตํ, ฆาเตตฺวา’ทายิ ภทฺทโก;

รชฺชํ โสฬสวสฺสานิ, กาเรสิ มิตฺตทูภิโก.

๒. อุทยภทฺท ปุตฺโต ตํ, ฆาเตตฺวา อนุรุทฺธโก;

อนุรุทฺธสฺส ปุตฺโต ตํ, ฆาเตตฺวา มุณฺฑนามโก.

๓. มิตฺตทฺทุโน ทุมฺมติโน, เต’ปิ รชฺชมการยุํ;

เตสํ อุภินฺนํ รชฺเชสุ, อฏฺฐวสฺสาน’ติกฺกมุํ.

๔. มุณฺฑสฺส ปุตฺโต ปิตรํ, ฆาเตตฺวา นาคทาสโก;

จตุวีสติวสฺสานิ, รชฺชํ กาเรสิ ปาปโก.

๕. ปิตุฆาตกวํโส’ย, มีติกุทฺธา’ถ นาครา;

นาคทาสก ราชานํ, อปเนตฺวา สมาคตา.

๖. สุสุนาโคติ ปญฺญาตํ, อมจฺจํ สาธุสมฺมตํ;

รชฺเช สมภิสิญฺชึสุ, สพฺเพสํ หิตมานสา.

๗. โส อฏฺฐารสวสฺสานิ, ราชา รชฺชมการยิ;

กาฬาโส โก ตสฺส ปุตฺโต, อฏฺฐวีสติ การยิ.

๘. อตีเต ทสเม วสฺเส, กาฬาโสกสฺส ราชิโน;

สมฺพุทฺธปรินิพฺพานา, เอวํ วสฺสสตํ อหุ.

๙. ตทา เวสาลิยา ภิกฺขู, อเนกา วชฺชิปุตฺตกา;

สิงฺคีโลณํ ทฺวงฺคุลญฺจ, ตถา คามนฺตรมฺมิ จ.

๑๐. อาวาสา’นุมตา’จิณฺณํ, อมถิตํ ชโลคิ จ;

นิสีทนํ อทสกํ, ชาตรูปาทิกํ อิติ.

๑๑. ทสวตฺถูนิ ทีเปสุํ, กปฺปนฺตีติ อลชฺชีโน;

ตํ สุตฺวาน ยสตฺเถโร, เอวํ วชฺชีสุ จาริกํ.

๑๒. ฉฬภิญฺโญ พลปฺปตฺโต, ยโส กากณฺฑกตฺรโช;

ตํ สเมตุํ สอุสฺสาโห, ตตฺถาคมิ’มหาวนํ.

๑๓. ฐเปตฺวา’โปสถคฺเค เต, กํสปาตึ สโหธกํ;

กหาปณาทึ สงฺฆสฺส, เทถ’นา’หุ อุปาสเก.

๑๔. น กปฺปเต ตํ มา เทถ, อิติ เถโร สวารยิ;

ปฏิสารณียํ กมฺมํ, ยสตฺเถรสฺส เต กรุํ.

๑๕. ยาจิตฺวา อนุทูตํ โส, สห เตน ปุรํ คโต;

อตฺตโน ธมฺมวาทิตฺตํ, สญฺญาเปตฺวา’ค สาคเร.

๑๖. อนุทูตวโจ สุตฺวา, ตมุกฺขิปิตุมาคตา;

ปริกฺขิปิย อฏฺฐํสุ, สรํ เถรสฺส ภิกฺขโว.

๑๗. เถโร อุคฺคมฺม นภสา, คนฺตฺวา โกสมฺพิยํ ตโต;

ปาเวยฺยกา วนฺติกานํ, ภิกฺขูนํ สนฺติกํ ลหุํ.

๑๘. เวเสสิ ทูเตตุ สยํ, คนฺตฺวา’โห คงฺคปพฺพตํ;

อาห สมฺภูตตฺเถรสฺส, ตํ สพฺพํ สาณวาสิโน.

๑๙. ปาเวยฺยกา สฏฺฐิเถรา, อสิตา’วนฺติกาปิ จ;

มหาขีณาสวา สพฺเพ, อโหคงฺคมฺหิ โอตรุํ.

๒๐. ภิกฺขโว สนฺนิปติตา, สพฺเพ ตตฺถ ตโต ตโต;

อาสุํ นวุติสหสฺสานิ, มนฺเตตฺวา อขิลา’ปิ เต.

๒๑. โสเรยฺย เรวตตฺเถรํ, พหุสฺสุต มนาสวํ;

ตํ กาลปมุขํ ญตฺวา, ปสฺสิตุํ นิกฺขมึสุ ตํ.

๒๒. เถโร ตมฺมนฺตนํ สุตฺวา, เวสาลึ คนฺตุเมว โส;

อิจฺฉนฺโต ผาสุคมนํ, ตโต นิกฺขมิ ตงฺขณํ.

๒๓. ปาโต ปาโตว นิกฺขนฺต-ฏฺฐานํ เตน มหตฺตนา;

สายํ สายมุเปนฺตานํ, สหโชติยมทฺทสุํ.

๒๔. ตตฺถ สมฺภูตตฺเถเรน, ยสตฺเถโร นิโยชิโต;

สทฺธมฺมสวนนฺเต ตํ, เรวตเถร มุตฺตมํ.

๒๕. อุเปจฺจ ทสวตฺถูนิ, ปุจฺฉิ เถโร ปฏิกฺขิปิ;

สุตฺวา’ธิกรณํ ตญฺจ, นิเสเธมาติ อพฺรวิ.

๒๖. ปาปาปิ ปกฺขํ เปกฺขนฺตา, เรวตตฺเถร มุตฺตมํ;

สามณกํ ปริกฺขารํ, ปฏิยาทิย เต พหุํ.

๒๗. สีฆํ นาวาย คนฺตฺวาน, สหชาติสมีปคา;

กโรนฺติ ภตฺตวิสฺสคฺคํ, ภตฺตกาเล อุปฏฺฐิเต.

๒๘. สหชาตึ อาวสนฺโต, สาฬเถโร วิจินฺติยา;

ปาเวยฺยกา ธมฺมวาที, อิติ ปสฺสิ อนาสโว.

๒๙. อุเปจฺจ ตํ มหาพฺรหฺมา, ธมฺเม นิฏฺฐาติ อพฺรวิ;

นิจฺจํ ธมฺเม ฐิตตฺตํ โส, อตฺตโน ตสฺส อพฺรวิ.

๓๐. เต ปริกฺขารมาทาย, เรวตตฺเถรมทฺทสุํ;

เถโร น คณฺหิ ตปฺปกฺข-คาหี สิสฺสํ ปณามยี.

๓๑. เวสาลึ เต ตโต คนฺตฺวา, ตโต ปุปฺผปุรํ คตา;

วทึสุ กาฬาโสกสฺส, นรินฺทสฺส อลชฺชีโน.

๓๒. สตฺถุสฺส โน คนฺธกุฏึ, โคปยนฺโต มยํ ตหึ;

มหาวนวิหารสฺมึ, วสาม วชฺชีภูมิยํ.

๓๓. คณฺหิสฺสาม วิหาร’นฺติ, คามวาสิกสิกฺขโว;

อาคจฺฉนฺติ มหาราช, มฏิเสธย เต อิติ.

๓๔. ราชานํ ทุคฺคหิตํ เต, กตฺวา เวสาลิมาคมุํ;

เรวตตฺเถร มูลมฺหิ, สหชาติยเมตฺถ ตุ.

๓๕. ภิกฺขู สตสหสฺสานิ, เอกาทส สมาคตา;

นวุติญฺจ สหสฺสานิ, อหุ ตํ วตฺถุ สนฺติยา.

๓๖. มูลฏฺเฐหิ วินา วตฺถุ-สมนํ เนว โรจยิ;

เถโร สพฺเพปิ ภิกฺขู เต, เวสาลิมาคมุํ ตโต.

๓๗. ทุคฺคหิโตว โส ราชา, ตตฺถามจฺเจ อเปสยิ;

มูฬา เทวานุภาเวน, อญฺญตฺถ อคมึสุ เต.

๓๘. เปเสตฺวา เต มหีปาโล, ตํ รตฺตึ สุปิเนนโส;

อปสฺสิ สกมตฺตานํ, ปกฺขิตฺตํ โลหกุมฺภิยํ.

๓๙. อติภีโต อหุ ราชา, ตมสฺสา เสตุ มาคมา;

ภคินี นนฺทเถรี ตุ, อากาเสน อนาสวา.

๔๐. ภาริยํ เต กตํ กมฺมํ, ธมฺมิเก’ยฺเย ขมาปย;

ปกฺโข เตสํ ภวิตฺวา ตฺวํ, กุรุ สาสนปคฺคหํ.

๔๑. เอวํ กเต โสตฺถิ ตุยฺหํ, เหสฺสตีติ อปกฺกมิ;

ปสาเตเยว เวสาลึ, คนฺตุํ นิกฺขมิ ภูปติ.

๔๒. คนฺตฺวา มหาวนํ ภิกฺขู-สงฺฆํ โส สนฺนิปาติย;

สุตฺวา อุภินฺนํ วาทญฺจ, ธมฺมปกฺขญฺจ โรจิย.

๔๓. ขมาเปตฺวา ธมฺมิเก เต, ภิกฺขู สพฺเพ มหีปติ;

อตฺตโน ธมฺมปกฺขตฺตํ, วตฺวา ตุเมฺห ยถารุจิ.

๔๔. สมฺปคฺคหํ สาสนสฺส, กโรถาติ จ ภาสิย;

ทตฺวา จ เตสํ อารกฺขํ, อคมาสิ สกํ ปุรํ.

๔๕. นิจฺเฉตุํ ตานิ วตฺถูนิ, สงฺโฆ สนฺนิปตี ตทา;

อนคฺคานิ ตตฺถ ภสฺสานิ, สงฺฆมชฺเฌ อชายิสุํ.

๔๖. ตโต โส เรวตตฺเถโร, สาเวตฺวา สงฺฆมชฺฌโค;

อุพฺภาหิกาย ตํ วตฺถุํ, สเมตุํ นิจฺฉยํ อกา.

๔๗. ปาจินเกจ จตุโร, จตุโร ปาเวยฺยเกปิ จ;

อุพฺภาหิกาย สมฺมนฺนิ, ภิกฺขู ตํ วตฺถุ สนฺติยา.

๔๘. สพฺพกามี จ สาโฬฺห จ, ขุชฺชโสภิตนามโก;

วาสภคามิโก จาติ, เถโร ปาจินกา อิเม.

๔๙. เรวโต สาณสมฺภูโต,

ยโส กาโกณฺฑกตฺรโช;

สุมโน จาติ จตฺตาโร,

เถรา ปาเวยฺยกา อิเม.

๕๐. สเมตุํ ตานิ วตฺถูนิ, อปฺปสทฺทํ อนากุลํ;

อคมุํ วาลุการามํ, อฏฺฐตฺเถรา อนาสวา.

๕๑. ทหเรนา’ชิ เต เนตฺถ, ปญฺญตฺเต อาสเน สุเภ;

นิสีทึสุ มหาเถรา, มหามุนิ มตญฺญุโน.

๕๒. เตสุ วตฺถูสุ เอเกกํ, กมโต เรวโต มหา;

เถโร เถรํ สพฺพกามึ, ปุจฺฉิ ปุจฺฉาสุ โกวิโท.

๕๓. สพฺพกามี มหาเถโร, เตน ปุฏฺโฐ’ถ พฺยากริ;

สพฺพานิ ตานิ วตฺถูนิ, น กปฺปนฺตีติ สุตฺตโต.

๕๔. นิหนิตฺวา’ธิกรณํ, ตํ เต ตตฺถ ยถากฺกมํ;

ตเถว สงฺฆมชฺเฌปิ, ปุจฺฉาวิสฺสชฺชนํ กรุํ.

๕๕. นิคฺคหํ ปาปภิกฺขูนํ, ทสวตฺถุกทีปนํ;

เตสํ ทสสหสฺสานํ, มหาเถโร อกํสุ เต.

๕๖. สพฺพกามี ปุถวิยา, สงฺฆตฺเถโร ตทา อหุ;

โส วีสํ วสฺสสติโก, ตทา’สิ อุปสมฺปทา.

๕๗. สพฺพกามี จ สาโฬฺห จ,

เรวโต ขุชฺชโสภิโต;

ยโส กาโกณฺฑกสุโต,

สมฺภูโต สาณวาสิโก.

๕๘. เถรา อานนฺทตฺเถรสฺส, เอเต สทฺธิวิหาริโน;

วาสภคามิโก เจว, สุมโน จ ทุเว ปน.

๕๙. เถรา’นุรุทฺธตฺเถรสฺส, เอเต สทฺธิวิหาริโน;

อฏฺฐ เถรา’ปิ ธญฺญา เต, ทิฏฺฐปุพฺพา ตถาคตํ.

๖๐. ภิกฺขู สตสหสฺสานิ, ทฺวาทสาสุํ สมาคตา;

สพฺเพสํ เรวตตฺเถโร, ภิกฺขูนํปมุโขตทา.

๖๑. ตโต โส เรวตตฺเถโร, สทฺธมฺมฏฺฐิติยา จิรํ;

กาเรตุํ ธมฺมสํคีตึ, สพฺพภิกฺขุสมูหโต.

๖๒. ปภินฺนตฺถาทิญาณานํ, ปิฏกตฺตยธารินํ;

สตานิ สตฺตภิกฺขูนํ, อรหนฺตานมุจฺจินิ.

๖๓. เต สพฺเพ วาลุการาเม, กาฬาโสเกน รกฺขิตา;

เรวตตฺเถรปาโมกฺขา, อกรุํ ธมฺมสงฺคหํ.

๖๔. ปุพฺเพ กตํ ตถา เอว, ธมฺมํ ปจฺฉา จ ภาสิตํ;

อาทาย นิฏฺฐเปสุํ ตํ, เอตํ มาเสหิ อฏฺฐหิ.

๖๕. เอวํ ทุติยสํคีตึ, กตฺวา เตปิ มหายสา;

เถรา โทสกฺขยํ ปตฺตา, ปตฺตากาเลน นิพฺพุตึ.

๖๖. อิติ ปรมมตีนํ ปตฺติปตฺตพฺพกานํ,

ติภวหิตกรานํ โลกนาเถรสานํ;

สุมริยมรณํ ตํ สงฺขตา สารกตฺตํ,

ปริคณิยมเสสํ อปฺปมตฺโต ภเวยฺยาติ.

สุชนปฺปสาทสํเวคตฺถาย กเต

มหาวํเส ทุติยสํคีติ นาม

จตุตฺโถ ปริจฺเฉโท.