เอกูนจตฺตาลีสติม ปริจฺเฉท

ราชทฺวยทีปโน

๑. ตโต กสฺสปนาโม โส, ปาปโก นรปาลโก;

อสฺส โค ปญฺจสูทญฺจ, เปสยิตฺวาน ภาติกํ.

๒. มาราเปตุํ อสกฺโกนฺโต, ภีโต สีหคิรึ คโต;

ทุราโรหํ มนุสฺเสหิ, โสธาเปตฺวา สมนฺตโต.

๓. ปากาเรน ปริกฺขิปฺป, สีหากาเรน การยิ;

ตตฺถ นิสฺเสณิ เคหานิ, เตน ตํ นามโก อหู.

๔. สํหริตฺวา ธนํ ตตฺถ, นิทหิตฺวา สุโคปิตํ;

อตฺตโน นิหิตานํ โส, รกฺขํ ทตฺวา ตหึ ตหึ.

๕. กตฺวา ราชฆรํ ตตฺถ, ทสฺสเนยฺยํ มโนรมํ;

ทุติยาลกมนฺทํว, กุเวโรว ตหึ วสิ.

๖. มิคาโร นาม กาเรสิ, เสนาปติ สนามกํ;

ปริเวณํ ตถาเคห-มภิเสกชินิสฺส จ.

๗. ตสฺสาภิเสกํ ยาจิตฺวา, สิลาสมฺพุทฺธโต’ธิรํ;

อลทฺธาสามิ โน รชฺเช, ชานิสฺสามีติ สณฺฐหิ.

๘. หุตฺวา วิปฺปฏิสารี โส, อตฺตนา กตกมฺมนา;

มุจฺจิสฺสามิ กตํ นุ’ติ, ปุญฺญํ กาสิ อนปฺปกํ.

๙. มหา วตฺถุนิ กาเรสิ, ทฺวาเรสุ นครสฺส โส;

อมฺพุยฺยาเน จ กาเรสิ, ทีเป โยชน โยชเน.

๑๐. อิสฺสรสมณารามํ, กาเรตฺวา ปุพฺพวตฺถุโต;

อธิกํ โภคคาเม จ, อธิกํ ตสฺส ทาปยิ.

๑๑. โพธิ อุปฺปลวณฺณา จ, ตสฺสาสุํ ธีตโร ทุเว;

วิหารสฺส’สฺส กาเรสิ, นามํ ตาสญฺจ อตฺตโน.

๑๒. เทนฺเต ตสฺมึ น อิจฺฉึสุ, สมณา เถรวาทิโน;

‘‘ปิตุฆาติสฺส กมฺม’’นฺติ, โลกคารยฺห ภีรุโน.

๑๓. ทาตุกาโมส เตสํ’ว, สมฺพุทฺธ ปฏิมาย’ทา;

ภิกฺขเว อธิวาเสสุํ, โภโค โน สตฺถุโน อิติ.

๑๔. กถา นิยฺยนฺติ อุยฺยาเน, สมีเป ปพฺพตสฺส โส;

การาเปสิ วิหารํ โส, เตสํ นาโม ตโต อหุ.

๑๕. อทา ธมฺมรุจินํ ตํ, สมฺปตฺต จตุปจฺจยํ;

วิหารญฺเจว อุยฺยานํ, ทิสาภาคมฺหิ อุตฺตเร.

๑๖. ภตฺตํ สนีรปกฺกํ โส, ภุญฺชิตฺวา ทินฺนมิตฺถิยา;

สปฺปิยุตฺตํ มนุญฺเญหิ, สูเปหิ อภิสงฺขตํ.

๑๗. มนุญฺญมิทมยฺยานํ, ทสฺสเมวนฺติ ตาทิสํ;

ภตฺตํ ปาทาสิ ภิกฺขูนํ, สพฺเพสญฺจ สจีวรํ.

๑๘. อุโปสถมธิฏฺฐาสิ, อปฺปมญฺญญฺจ ภาวยิ,

สมาทิยิ ธุตงฺเค จ, ลิขาเปสิ จ โปตฺถเก.

๑๙. ปฏิมาทาน สาลาทึ, การาเปสิ อนปฺปกํ;

ภิโต โส ปรโลกมฺหา, โมคฺคลฺลานา จ วตฺตติ.

๒๐. ตโต อฏฺฐารเส วสฺเส, โมคฺคลฺลาโน มหาภโฏ;

อาเทเสน นิคณฺฐานํ, ทฺวาทสคฺคสหาย วา.

๒๑. ชมฺพุทีปา อิธาคมฺม, เทเส อมฺพฏฺฐโกลเก;

กุฬารี นาเม พนฺธิตฺถ, วิหาเร พลสญฺจยํ.

๒๒. ราชา สุตฺวา คเหตฺวา ตํ, ภญฺชิสฺสามิติ นิกฺขมิ;

เนมิตฺเตหิ น สกฺกาติ, วทนฺเตปิ มหาพโล.

๒๓. โมคฺคลฺลาโนปิ สนฺนทฺธ พโล สูรสหาย วา;

คจฺฉนฺโต สุรสงฺคามํ, เทโว วิย สุชมฺปติ.

๒๔. อญฺญมญฺญํ อุปาคมฺม, ภินฺนเวลาว สาครา;

อารภึสุ มหายุทฺธํ, พลกายา อุโภปิ เต.

๒๕. กสฺสโป ปุรโต ทิสฺวา, มหนฺตํ กทฺทมาสยํ;

คนฺตุมญฺเญน มคฺเคน, ปริวตฺเตสิ ทนฺตินํ.

๒๖. ทิสฺวา ตํ สามิโกโน’ยํ, ปลายติ ภเณ อิติ;

พลกาโย ปภิชฺชิตฺถ, ‘‘ทิฏฺฐํ ปิฐ’’นฺติ โฆสยุํ.

๒๗. โมคฺคลาน พลาราชา, เฉตฺวา นิกรเณน โส;

สีสํ อุกฺขิปิยา’กาสํ, ฉุริกํ โกสิยํ ขิปิ.

๒๘. กตฺวา’ฬาหน กิจฺจํ โส, ตสฺส กมฺเม ปสีทิย;

สพฺพํโส ธนมาทาย, อาคญฺฉิ นครํ วรํ.

๒๙. ภิกฺขู สุตฺวา ปวตฺตึ ตํ, สุนิวตฺถา สุปารุตา;

สมฺมชฺชิตฺวา วิหารญฺจ, อฏฺฐํสุ ปฏิปาฏิยา.

๓๐. มหาเมฆวนํ ปตฺวา, เทวราชาว นนฺทนํ;

มหาเสน นิวตฺเตตฺวา, หตฺถิปาการโต พหิ.

๓๑. อุปสงฺกมฺม วนฺทิตฺวา, สงฺเฆ ตสฺมึ ปสีทิย;

ฉตฺตตฺเตน สงฺฆํ ปูเชสิ, สงฺโฆ ตสฺเสว ตํ อทา.

๓๒. ตํ ฐานํ ฉตฺตวฑฺฒีติ, โวหรึสุ ตหึ กตํ;

ปริเวณมฺปิ ตํ นามํ, อโหสิ ปุรมาคโต.

๓๓. วิหาเร เทฺวปิ คนฺตฺวาน, สงฺฆํ ตตฺถา’ภิวนฺทิย;

ปาปุณิตฺวา มหารชฺชํ, โลกํ ธมฺเมน ปาลยิ.

๓๔. กุทฺโธ นีหริ ทาฐํโส, ฆาตกํ ปิตุโน มม;

อนุวตฺติตฺวา มจฺจาติ, เตน รกฺขส นาม วา.

๓๕. อติเรกสหสฺสํ โส, อมจฺจานํ วินาสยิ;

กณฺณนาสาทิ เฉเทสิ, ปพฺพาเชสิ ตถา พหู.

๓๖. ตโต สุตฺวาน สทฺธมฺม-มุปสนฺโน สุมานโส;

มหาทานํ ปวตฺเตสิ, เมโฆ วิย มหีตเล.

๓๗. ผุสฺสปุณฺณมียํ ทาน-มนุวสฺสํ ปวตฺตยิ;

ตโต ปฏฺฐาย ตํ ทานํ, ทีเป อชฺชาปิ วตฺตติ.

๓๘. โสปิ สารถิโก ลาช-ทายโก ปิตุราชิโน;

อาเนตฺวา ปิตุสนฺเท สํ, โมคฺคลฺลานสฺส ทสฺสยิ.

๓๙. ตํ ทิสฺวา ปริเทวิตฺวา, ปิตุโน เปม มตฺตนี;

วณฺเณตฺวา ตสฺส ปาทาสิ, ทฺวารนายกตํ วิภู.

๔๐. เสนาปติ มิคาโรหิ, นิเวเทตฺวา ยถา วิธึ;

อภิเสก ชินสฺสา’กา, อภิเสกํ ยถารุจึ.

๔๑. สีหา’จเล ทฬฺหนามํ, ทาฐา โกณฺฑญฺญกมฺปิ จ;

วิหารํ ธมฺมรุจินํ, สาคลินญฺจ ทาปยิ.

๔๒. ปพฺพตนฺตุ วิหารํโส, กตฺวา เถรสฺส ทาปยิ;

มหานามสนามสฺส, ทีฆสณฺฑ วิหารเก.

๔๓. ราชินินามกญฺเจว, กตฺวา ภิกฺขุนุปสฺสยํ;

อทา สาคลิกานํ โส, ภิกฺขุนีนํ มหามติ.

๔๔. ลมฺพกณฺณกโคตฺโตปิ, ทาฐา ปภุติ นามโก;

กสฺสปสฺส อุปฐาเน, โกจิ นิพฺพินฺน มานโส.

๔๕. คนฺตา เม เรลิยํ วคฺคํ,

วาสํ ตตฺเถว กปฺปยิ;

อโหสิ ปุตฺโต ตสฺเสโก,

สิลากา โลติ ปิสฺสุโต.

๔๖. โสปิ กสฺสปโต ภีโต, ญาตเกน สห’ตฺตโน;

โมคฺคลฺลาเนน คนฺตฺวาน, ชมฺพุทีปตลํ อิโต.

๔๗. โพธิปณฺฑวิหารมฺปิ, ปพฺพชฺชํ สมุปาคโต;

กโรนฺโต สงฺฆกิจฺจานิ, สาทโร โส สุเปสโล.

๔๘. อมฺมํ สงฺฆสฺส ปาทาสิ, สงฺโฆ ตสฺมึ ปสีทิย;

อาห’มฺพ สามเณโร’ติ, เตน ตํ นามโก อหุ.

๔๙. โส เกสธาตุวํสมฺหิ, วุตฺเตน วิธินา ตโต;

เกสธาตุํ ลภิตฺวาน, ตสฺส รชฺเช อิธา’นยิ.

๕๐. ตสฺส กตฺวาน สกฺการํ, คเหตฺวา เกส ธาตุโย;

มหคฺเฆ นิทหิตฺวาน, กรณฺเฑ ผลิกุมฺภเวฺห.

๕๑. ทีปงฺกรสฺส นาถสฺส, ปฏิมาย ฆเร วเร;

วฑฺเฒตฺวา ปริหาเรน, มหาปูชํ ปวตฺตยิ.

๕๒. มาตุลํ ภริยญฺจ’สฺส, กตฺวา โสวณฺณยํ ตหึ;

ฐเปสิ ปฏิมาโย จ, อสฺส พิมฺพญฺจ จารุกํ.

๕๓. เกสธาตุกรณฺฑญฺจ, ฉตฺตํ รตนมณฺฑปํ;

สาวกคฺคยุํคํ วาฬ-พีชนิญฺจ สการยิ.

๕๔. ปริหารญฺจ ตสฺส’ทา, ราชา อธิกมตฺตโน;

สิลากาฬ มสิคฺคาหํ, กตฺวา รกฺขาย โยชยิ.

๕๕. อสิคฺคาหสิลากาโฬ, อิติ เตนา’สิ วิสฺสุโต;

ภคินิญฺจ’สฺส ปาทาสิ, สทฺธึ โภเคน ภูมิโป.

๕๖. วุตฺโต’ยมติ สงฺเขโป, วิตฺถาโร ปน สพฺพโส;

เกสธาตุกวํสมฺหา, คเหตพฺโพ วิภาวินา.

๕๗. พนฺธิตฺวา สาครา รกฺขํ, ทีปญฺจ กาสินิพฺภยํ;

ธมฺมกมฺมน โสเธสิ, สธมฺมํ ชินสาสนํ.

๕๘. เสนาปติส นามํ’กา, ปธานฆร มุตฺตโร;

กตฺวา’ฏฺฐารสเม วสฺเส, โส ปุญฺญานิ ขยํ คโต.

๕๙. กสฺสปโต ชิโต อติพลิ ปุญฺญกฺขเย สงฺขเต;

เชตุํ โน วิสหิตฺถ มจฺจุมุปคํ โส เยวทาโสวิย;

ตสฺมา มจฺจุพลํ นิหจฺจ สุขิโน เหสฺสนฺติ เมธาวิโน;

นิพฺพานํ ปรมจฺจุตํ สิวปทํ ปตฺตพฺพมตฺตญฺญุนา.

สุชนปฺปสาท สํเวคตฺถาย กเต มหาวํเส

ราชทฺวยทีปโน นาม

เอกูนจตฺตาลีสติโม ปริจฺเฉโท.