จตุตฺตึสติม ปริจฺเฉท

เอกาทสราชทีปโน

๑. ตทจฺจเย มหาจูลี-มหาติสฺโส อการยิ;

รชฺชํ จุทฺทสวสฺสานิ, ธมฺเมน จ สเมน จ.

๒. สหตฺเถน กตํ ทานํ, โส สุตฺวาน มหปฺผลํ;

ปฐเมเยว วสฺสมฺหิ, คนฺตฺวา อญฺญาตเวสวา.

๓. กตฺวาน สาลิลวนํ, ลทฺธาย ภติยา ตโต;

ปิณฺฑปาตํ มหาสุมฺม-เถรสฺสา’ทา มหีปติ.

๔. โสณฺณคิริมฺหิ ปุน โส, ตีณิวสฺสานิ ขตฺติโย;

คุฬยนฺตมฺหิ กตฺวาน, ภตึลทฺธา คุเฬ ตโต.

๕. เต คุเฬ อาหราเปตฺวา, ปุรํ อาคมฺม ภูปติ;

ภิกฺขุสงฺฆสฺส ปาทาสิ, มหาทานํ มหีปติ.

๖. ตึสภิกฺขุสหสฺสสฺส, อทา อจฺฉาทนานิ จ;

ทฺวาทสนฺนํ สหสฺสานํ, ภิกฺขูนีนํ ตเถว จ.

๗. การยิตฺวา มหีปาโล, วิหารํ สุปฺปติฏฺฐิตํ;

สฏฺฐิภิกฺขุ สหสฺสสฺส, ติจีวรมทาปยิ.

๘. ตึส สหสฺส สงฺขานํ, ภิกฺขุนีนญฺจ ทาปยิ;

มณฺฑวาปิ วิหารํ โส, ตถา อภยคลฺลกํ.

๙. วงฺคุปฏฺฏงฺคคลฺลญฺจ, ทีฆพาหุกคลฺลกํ;

วาลคาม วิหารญฺจ, ราชา โสเยว การยิ.

๑๐. เอวํ สทฺธาย โส ราชา, กตฺวา ปุญฺญานิเนกธา;

จตุทฺทสนฺนํ วสฺสานํ, อจฺจเยน ทิวํ อคา.

๑๑. วฏฺฏคามณิโน ปุตฺโต, โจรนาโคติ วิสฺสุโต;

มหาจูฬิสฺสรชฺชมฺหิ, โจโร หุตฺวา จริตทา.

๑๒. มหาจูเฬ อุปรเต, รชฺชํ การยิ อาคโต;

อตฺตโน โจรกาเล โส, นิวาสํ เยสุนาลภิ.

๑๓. อฏฺฐรสวิหาเร เต, วิทฺธํสาเปสิ ทุมฺมติ;

รชฺชํ ทฺวาทสวสฺสานิ, โจรนาโค อการยิ.

๑๔. โลกนฺตริก นิรยํ, ปาโปโสอุปปชฺชถ;

ตทจฺจเย มหาจูฬฺหิ-รญฺโญ ปุตฺโต อการยิ.

๑๕. รชฺชํ ตีเณว วสฺสานิ, ราชาติสฺโส’ติ วิสฺสุโต;

โจรนาคสฺส เทวีตุ, วีสมํ วีสมานุลา.

๑๖. วีสํ ทตฺวาน มาเรสิ, พลตฺเถรตฺตมานสา;

ตสฺมึเยวพลตฺเถสา, อนุลารตฺตมานสา.

๑๗. ติสฺสํ วีเสนฆาเตตฺวา, ตสฺส รชฺชมทาสิสา;

สีโว นาม พลตฺโถโส, เชฏฺฐโทวาริโก ตหึ.

๑๘. กตฺวา มเหสึ อนุลํ, วสฺสํ มาสทฺวยา’จิกํ;

รชฺชํ กาเรสิ นคเร, วฏุเก ทมิเฬ’นุลา.

๑๙. รตฺตา วีเสน ตํ หนฺตฺวา, วฏุเก รชฺชมปฺปยิ;

วฏุโก ทมิโฬ โส หิ, ปุเร นครวฑฺฒกี.

๒๐. มเหสึ อนุลํ กตฺวา, วสฺสํ มาสทฺวยาธิกํ;

รชฺชํ กาเรสิ นคเร, อนุลา ตตฺถ อาคตํ.

๒๑. ปสฺสิตฺวา ทารุภติกํ, ตสฺมึ สารตฺตมานสา;

หนฺตฺวา วิเสน วฏุกํ, ตสฺส รชฺชํ สมปฺปยิ.

๒๒. ทารุภติกติสฺโส โส, มเหสึ กริยานุลํ;

เอกมาสาธิกํ วสฺสํ, ปุเร รชฺชมการยิ.

๒๓. กาเรสิ โส โปกฺขรณึ, มหาเมฆวเน ลหุํ;

นิลีเย นาม ทมิเฬ, สา ปุโรหิตพฺราหฺมเณ.

๒๔. ราเคน รตฺตา อนุลา, เตน สํวาสกามินี;

ทารุภติกติสฺสํตํ, วีสํ ทตฺวาน ฆาติย.

๒๕. นิลียสฺส อทา รชฺชํ, โสปิ นิลียพฺราหฺมโณ;

ตํ มเหสึ กริตฺวาน, นิจฺจํ ตาย อุปฏฺฐิโต.

๒๖. รชฺชํ กาเรสิ ฉมฺมาสํ, อนุราธปุเร อิธ;

ทฺวตฺตึสาย พลตฺเถหิ, วตฺถุกามา ยถารุจึ.

๒๗. วีเสน ตํ ฆาตยิตฺวา, นิลียํ ขตฺติยานุลา;

รชฺชํ สา อนุลาเทวี, จตุมาสมการยิ.

๒๘. มหาจูฬิกราชสฺส, ปุตฺโต ทุติยโก ปน;

กูฏกณฺณติสฺโส นาม, ภีโต โส’นุลเทวิยา.

๒๙. ปลายิตฺวา ปพฺพชิตฺวา, กาเล ปตฺตพโล อิธ;

อาคนฺตฺวา ฆาตยิตฺวา, ตํ อนุลํ ทุฏฺฐมานสํ.

๓๐. รชฺชํ กาเรสิ ทฺวาวีสํ, วสฺสานิ มนุชาธิโป;

มหาอุโปสถาคารํ, อกา เจติยปพฺพเต.

๓๑. ฆรสฺส ตสฺส ปุรโต, สิลาถูปมการยิ;

โพธึ โรเปสิ ตตฺเถว, โสว เจติเยปพฺพเต.

๓๒. เปลคามวิหารญฺจ, อนฺตรคงฺคาย การยิ;

ตตฺเถว วณฺณกํ นาม, มหามาติกเมว จ.

๓๓. อมฺพทุคฺคมหาวาปึ, ภโยลุปฺปลเมว จ;

สตฺตหตฺถุจฺจปาการํ, ปุรสฺส ปริขํ ตถา.

๓๔. มหาวตฺถุมฺหิ อนุลํ, ฌาปยิตฺวา อสญฺญตํ;

อปนีย ตโต โถกํ, มหาวตฺถุมการยิ.

๓๕. ปทุมสฺสรวนุยฺยานํ, นคเรเยว การยิ;

มตา’สฺส ทนฺเต โธวิตฺวา, ปพฺพชิ ชินสาสเน.

๓๖. กุลสนฺตเก ฆรฏฺฐาเน, มาตุภิกฺขุนุปสฺสยํ;

กาเรสิ ทนฺตเคหนฺติ, วิสฺสโต อาสิ เตน โส.

๓๗. ตทจฺจเย ตสฺส ปุตฺโต, นามโก ภาติกาภโย;

อฏฺฐวีสติวสฺสานิ, รชฺชํ กาเรสิ ขตฺติโย.

๓๘. มหาทาฏฺฐิกราชสฺส, ภาติกตฺตามหีปติ;

ทีเป ‘‘ภาติกราชา’’ติ, ปากโฏ อาสิ ธมฺมิโก.

๓๙. กาเรสิ โลหปาสาเท, ปฏิสงฺขารเมตฺถโส;

มหาถูเป เวทิกา เทฺว, ถูปเวฺห’โปสถวฺหยํ.

๔๐. อตฺตโน พลิมุชฺฌิตฺวา, นครสฺส สมนฺตโต;

โรปาเปตฺวา โยชนมฺหิ, สุมนาน’ชฺชุกานิ จ.

๔๑. ปาทเวจิกโต ยาว, ธุรจฺฉตฺตานราธิโป;

จตุรงฺคลพหเลน, คนฺเธน อุรุเจติยํ.

๔๒. ลิมฺปาเปตฺวาน ปุปฺผานิ, วณฺเฏหิ ตตฺถ สาธุกํ;

นิเวสิตฺวาน โกเรสิ, ถูปํ มาลาคุโลปมํ.

๔๓. ปุนทฺวงฺคุลพหลาย, มโนสิลาย เจติยํ;

ลิมฺปาเปตฺวาน กาเรสิ, ตเถว กุสุมาจิตํ.

๔๔. ปุน โสปานโต ยาว, ธุรจฺฉตฺตาว เจติยํ;

ปุปฺเผหิ โอกิราเปตฺวา, ฉาเทสิ ปุปฺผราสิโน.

๔๕. อุฏฺฐาเปตฺวาน ยนฺเตหิ, ชลํ อภยวาปิโต;

ชเลหิ ถูปํ เสวนฺโต, พลปูชมการยิ.

๔๖. สกฏสเตน มุตฺตานํ, สทฺธึ เตเลน สาธุกํ;

มทฺทาเปตฺวา สุธาปิณฺฑํ, สุธากมฺมมการยิ.

๔๗. ปวาลชาลํ กาเรตฺวา, ตํ ขิปาปิย เจติเย;

โสวณฺณานิ ปทุมานิ, จกฺกมตฺตานิ สนฺธิสุ.

๔๘. ลคฺคาเปตฺวา ตโต มุตฺตา-กลาเป ยาว เหฏฺฐิมา;

ปทุมา’ลมฺพยิตฺวาน, มหาถูปมปูชยิ.

๔๙. คณสชฺฌายสทฺทํ โส, ธาตุคพฺภมฺหิตาทินิ;

สุตฺวา ‘‘อทิสฺวา ตํนา’หํ, วุฏฺฐหิสฺสนฺติ นิจฺฉิโต.

๕๐. ปาจินาทิกมูลมฺหิ, อนาหาโร นิปชฺชถ;

เถรา ทฺวารํ มาปยิตฺวา, ธาตุคพฺภํ นยึสุ ตํ.

๕๑. ธาตุคพฺภวิภูตึโส, สพฺพํ ทิสฺวา มหีปติ;

นิกฺขนฺโต ตาทิเสเหว, โปตฺถรูเปหิ ปูชยิ.

๕๒. มธุคนฺเธหิ คนฺเธหิ, ฆเฏหิ สรเสหิ จ;

อญฺชนหริตาเลหิ, ตถามโนสิลาหิ จ.

๕๓. มโนสิลาสุ วสฺเสน, ภสฺสิตฺวา เจติยงฺคเณ;

ฐิตาสุ โคปฺผมตฺตาสุ, รจิเต ปุ’ปฺปเลหิ จ.

๕๔. ถูปงฺคณมฺหิ สกเล, ปุริเต คนฺธกทฺทเม;

จิตฺตกิลญฺชฉิทฺเทสุ, รจิเต ปุ’ปฺปเลหิ จ.

๕๕. วารยิตฺวา วาริมคฺคํ, ตเถว ปุริเต ฆเฏ;

ทีปวฏฺฏิหิ เนกานิ, กตวฏฺฏิสิขาหิ จ.

๕๖. มธุกเตลมฺหิ ตถา, ติลเตเล ตเถว จ;

ตเถว ปฏฺฏวฏฺฏีนํ, สุ พหูหิ สิขาหิ จ.

๕๗. ยถาวุตฺเตหิ เอเตหิ, มหาถูปสฺส ขตฺติโย;

สตฺตกฺขตฺตุํ สตฺตกฺขตฺตุํ, ปูชา’กาสิ วิสุํ วิสุํ.

๕๘. อนุวสฺสญฺจ นิยตํ, สุธามงฺคลมุตฺตมํ;

โพธิสินานปูชา จ, ตเถว อุรุโพธิยา.

๕๙. มหาเวสาข ปูชา จ, อุฬารา อฏฺฐวีสติ;

จตุราสีติ สหสฺสานิ, ปูชา จ อนุฬาริกา.

๖๐. วิวิธํ นฏนจฺจญฺจ, นานาตูริยวาทิตํ;

มหาถูเป มหาปูชํ, สทฺธานุนฺโน อการยิ.

๖๑. ทิวสสฺส จ ติกฺขตฺตุํ, พุทฺธุปฺปฏฺฐานมาคมา;

ทฺวิกฺขตฺตุํ, ปุปฺผเภริญฺจ, นิยตํ โส อการยิ.

๖๒. นิยตญฺจนทานญฺจ, ปวารณาทานเมว จ;

เตลผาณิตวตฺถาทิ-ปริกฺขารํ สมณารหํ.

๖๓. พหุํ ปาทาสิ สงฺฆสฺส, เจติยเขตฺตเมว จ;

เจติเย ปริกมฺมตฺถํ, อทาสิ ตตฺถ ขตฺติโย.

๖๔. สทา ภิกฺขุสหสฺสสฺส, วิหาเร เจติยปพฺพเต;

สลากวตฺตภตฺตญฺจ, โส ทาเปสิ จ ภูปติ.

๖๕. จินฺตามณิมุเจลเวฺห, อุปฏฺฐานตฺตเย จ โส;

ตถา ปทุมฆเร ฉตฺต-ปาสาเท จ มโนรเม.

๖๖. โภเชนฺโต ปญฺจฐานมฺหิ, ภิกฺขูคนฺถธุเร ยุเต;

ปจฺจเยหิ อุปฏฺฐาสิ, สทา ธมฺเม สคารโว.

๖๗. โปราณราชนิยาตํ, ยํกิญฺจิ สาสนสฺสิตํ;

อกาสิ ปุญฺญกมฺมํโส, สพฺพํ ภาติกภูปติ.

๖๘. ตสฺส ภาภกราชสฺส, อจฺจเย ตํ กนิฏฺฐโก;

มหาทาฐิมหานาค-นาโม รชฺชมการยิ.

๖๙. ทฺวาทสํเยว วสฺสานิ, นานาปุญฺญปรายโน;

มหาถูปมฺหิ กิญฺชกฺข- ปาสาเณ อตฺถราปยิ.

๗๐. วาลิกามริยาทญฺจ, กาเรสิ วิตฺถตงฺคณํ;

ทีเป สพฺพวิหาเรสุ, ธมฺมาสนมทาปยิ.

๗๑. อมฺพตฺถล มหาถูปํ, การาเปสิ มหีปติ;

จ เยอนิฏฺฐมานมฺหิ, สริตฺวา มุนิโน คุณํ.

๗๒. จชิตฺวาน สกํ ปาณํ, นิปชฺชิตฺวา สยํ ตหึ;

ฐปยิตฺวา จยํ ตสฺส, นิฏฺฐาเปตฺวาน เจติยํ.

๗๓. จตุทฺวาเร ฐปาเปสิ, จตุโร รตนคฺฆิเก;

สุสิปฺปิเกหิ สุวิภตฺเต, นานารตนโชติเต.

๗๔. เจติเย ปฏิโมเจตฺวา, นานารตนกญฺจุกํ;

กญฺจน พุพฺพุลญฺเจตฺถ, มุตฺโตลมฺพญฺจ ทาปยิ.