ตติย ปริจฺเฉท

ปฐมธมฺมสํคีติ

๑. ปญฺจเนตฺโต ชิโน ปญฺจ-จตฺตาลีสสมา’สโม;

ฐตฺวา สพฺพานิ กิจฺจานิ, กตฺวา โลกสฺส สพฺพถา.

๒. กุสินารายยมก-สาลานมนฺตเร วเร;

เวสาขปุณฺณมายํ โส, ทีโป โลกสฺส นิพฺพุโต.

๓. สงฺขฺยาปถมติกฺกนฺตา, ภิกฺขู ตตฺถ สมาคตา;

ขตฺติยา พฺราหฺมณา วสฺสา, สุทฺธา เทวา ตเถว จ.

๔. สตฺตสตสหสฺสานิ, เตสุ ปาโมกฺขภิกฺขโว;

เถโร มหากสฺสโปว, สงฺฆตฺเถโร ตทา อหุ.

๕. สตฺถุสรีรสารีร-ธาตุกิจฺจานิ การิย;

อิจฺฉนฺโต โส มหาเถโร, สตฺถุ ธมฺมจิรฏฺฐิตึ.

๖. โลกนาเถ ทสพเล, สตฺตาหปรินิพฺพุเต;

ทุพฺภาสิตํ สุภทฺทสฺส, พุทฺธสฺส วจนํ สรํ.

๗. สรํ จีวรทานญฺจ, สมตฺเต ฐปนํ ตถา;

สทฺธมฺมฐปนตฺถาย, มุนินา’นุคฺคหํ กตํ.

๘. กาตุํ สทฺธมฺมสํคีตึ, สมฺพุทฺธานมเต ยติ;

นวงฺคสาสนธเร, สพฺพงฺคสมุปาคเต.

๙. ภิกฺขู ปญฺจสเตเยว, มหาขีณาสเว วเร;

สมฺมนฺนิ เอเกนูเน ตุ, อานนฺทตฺเถรการณา.

๑๐. ปุน อานนฺทตฺเถรา’ปิ, ภิกฺขูหิ อภิยาจิโต;

สมฺมนฺนิ กาตุํ สํคีตึ, สา น สกฺกา หิ ตํ วินา.

๑๑. สาธุกีฬนสตฺตาหํ, สตฺตาหํ ธาตุภาชนํ;

อิจฺจทฺธมาสํ เขเปตฺวา, สพฺพโลกานุกมฺปกา.

๑๒. วสฺสํ วสํ ราชคเห, กสฺสาม ธมฺมสงฺคหํ;

นาญฺเญหิ ตตฺต วตฺถพฺพ-มิติ กตฺวาน นิจฺฉยํ.

๑๓. โสกาตุรํ ตตฺถ ตตฺถ, อสฺสาเสนฺโต มหาชนํ;

ชมฺพุทีปมฺหิ เต เถรา, วิจริตฺวาน จาริกํ.

๑๔. อาสฬฺหิสุกฺกปกฺขมฺหิ, สุกฺกปกฺขฐิตตฺถิกา;

อุปาคมุํ ราชคหํ, สมฺปนฺนจตุปจฺจยํ.

๑๕. ตตฺเถว วสฺสูปคตา, เต มหากสฺสปาทโย;

เถรา ถิรคุณูเปตา, สมฺพุทฺธมตโกวิทา.

๑๖. วสฺสานํ ปฐมํ มาสํ, สพฺพเสนาสเนสุ’ปิ;

กาเรสุํ ปฏิสงฺขารํ, วตฺวานา’ชาตสตฺตุโน.

๑๗. วิหารปฏิสงฺขาเร, นิฏฺฐิเต อหุ ภูปติ;

อิทานิ ธมฺมสํคีตึ, กริสฺสามิ มยํ อิติ.

๑๘. กตฺตพฺพํ กินฺติปุฏฺฐสฺส, นิสชฺชฐานมาทิสุํ;

ราชา กตฺถาติ ปุจฺฉิตฺวา, วุตฺตฐานมฺหิ เตหิ โส.

๑๙. สีฆํ เวภารเสลสฺส, ปสฺเส กาเรสิ มณฺฑปํ;

สตฺตปณฺณิคุหาทฺวาเร, รมฺมํ เทวสโภปมํ.

๒๐. สพฺพถา มณฺฑยิตฺวา ตํ, อตฺถราเปสิ ตตฺถ โส;

ภิกฺขูนํ คณนาเยว, อนคฺฆตฺถรณานิ จ.

๒๑. นิสฺสาย ทกฺขิณํ ภาคํ, อุตฺตรามุขมุตฺตมํ;

เถราสนํ สุปญฺญตฺตํ, อาสิ ตตฺถ มหารหํ.

๒๒. ตสฺมึ มณฺฑปมชฺฌสฺมึ, ปุรตฺถมุขมุตฺตมํ;

ธมฺมาสนํ สุปญฺญตฺตํ, อโหสิ สุคตารหํ.

๒๓. ราชา’โรจยิ เถรานํ, กมฺมํ โน นิฏฺฐิตํ อิติ;

เต เถรา เถรมานนฺท-มานนฺทกรมพฺรวุํ.

๒๔. เสฺว สนฺนิปาโต อานนฺท, เสเขน คมนํ ตหึ;

น ยุตฺตนฺเต สทตฺเถ ตฺวํ, อปฺปมตฺโต ตโต ภว.

๒๕. อิจฺเจวํ โจทิโต เถโร, กตฺวาน วีริยํ สมํ;

อิริยาปถโต มุตฺตํ, อรหตฺตมปาปุณิ.

๒๖. วสฺสานํ ทุติเย มาเส, ทุติเย ทิวเส ปน;

รุจิเร มณฺฑเป ตสฺมึ, เถรา สนฺนิปตึสุ เต.

๒๗. ฐเปตฺวา’นนฺทตฺเถรสฺส, อนุจฺฉวิกมาสนํ;

อาสเนสุ นิสีทึสุ, อรหนฺโต ยถารหํ.

๒๘. เถโร’รหตฺตปตฺตึ โส, ญาเปตุํ เตหิ นาคมา;

กุหึ อานนฺทตฺเถโร’ติ, วุจฺจมาเน ตุ เกหิจิ.

๒๙. นิมฺมุชฺชิตฺวา ปถวิยา, คนฺตฺวา โชติปเถน วา;

นิสีทิ เถโร อานนฺโท, อตฺตโน ฐปิตาสเน.

๓๐. อุปาลิเถโร วินเย, เสสธมฺเม อเสสเก;

อานนฺทตฺเถรมกรุํ, สพฺเพ เถรา ธุรนฺธเร.

๓๑. มหาเถโร สกตฺตานํ, วินยํ ปุจฺฉิตุํ สยํ;

สมฺมนฺนุ’ปาลิเถโร จ, วิสฺสชฺเชตุํ ตเมว ตุ.

๓๒. เถราสเน นิสีทิตฺวา, วินยํ ตมปุจฺฉิ โส;

ธมฺมาสเน นิสีทิตฺวา, วิสฺสชฺเชสิ ตเมว โส.

๓๓. วินยญฺญูนมคฺเคน, วิสฺสชฺชิตกเมน เต;

สพฺเพ สชฺฌายมกรุํ, วินยํ นยโกวิทา.

๓๔. อคฺคํ พหุสฺสุตาทีนํ, โกสารกฺขํ มเหสิโน;

สมฺมนฺนิตฺวาน อตฺตานํ, เถโร ธมฺมมปุจฺฉิ โส.

๓๕. ตถา สมฺมนฺนิย’ตฺตานํ, ธมฺมาสนาคโต สยํ;

วิสฺสชฺเชสิ ตมานนฺท-ตฺเถโร ธมฺมมเสสโต.

๓๖. เวเทหมุนินา เตน, วิสฺสชฺชิตกเมน เต;

สพฺเพ สชฺฌายมกรุํ, ธมฺมํ ธมฺมตฺถโกวิทา.

๓๗. เอวํ สตฺตหิ มาเสหิ, ธมฺมสํคีติ นิฏฺฐิตา;

สพฺพโลกหิตตฺถาย, สพฺพโลกหิ เตหิ สา.

๓๘. มหากสฺสปเถเรน, อิทํ สุคตสาสนํ;

ปญฺจวสฺสสหสฺสานิ, สมตฺถํ วตฺตเน กตํ.

๓๙. อตีว ชาตปาโมชฺชา, สนฺธารกชลนฺติกา;

สํคีติปริโยสาเน, ฉทฺธากมฺปิ มหามหี.

๔๐. อจฺฉริยานิ จา’เหสุํ, โลเกเนกานิเนกธา;

เถเรเหว กตตฺตา จ, เถริยายํ ปรมฺปรา.

๔๑. ปฐมํ สงฺคหํ กตฺวา, สพฺพโลกหิตํ พหุํ;

เต ยาวตายุกํ ฐตฺวา, เถรา สพฺเพปิ นิพฺพุตา.

๔๒. เถรา’ปิ เต มติปทีปหตนฺธการา,

โลกนฺธการหนนมฺหิ มหาปทีปา;

นิพฺพาปิตา มรณโฆรมหานิเลน,

เตนาปิ ชีวิตมทํ มติมา ชเหยฺยาติ.

สุชนปฺปสาทํสํเวคตฺถาย กเต มหาวํเส

ปฐมธมฺมสํคีตินาม

ตติโย ปริจฺเฉโท.