สตฺตวีสติม ปริจฺเฉท

โลหปาสาทมโห

๑. ตโต ราชา วิจินฺเตสิ, วิสฺสุตํ สุสฺสุตํ สุตํ;

มหาปญฺโญ สทา ปุญฺโญ, ปญฺญาย กตนิจฺฉโย.

๒. ‘‘ทีปปฺปสาทโก เถโร, ราชิโน อยฺยกสฺส เม;

เอวํ กิราหนตฺตา เต, ทุฏฺฐคามณิภูปติ.

๓. มหาปุญฺโญ มหาถูปํ, โสณฺณมาลึ มโนรมํ;

วีสํหตฺถสตํ อุจฺจํ, กาเรสฺสติ อนาคเต.

๔. ปุโน อุโปสถาคารํ, นานารตนมณฺฑิตํ;

นวภูมํ กริตฺวาน, โลหปาสาท เมว จ.

๕. อิติ จินฺติย ภูมินฺโท, ลิขิเตฺววํ ฐปาปิตํ;

เปกฺขาเปนฺโต ราชเคเห, ฐิตํ เอว กรณฺฑเก.

๖. โสวณฺณปฏฺฏํ ลทฺธาน, เลขํ ตตฺถ อวาจยิ;

‘‘จตฺตาลีสสตํ วสฺสํ, อติกฺกมฺม อนาคเต.

๗. กากวณฺณสุโต ทุฏฺฐ-คามณิมนุชาธิโป;

อิทญฺจิทญฺจ เอวญฺจ, กาเรสฺสตี’’ติ วาจิตํ.

๘. สุตฺวา หฏฺโฐ อุทาเนตฺวา, อปฺโปฏฺเฐสิ มหีปติ;

ตโต ปาโต’ว คนฺตฺวาน, มหาเมฆวนํ สุภํ.

๙. สนฺนิปาตํ การยิตฺวา, ภิกฺขุสงฺฆสฺส อพฺรวิ;

‘‘วิมานตุลฺยํ ปาสาทํ, การยิสฺสามิ โว อหํ.

๑๐. ทิพฺพํ วิมานํ เปเสตฺวา, ตทา เลขํ อทาถ เม’’;

ภิกฺขุสงฺโฆ วิสชฺเชสิ, อฏฺฐ ขีณาสเว ตหึ.

๑๑. กสฺสปมุนิโน กาเล, อโสโก นาม พฺราหฺมโณ;

อฏฺฐ สลากภตฺตานิ, สงฺฆสฺส ปริณามิย.

๑๒. ภรณึ นาม ทาสึ โส, ‘‘นิจฺจํ เทหี’’ติ อพฺรวิ;

ทตฺวา สา ตานิ สกฺกจฺจํ, ยาวชีวํ ตโต จุตา.

๑๓. อากาสฏฺฐวิมานมฺหิ, นิพฺพตฺติรุจิเร สุเภ;

อจฺฉรานํ สหสฺเสน, สทา’สิ ปริวาริตา.

๑๔. ตสฺสา รตนปาสาโท, ทฺวาทสโยชนุคฺคโต;

โยชนานํ ปริกฺเขโป, จตฺตาลีสญฺจ อฏฺฐ จ.

๑๕. กูฏาคารสหสฺเสน, มณฺฑิโต นวภูมิโก;

สหสฺสคพฺภสมฺปนฺโน, ราชมาโน จตุมฺมุโข.

๑๖. สหสฺสสงฺขสํวุตฺติ, สีหปญฺชร เนตฺตวา;

สกิงฺกณิกชาลาย, สชฺชิโต เวทิกาย จ.

๑๗. อมฺพลฏฺฐิกปาสาโท, ตสฺส มชฺเฌ ฐิโต อหุ;

สนฺตมโต ทิสฺสมาโน, ปคฺคหิตธชากุโล.

๑๘. ตาวตึสญฺจ คจฺฉนฺตา, ทิสฺวา เถรํ ตเมว เต;

หิงฺคุเลน ตทา เลขํ, เลขยิตฺวา ปเฏ ตโต.

๑๙. นิวตฺติตฺวาน อาคนฺตฺวา, ปฏํ สงฺฆสฺส ทสฺสยุํ;

สงฺโฆ ปฏํ คเหตฺวา ตํ, ปาเหสิ ราชสนฺติกํ.

๒๐. ตํ ทิสฺวา สุมโน ราชา, อาคมฺมาราม มุตฺตมํ;

อาเลขตุลฺยํ กาเรสิ, โลหปาสาท มุตฺตมํ.

๒๑. กมฺมารมฺภนกาเลว, จตุทฺวารมฺหิ โภควา;

อฏฺฐสตสหสฺสานิ, หิรญฺญานิ ฐปาปยิ.

๒๒. ปุฏสหสฺส วตฺถานิ, ทฺวาเร ทฺวาเร ฐปาปยิ;

คุฬ เตลสกฺขรมธุ-ปุรา จาเนก จาฏิโย.

๒๓. ‘‘อมูลกกมฺม เมตฺถ, น กาตพฺพ’’นฺติ ภาสิย;

อคฺฆาเปตฺวา กตํ กมฺมํ, เตสํ มูลมทาปยิ.

๒๔. หตฺถสตํ หตฺถสตํ, อาสิ เอเกก ปสฺสโต;

อุจฺจโต ตตฺตโกเยว, ปาสาโท หิ จตุมฺมุโข.

๒๕. ตสฺมึ ปาสาท เสฏฺฐสฺมึ, อเหสุํ นวภูมิโย;

เอเกกิสฺสา ภูมิยา จ, กูฏาคารสตานิ จ.

๒๖. กูฏาคารานิ สพฺพานิ, สชฺฌุนา ขจิตา น’ยุํ;

ปวาลเวทิกา เตสํ, นานารตน ภูสิตา.

๒๗. นานารตน จิตฺตานิ, ตาสํ ปทุมกานิ จ;

สชฺฌกึกิณิกาปนฺติ-ปริกฺขิตฺตาว ตา อหุ.

๒๘. สหสฺสํ ตตฺถ ปาสาโท, คพฺภา อาสุํ สุสงฺขตา;

นานารตน ขจิตา, สีหปญฺชรเนตฺตวา.

๒๙. นาริวาหนยานนฺตุ, สุตฺวา เวสฺสวณสฺส โส;

ตทา การมกาเรสิ, มชฺเฌ รตนมณฺฑปํ.

๓๐. สีหพฺยคฺฆาทิรูเปหิ, เทวตา รูปเกหิ จ;

อหุ รตนมโยเห’ส, ถมฺเภหิ จ วิภูสิโต.

๓๑. มุตฺตาชาลปริกฺเขโป, มณฺฑปนฺเต สมนฺตโต;

ปวาลเวทิกา เจตฺถ, ปุพฺเพ วุตฺตวิธา อหุ.

๓๒. สตฺตรตน จิตฺตสฺส, เวมชฺเฌ มณฺฑปสฺส ตุ;

รุจิโร ทนฺตปลฺลงฺโก, รมฺโม ผลิกสนฺถโร.

๓๓. ทนฺตมยาปสฺสเย’ตฺถ, สุวณฺณมย สูริโย;

สชฺฌุมเย จนฺทิมา จ, ตารา จ มุตฺตกา มยา.

๓๔. นานารตน ปทุมานิ, ตตฺถ ตตฺถ ยถารหํ;

ชาตกานิ จ ตตฺเถว, อาสุํ โสณฺณลตนฺตเร.

๓๕. มหคฺฆปจฺจตฺถรเณ, ปลฺลงฺเก’ติ มโนรเม;

มโนหรา’สิฏฺฐปิตา, รุจิรํ ทนฺตพีชนี.

๓๖. ปวาลปาทุกา ตตฺถ, ผลิกมฺหิ ปติฏฺฐิตา;

เสตจฺฉตฺตํ สชฺฌุทณฺฑํ, ปลฺลงฺโก’ปริโสภถ.

๓๗. สตฺตรตน มยาเนตฺถ, อฏฺฐมงฺคลิกานิ จ;

จตุปฺปทานํ ปนฺตี จ, มณิมุตฺตนฺตรา อหุํ.

๓๘. รชตานญฺจ ฆณฺฏานํ, ปนฺตี ภตฺตนฺตลมฺพิตา;

ปาสาทฉตฺตปลฺลงฺก-มณฺฑปา’สุํ อนคฺฆิกา.

๓๙. มหคฺฆ ปญฺญปาเปสิ, มญฺจปีฐํ ยถารหํ;

ตเถว ภูมตฺถรณํ, กมฺพลญฺจ มหารหํ.

๔๐. อาจาม กุมฺภิโสวณฺณา, อุลุงฺโก จ อหุ ตหึ;

ปาสาท ปริโภเคสุ, เสเสสุ จ กถา’ วกา.

๔๑. จารุปาการ ปริวาโร,

โส จตุทฺวารโกฏฺฐโก;

ปาสาโท’ลงฺกโต โสภิ,

ตาวตึส สภา วิย.

๔๒. ตมฺพ โลหิฏฺฐกาเห’โส,

ปาสาโท ฉาทิโต อหุ;

โลห ปาสาท โวหาโร,

เตน ตสฺส อชายถ.

๔๓. นฏฺฐิเต โลหปาสาเท, โส สงฺฆํ สนฺนิปาตยิ;

ราชา สงฺโฆ สนฺนิปติ, มริจวฏฺฏิมเห วิย.

๔๔. ปุถุชฺชนา’ว อฏฺฐํสุ, ภิกฺขู ปฐมภูมิยํ;

เตปิฏกา ทุติยาย, โสตาปนฺนาทโย ปน.

๔๕. เอเก เกเยว อฏฺฐํสุ, ตติยาทีสุ ภูมิสุ;

อรหนฺโต จ อฏฺฐํสุ, อุทฺธํ จตูสุ ภูมิสุ.

๔๖. สงฺฆสฺส ทตฺวา ปาสาทํ, ทกฺขิณมฺพุปุรสฺสรํ;

ราชา’ทตฺถ มหาทานํ, สตฺตาหํ ปุพฺพกํ ปิย.

๔๗. ปาสาท มหจตฺตานิ, มหาจาเคน ราชินา;

อนคฺฆานิ ฐเปตฺวาน, อเหสุํ ตึสโกฏิโย.

๔๘. นิสฺสาเร ธนนิจเย วิเสสสารํ,

เย ทานํ ปริคณยนฺติ สาธุปญฺญา;

เต ทานํ วิปุลมเปต จิตฺตสงฺคา,

สตฺตานํ หิตปรมา ททนฺติ เอวํติ.

สุชนปฺปสาทสํเวคตฺถาย กเต มหาวํเส

โลกหปาสาทมโห นาม

สตฺตวีสติโม ปริจฺเฉโท.