ฉพฺพีสติม ปริจฺเฉท

มริจวฏฺฏิกวิหารมโห

๑. เอกจฺฉตฺตํ กริตฺวาน, ลํการชฺชํ มหายโส;

นานนฺตรํ สํวิทหิ, โยธานํ โส ยถารหํ.

๒. เถรปุตฺตาภโย โยโธ, ทิยฺยมานํ น อิจฺฉิตํ;

ปุจฺฉิโตว กิมตฺถนฺติ, ยุทฺธมตฺถีติ อพฺรวิ.

๓. เอกรชฺเช กเต ยุทฺธํ, กินามตฺตีติ ปุจฺฉิโต;

ยุทฺธํ กิเลส โจเรหิ, กริสฺสามิ สุทุชฺชยํ.

๔. อิจฺเจว มาห ตํ ราชา, ปุนปฺปุนํ นิเสธยิ;

ปุนปฺปุนํ โสยาจิตฺวา, รญฺโญนุญฺญาย ปพฺพชิ.

๕. ปพฺพชิตฺวา จ กาเลน, อรหตฺตมปาปุณิ;

ปญฺจขีณาสวสต-ปริวาเอรา อโหสิ จ.

๖. ฉตฺตมงฺคล สตฺตาเห, คเต คตภโย’ ภโย;

ราชา กตา ภิเสโกว, มหตา วิภเวน โส.

๗. ติสฺสวาปิ’มคา กีฬ-วิธินา สมลงฺก ตํ;

กีฬิตุํ อภิสิตฺตานํ, จาริตฺตญฺจา นุรกฺขิตุํ.

๘. รญฺโญ ปริจฺฉทํ สพฺพํ, อุปายนสตานิ จ;

มริจวฏฺฏิวิหารสฺส, ฐานมฺหิ ฐปยึสุ จ.

๙. ตตฺเถว ถูปฐานมฺหิ, สธาตุํ กุนฺตมุตฺตมํ;

ฐเปสุํ กุนฺตธรกา, อุชุกํ ราชมานุสา.

๑๐. สโหโรโธ มหาราชา, กีฬิตฺวา สลิเล ทิวา;

สายมาหํ คมิสฺสาม, กุนฺตํ วฑฺเฒถ โภ’’อิติ.

๑๑. จาเลตุํ ตํ น สกฺขึสุ, กุนฺตํ ราชาธิการิกา;

คนฺธามาลาหิ ปูเชสุํ, ราชเสนาสมาคตา.

๑๒. ราชา มหนฺตํ อจฺเฉรํ, ทิสฺวา ตํ หฏฺฐมานโส;

วิธาย ตตฺถ อารกฺขํ, ปวิสิตฺวา ปุรํ ตโต.

๑๓. กุนฺตํ ปริกฺขิปาเปตฺวา, เจติยํ ตตฺถ การยิ;

ถูปํ ปริกฺขิปาเปตฺวา, วิหารญฺจ อการยิ.

๑๔. ตีหิ วสฺเสหิ นิฐาสิ, วิหาโร โส นริสฺสโร;

สงฺฆํ สสนฺนิปาเตสิ, วิหรมหาการณา.

๑๕. ภิกฺขุนํ สตสหสฺสานิ, ตทา ภิกฺขุนิโย ปน;

นวุติ จ สหสฺสานิ, อภวึสุ สมาคตา.

๑๖. ตสฺมึ สมาคเม สงฺฆํ, อิทมาก มหีปติ;

‘‘สงฺฆํ ภนฺเต วิสริตฺวา, ภุญฺชึ มริจวฏฺฏิกํ.

๑๗. หสฺเส’ตํ ทณฺฑกมฺมํ เม, ภวตูติ อการยิ;

สเจติยํ มริจวฏฺฏิ-วิหารํ สุมโนหรํ.

๑๘. ปติคฺคณฺหาตุ ตํ สงฺโฆ, อิติ โส ทกฺขิโณทกํ;

ปาติตฺวา ภิกฺขุสงฺฆสฺส, วิหารํ สุมโน อทา.

๑๙. วิหาเร ตํ สมนฺตาปิ, มหนฺตํ มณฺฑปํ สุภํ;

กาเรตฺวา ตตฺถ สงฺฆสฺส, มหาทานํ ปวตฺตยิ.

๒๐. ปาเท ปติฏฺฐาเปตฺวาปิ,

ชเล อภยวาปิยา;

กโต โส มณฺฑโป อาสิ,

เสโส กาเส กถาวกา.

๒๑. สตฺตาหํ อนฺนปานาทึ, ทตฺวาน มนุชาธิโป;

อทา สามณกํ สพฺพํ, ปริกฺขารํ มหารหํ.

๒๒. อหุ สตสหสฺสคฺโฆ, ปริกฺขาโร ส อาทิโก;

อนฺเต สหสฺสคฺฆนโก, สพฺพ สงฺโฆ จ ตํลภิ.

๒๓. ยุทฺเธ ทาเน จ สูเรน, สูรินา รตนตฺตเย;

ปสนฺนามลจิตฺเตน, สาสนุโชต นตฺถินา.

๒๔. รญฺญา กตญฺญุนา เตน, ถูปการาปนาทิโต;

วิหาร มหนนฺตานิ, ปูเชตุํ รตนตฺตยํ.

๒๕. ปริจฺจตฺตธนาเน’ตฺถ, อนคฺฆานิ วิมุญฺจิย;

เสสานิ โหนฺติ เอกาย, อูนวีสติโกฏิโย.

๒๖. โตคา ทสทฺธวิธ โทสวิทูสิตาปิ,

ปญฺญาวิเสส สหิเตหิ ชเนหิ ปตฺตา;

โหนฺเตว ปญฺจคุณโยค คหิตสารํ,

อิจฺจสฺส สารคหเณ มติมายเตยฺยาติ.

สุชนปฺปสาทสํเวคตฺถาย กเต มหาวํเส

มริจวฏฺฏิกวิหารมโหนาม

ฉพฺพีสติโม ปริจฺเฉโท.