เอกวีสติม ปริจฺเฉท

วญฺจ ราชโก

๑. อุตฺติยสฺส กนิฏฺโฐ ตุ, มหาสิโว ตทจฺจเย;

ทส วสฺสานิ กาเรสิ, รชฺชํ สุชน เสวโก.

๒. ภทฺทสาลมฺหิ โส เถเร, ปสีทิตฺวา มโนรมํ;

กาเรสิ ปุริมายนฺตุ, วิหารํ นครงฺคณํ.

๓. มหาสิวกนิฏฺโฐ ตุ, สุรติสฺโส ตทจฺจเย;

ทสวสฺสานิ กาเรสิ, รชฺชํ ปุญฺเญสุ สาทโร.

๔. ทกฺขิณาย ทิสายํ โส, วิหารํ นครํ คณํ;

ปุริมาย หตฺถิกฺขนฺธญฺจ, โคกณฺณคิริเมว จ.

๕. วงฺคุตฺตเร ปพฺพตมฺหิ, ปาจิน ปพฺพตวฺหยํ;

รเหณกสมีปมฺหิ, ตถา โกฬมฺพกาฬกํ.

๖. อริฏฺฐปาเท มํ คุลกํ, ปุริมาย’จฺฉ คลฺลกํ;

คิริเนลปนายกณฺฑํ, นครสฺสุตฺถราย ตุ.

๗. ปญฺจสตา เนว มาทิ-วิหาเร ปุถวี ปติ;

คงฺคาย โอรปารญฺหิ, ลํกาทีเป ตหึ ตหึ.

๘. ปุเร รชฺชา จ รชฺเช จ, สฏฺฐีวสฺสานิ สาธุกํ;

กาเรสิ รมฺเม ธมฺเมน, รตนตฺตย คารโว.

๙. สุวณฺณปิณฺฑติสฺโสติ, นามํ รชฺชา ตสฺสา อหุ;

สุรติสฺโสติ นามนฺตุ, ตสฺสา’ปุรชฺชปตฺติยา.

๑๐. อสฺสนาวิกปุตฺตา เทฺว, ทมิฬา เสนคุตฺติกา;

สุรติสฺสมหีปาลํ, ตํ คเหตฺวา มหพฺพลา.

๑๑. ทุเว วีสติวสฺสานิ, รชฺชํ ธมฺเมน การยุํ;

เต คเหตฺวา อเสโล ตุ, มุฏสิวสฺส อตฺรโช.

๑๒. โสทริยานํ ภาตูนํ, นวโม ภตุโก ตโต;

อนุราธปุเร รชฺชํ, ทสวสฺสานิ การยิ.

๑๓. โจฬรฏฺฐา อิธ คมฺม, รชฺชตฺถํ อุชุชาติโก;

เอฬาโร นาม ทมิโฬ, คเหตฺวา’เสลภูปตึ.

๑๔. วสฺสานิ จตฺตารีสญฺจ, จตฺตาริ จ อการยิ;

รชฺชํ โวหารสมเย, มชฺฌตฺโต มิตฺตสตฺตุสุ.

๑๕. สยนสฺส สิโรปสฺเส, ฆณฺฏํ สุทีฆโยตฺตกํ;

ลมฺพาเปสิ วีราเวตุํ, อิจฺฉนฺเตหิ วินิจฺฉยํ.

๑๖. เอโก ปุตฺโต จ ธีตา จ, อเหสุํ ตสฺส ราชิโน;

รเถน ติสฺสวาปึ โส, คจฺฉนฺโต ภูมิปาลโช.

๑๗. ตรุณํ วจฺฉกํ มคฺเค, นิปนฺนํ สหเธนุกํ;

คีวํ อกฺกมฺมจกฺเกน, อสญฺจิจฺจ อฆาตยิ.

๑๘. คนฺตฺวาน เธนุฆณฺฏํ ตํ, ฆฏฺเฏสิ ฆฏฺฏิตาสยา;

ราชา เตเนว จกฺเกน, สีสํ ปุตฺตสฺส เฉทยิ.

๑๙. ทิชโปตํ ตาลรุกฺเข, เอโก สปฺโป อภกฺขยิ;

ตมฺโปตมาตา สกุณี, คนฺตฺวา ฆณฺฏมฆฏฺฏยิ.

๒๐. อาณาเปตฺวาน ตํ ราชา, กุจฺฉึ ตสฺส วิทาฬิย;

โปตํ ตํ นีหราเปตฺวา, ตาเล สปฺปมสปฺปยิ.

๒๑. รตนคฺคสฺส รตน-ตฺตยสฺส คุณสารตํ;

อชานนฺโตปิ โส ราชา, จาริตฺตมนุปาลยํ.

๒๒. เจติยทพฺพตํ คนฺตฺวา, ภิกฺขุสงฺฆํ ปวาริย;

อาคจฺฉนฺโต รถคโต, รถสฺส ยุคโกฏิยา.

๒๓. อกาสิ ชินถูปสฺส,

เอกเทสสฺส ภญฺชนํ;

อมจฺจา ‘‘เทว ถูโปโน,

ตยา ภินฺโน’ติ อาหุ ตํ.

๒๔. อสญฺจิจฺจ กเต‘เป’ส, ราชา โอรุยฺห สนฺทนา;

‘‘จกฺเกน มม สีสมฺปิ, ฉินฺทถา’ติ ปเถสยิ.

๒๕. ‘‘ปรหึสํ มหาราช, สตฺถา โน เนว อิจฺฉติ;

ถูปํ ปากติกํ กตฺวา, ขมาเปหี’’ติ อาหุ ตํ.

๒๖. เต ฐเปตุํ ปญฺจทส, ปาสาเณ ปติเต ตหึ;

กหาปณ สหสฺสานิ, อทา ปญฺจทเส วโส.

๒๗. อกา มหลฺลิกา วีหึ, โส เสตุํ อาตเป ขิปิ;

เทโว อกาเล วสฺสิตฺวา, ตสฺสา วิหึ อเตมยิ.

๒๘. วีหึ คเหตฺวา คนฺตฺวา สา, ฆณฺฏํ ตํ สมฆฏฺฏยิ;

อกาลวสฺสํ สุตฺวา ตํ, วิสฺสชฺเชตฺวา ตมตฺติกํ.

๒๙. ราชา ธมฺมมฺหิ วตฺตนฺโต, ‘‘กาเล วสฺสํ ลเภ’’อิติ;

ตสฺสา วินิจฺฉยตฺถาย, อุปวาสํ นิปชฺชิ โส.

๓๐. พลิคฺคาหี เทวปุตฺโต, รญฺโญ เตเชน โอตฺถโฏ;

คนฺตฺวา จาตุมหาราช-สนฺติกํ ตํ นิเวทยิ.

๓๑. เต ตมาทาย คนฺตฺวาน, สกฺกสฺส ปฏิเวทยุํ;

สกฺโก ปชฺชุนฺนมาหุย, กาเล วสฺสํ อุปาทิยิ.

๓๒. พลิคฺคาหี เทวปุตฺโต, ราชิโน ตํ นิเวทยิ;

ตโตปฺปภุติ ตํ รชฺเช, ทิวา เทโว น วสฺสถ.

๓๓. รตฺตึ เทโว’นุ สตฺตาหํ, วสฺสิยามมฺหิ มชฺฌิเม;

ปุณฺณาน’เหสุํ สพฺพตฺถ, ขุทฺทกา วาฏกานิปิ.

๓๔. อคติคมนโทโส มุตฺตมตฺเตน เอโส,

อนุปหต กุทิฏฺฐิปีทิสึ ปาปุณี’ทฺธึ;

อคติคมนโทสํ สุทฺธทิฏฺฐิสมาโน,

กถมิธหิ มนุสฺโส พุทฺธิมา โน ชเหยฺยาติ.

สุชนปฺปสาทสํเวคตฺถาย กเต มหาวํเส

ปญฺจราชโก นาม

เอกวีสติโม ปริจฺเฉโท.