ทุติยปริจฺเฉท

มหาสมฺมตวํส

๑. มหาสมฺมต ราชสฺส, วํสโช หิ มหามุนิ;

กปฺปสฺสาทิมฺหิ ราชา’สิ, มหาสมฺมตนามโก.

๒. โรโช จ วรโรโช จ, ตถา กลฺยาณกา ทุเว;

อุโปสโถ จ มนฺธาตา, จรโก’ปจรา ทุเว.

๓. เจตีโย มุจโล เจว, มหามูจลนามโก;

มุจลินฺโท สาคโร เจว, สาคโร เทว วนามโก.

๔. ภรโต ภคีรโถ เจว, รุจิ จ สุรุจิ ปิจ;

ปตาโป มหาปตาโป, ปนาทา จ ตถา ทุเว.

๕. สุทสฺสโน จ เนรุ จ, ตถา เอว ทุเว ทุเว;

ปจฺฉิมา จา’ติ ราชาโน, ตสฺส ปุตฺตปปุตฺตกา.

๖. อสํขิยายุกา เอเต, อฏฺฐวีสติ ภูมิปา;

กุสาวตึ ราชคหํ, มิถิลญฺจาปิ อาวสุํ.

๗. ตโต สตญฺจ ราชโน, ฉปฺปญฺญาส จ สฏฺฐิ จ;

จตุราสีติ สหสฺสานิ, ฉตฺตึสา จ ตโต ปเร.

๘. ทฺวตฺตึส อฏฺฐวีสา จ, ทฺวาวีสติ ตโต ปเร;

อฏฺฐารส สตฺตรส, ปญฺจทส จตุทฺทส.

๙. นว สตฺต ทฺวาทส จ, ปญฺจวีส ตโตปเร;

ปญฺจวีสํ ทฺวาทส จ, ทฺวาทสญฺจ นวา ปิจ.

๑๐. จตุราสีติสหสฺสานิ, มขาเทวาทิกาปิ จ;

จตุราสีติสหสฺสานิ, กฬาราชนกาทโย.

๑๑. โสฬส ยาว โอกฺกาตํ, ปปุตฺตา ราสิโต อิเม;

วิสุํ วิสุํ ปุเร รชฺชํ, กมโต อนุสาสิสุํ.

๑๒. โอกฺกามุโข เชฏฺฐปุตฺโต, โอกฺกากสา’สิ ภูปติ;

นิปุโร จนฺทีมา จนฺทํ-มุโข จ สิวิ สญฺชโย.

๑๓. เวสฺสนฺตร มหาราชา, ชาลี จ สีหวาหโน;

สีหสฺสโร จ อิจฺเจเต, ตสฺส ปุตฺต ป ปุตฺตกา.

๑๔. เทฺวอสีติ สหสฺสานิ, สีหสฺสรสฺส ราชิโน;

ปุตฺต ป ปุตฺต ราชาโน, ชยเสโน ตทนฺติโม.

๑๕. เอเต กปิลวตฺถุสฺมึ, สกฺยราชาติ วิสฺสุตา;

สีหหนุ มหาราชา, ชยเสนสฺส อตฺรโช.

๑๖. ชยเสนสฺส ธีตา จ, นาเมนา’สิ ยโสธรา;

เทวทเย เทวทห-สกฺโก นามา’สิ ภูปติ.

๑๗. อญฺชโน จา’ถ กจฺจานา, อาสุํ ตสฺส สุตา ทุเว;

มเหสีจา’สิ กจฺจานา, รญฺโญ สีหหนุสฺส สา.

๑๘. อาสี อญฺชนสกฺกสฺส, มเหสี สา ยโสธรา;

อญฺชนสฺส ทุเว ธีตา, มายา จาถ ปชาปติ.

๑๙. ปุตฺตา ทุเว ทณฺฑปาณี, สุปฺปพุทฺโธ จ สากิโย;

ปญฺจ ปุตฺตา ทุเว ธีตา, อาสุํ สีหหนุสฺสเร.

๒๐. สุทฺโธทโน โธโตทโน, สกฺกสุกฺกมิโตทโน;

อมิตา ปมิตาจา’ติ, อิเม ปญฺจ อิมา ทุเว.

๒๑. สุปฺปพุทฺธสฺส สกฺกสฺส, มเหสี อมิตา อหุ;

ตสฺสา’สุํ ภทฺทกจฺจานา, เทวทตฺโต ทุเว สุตา.

๒๒. มายา มหาปชาปติ เจว, สุทฺโธทน มเหสีโย;

สุทฺโธทน มหารญฺโญ, ปุตฺโต มายาย โส ชิโน.

๒๓. มหา สมฺมตวํสมฺหิ, อสมฺภินฺเน มหามุนิ;

เอวํ ปวตฺเต สญฺชาโต, สพฺพ ขตฺถิย มุทฺธนิ.

๒๔. สิทฺธตฺถสฺส กุมารสฺส, โพธิสตฺตสฺส สา อหุ;

มเหสี ภทฺทกจฺจานา, ปุตฺโต ตสฺสา’สิ ราหุโล.

๒๕. พิมฺพิสาโร จ สิทฺธตฺถ-กุมาโร จ สหายกา;

อุภินฺนํ ปิตโร จาปิ, สหายาเอว เต อหุํ.

๒๖. โพธิสตฺโต พิมฺพิสารา, ปญฺจวสฺสาธิโก อหุ;

เอกูนตึโส วยสา, โพธิสตฺโต’ภินิกฺขมิ.

๒๗. ปทหิตฺวาน ฉพฺพสฺสํ, โพธึ ปตฺวา กเมน จ;

ปญฺจตึโส ถ วยสา, พิมฺพิสารมุปาคมิ.

๒๘. พิมฺพิสาโร ปนฺนรส-วสฺโส’ถ ปีตรํ สยํ;

อภิสิตฺโต มหาปญฺโญ, ปตฺโต รชฺชสฺส ตสฺส ตุ.

๒๙. ปตฺเต โสฬสเม วสฺเส, สตฺถา ธมฺมมเทสยิ;

ทฺวาปญฺญาเสว วสฺสานิ, รชฺชํ กาเรสิ โส ปน.

๓๐. รชฺเช สมา ปนฺนรส, ปุพฺเพ ชินสมาคมา;

สตฺตตึส สมา ตสฺส, ธรมาเน ตถาคเต.

๓๑. พิมฺพิสารสุโต’ชาต-สตฺตุตํ ฆาตียา’มติ;

รชฺชํ ทฺวตฺตึสวสฺสานิ, มหามิตฺตทฺทุการยี.

๓๒. อชาตสตฺตุโน วสฺเส, อฏฺฐเม มุนิ นิพฺพุโต;

ปจฺฉา โส การยี รชฺชํ, วสฺสานิ จตุวีสติ.

๓๓. ตถาคโต สกลโลกคฺคตํ คโต;

อนิจฺจตาว สมวโส อุปาคโต;

อิติ’ธ โย ภยชนนึ อนิจฺจตํ,

อเวกฺขเต ส ภวติ ทุกฺขปารคูติ.

สุชนปฺปสาทสํเวคตฺถาย กเต มหาวํเส

มหาสมฺมตวํโส นาม

ทุติโย ปริจฺเฉโท.